أرحمونا يرحمكم الله

أرحمونا يرحمكم الله 

 

 

 

 

ركز معايا علشان كل كلمه قالها أى مسئول أكيد حنحتاجها فيما بعد فى مواقف متاشبهه فى المشهد المصرى
رئيس وزراء فرنسا أعلن النهارده إصرار فرنسا على دك معاقل داعش فى سوريا والعراق (( نتمنى الكلام يترجم لأفعال على أرض الواقع )) ثم أكد خبر تحرير سونجار من تنظيم داعش فى الأراضى العراقيه (( ماحدش واخد باله أن المناطق التى يتم تحريرها من داعش هى أراضى كرديه فقط وهل لذلك علاقه بتقسيم العراق فان كان ذلك فهذا دليل قوى على أن أمريكا والمالكى وقيادات الجيش العراقى السابق هم من أوجدوا داعش للوجود ولا حد عنده تفسير تانى ))
وزير الخارجيه الفرنسى أعلن أن فرنسا بصدد مراجعة علاقاتها ببعض الدول فى المنطقه التى تدعم داعش (( يعنى أنتوا عارفين مين بيمول وعارفين مصادر السلاح وعارفين الكفت عن داعش وأسرارها )) ..... (( على فكره كل المحطات أفردت تحليلات لهذا الخبر وحاولت توقع من هى هذه الدول التى يقصدها وزير الخارجيه الفرنسى ماعدا قناه واحده عملت نفسها مش واخده بالها من الخبر ومستنى منك تعليق لو أنت عرفت هذه الدول ))
وزير الداخليه قال كل الأجراءات الأستثنائيه متاحه أمام فرنسا لأنها فى حالة حرب (( ومصر بقى بالصلاه على النبى فى حالة إيه ؟؟؟ )) ..... (( وهنا سؤال يطرح نفسه هى فرنسا معندهاش نشطاء ولا جمعيات حقوق أنسان ولامنظمات حقوقيه تقولها كده عيب ياطنط فرنسا )) معلشى علشان أحنا دوله ناميه مش دوله عظمى وأحنا عندنا تصرفاتنا بحساب لكن الدول دى ماحدش يقدر يحاسبها إلا ربنا
على هامش تلك التصريحات معانا خبر على الماشى
أحد المرشحين لرئاسة الحزب الديمقراطى الأمريكى أعلن النهارده أن على أمريكا أن تتحمل نتيجة أخطائها وخلقها لداعش فى العراق وحان الوقت لأتخاذ أجراءات حقيقيه للقضاء على هذا التنظيم الدموى (( أعتراف منهم فيهم ومش أى حد ده واحد بيسعى لأولى خطواته لخوض أنتخابات الرئاسه الأمريكيه وأن كنت أشك أن قصده هو وضع هيلارى كلينتون فى مأزق لأنه يعلم جيدا أنها من ستفوز برئاسة الحزب لكنه يصنف فعليا على أنه إعتراف وإلا كانت كلينتون فرشت له الملايه وشرشحت له ))
تحقيقات الأدعاء الفرنسى توصلت لأن هناك أمام مغربى مقيم ببلجيكا على علاقه غير مباشره بالحادث (( حنرجع تانى ننحط فى موقف الدفاع عن سماحة الأسلام وتعاليمه الساميه علشان خاطر شوية أوساخ بهايم بيمشوا ورا كلام أى واحد يربى دقنه ويلبس جلابيه بيضا وقرا صفحتين فى كتب أبن تيميه )) وسيكون هناك أجراءات ضد تجمع المسلمين فى كل نواحى اوروبا وعلى رأسها ضاحية ماراكينا ببروكسل فى بلجيكا (( شفت بقى المسلمين والأسلام بيتضرروا أزاى ))
بيان داعش (( أنا شخصيا لحد دلوقتى شاكك فى الموضوع ده ومش مريحنى وقارن بين تصرفهم فى الحادث الفرنسى وحادث الطائره الروسيه وأنت تعرف التناقض وأزاى يعترفوا بتفصيلات فى هذا الحادث وفى الطائره يخفون طريقة التفجير .... هذا أن دل على شئ يدل على أن بيانهم أعتمد على المعلومات اللى تدولتها وكالات الأنباء ومعلومات عاديه والكل عارفها أنما فى الطائره الروسيه وعلشان مصر وروسيا مدكنين على المعلومات داعش ماقدرتشى تعلن عن التفاصيل وهذا يؤكد أن داعش ليس لها أى علاقه بالحادثين واللى قام بالعمليتين جهاز مخابراتى بتاع دوله رئيسها عمال يعيط على الضحايا الفرنسيين قدام الكاميرات وبيعمل حركات وكهن نسوان وهو قاصد الدول اللى بتسلح مصر وأى حد عنده كلام تانى يناقشنى وياريت فى التليفون علشان الأسرار ))
الداخليه الفرنسيه أعلنت عن مقتل 5 من أصول عربيه مسلمه فى تلك الحوادث (( لو رجعت لبيان شراميط داعش حتلاقيهم بيبرروا قتل الفرنسيين لأنهم صلبيين وكفار طيب والمسلمين دول زنبهم إيه .... وعلى فكره أكتر حد تضرر من هذا الحادث هو الدين الأسلامى نفسه ))