البهيمه رايحه المدبح برجليها

البهيمه رايحه المدبح برجليها وفرحانه 

 

** عجبى عليك يازمن على البهيمه اللى رايحه المدبح علشان تندبح وماشيه سعيده وعادى وهى مش عارفه أنها رايحه لنهايتها 

** عجبى عليك يازمن البهيمه بتشتريها قبل العيد وتاخدها بيتك وتطنملك وأنت بتحط لها الأكل والشرب وتبقى مبسوطه كل لما تشوفك ويوم العيد الصبح لما تخش عليها تفرح بيك زى كل يوم وماتعرفشى أنك داخل عليها علشان تحط حد لحياتها وتحط نهايتها بإيدك 

** تتخيل بقى أن البنى آدم بقى زى البهيمه مش عارف مين اللى بيحط نهايته ومين اللى بيقرر أمتى تنتهى حياته
** العراقيين فرحوا بسقوط نظام صدام حسين على أيد الأمريكان وفرحوا وهللوا بدخول الأمريكان العراق ومكانوش يعرفوا أن الجزار واخدهم على المدبح علشان ينهى حاجه أسمها العراق وبعد فوات الآوان بدأ العراقيين يندموا ويضربوا نفسهم بالجزم لكن بعد فوات الآوان وبعد ماالسكينه ماقطعت آخر وريد فى رقبة العراق 

** نفس الحال دلوقتى بعض السوريين منتظرين سقوط نظام بشار الأسد ومحدش فيهم كلف نفسه يسأل العراقيين اللى بيروح المدبح بيجرى له إيه ؟؟؟
** برضوا فيه مصريين مستنين سقوط بلدهم على أيد الجزار اللى مايعرفشى الرحمه
** أما ليبيا خلاص الجزار سن سكينته وربطها من رقبتها ولما يخلص السيجاره اللى فى أيده حيدبح ليبيا
** تحت عند الجنوب خلاص الجزار أنتهى من دبح العجل اليمنى وبيريح شويه وحيقوم بعد شويه يسلخه ويقطعه
** عجبى عليك يازمن محدش عاوز يتعلم من العجل العراقى ولا حد كلف نفسه يسأل العجل العراقى راح فين
** طول ماالجزار عايش مش حيبطل يدبح عجول ومافيش عجل فى الزريبه كلف نفسه يسأل العجول اللى بتخرج من الزريبه مع الجزار بتروح فين ومابترجعشى الزريبه تانى ليه ؟؟؟
** طول مالجزار عايش مش حيبطل يدبح عجول ولا العجول حتتعلم الدرس