أمريكا وإيران روحين فى زكيبه

نقول تانى ليه أمريكا بتعمل توازن فى المنطقه ؟؟؟

** تقريبا مضمون هذا المقال أنا قلته من حوالى 4 سنوات وسأعيده اليوم لأننا سنحتاجه فى الأيام القادمه بعد تحرك أمريكا الأخير فى اليمن علشان لما نتكلم فى الموضوع ده نبقى فاهمينه كويس

** فى حرب 1973 كانت الدنيا ماشيه مظبوط مع العرب بقيادة الثعلب السياسى أنور السادات وتقريبا كده الدنيا كلها بتتغير بعد موت هذا الرجل المهم الحرب كانت ماشيه كما هو مرسوم لها وأسرائيل لم تكن تتوقع كل هذه الخسائر وأنا قلت فى مقال قبل كده أسرائيل لاتجيد الحروب الطويله لكنها تجيد العمليات الخاطفه السريعه علشان نفسها قصير خصوصا لو كانت فيه مقاومه وتقدر ترجع لتاريخ حروب أسرائيل وأنت تعرف وتتأكد من كلامى

** أسرائيل بدأت قوتها تنهار وفكرت قيادتها فى الأعمال الغير محسوبة العواقب وفعلا أسرئيل هددت بإستخدام السلاح النووى أن لم تمدها أمريكا بجسر جوى ورضخت أمريكا للضغوط الأسرائيليه وعملت لها جسر جوى وبحرى وكلنا فاكرين الكلام ده وأنتهت الحرب لحد هنا

** الطبيعى بعد أى حروب هو الأعتكاف على دراستها سلبيات وأيجابيات ودرس الأمريكان بجديه التهديد الأسرائيلى بإستخدام السلاح النووى ولأن نتائج إستخدام هذا السلاح لن تكون فى صالح الأمريكان حيث سيتم تدمير المنطقه كلها تقريبا والمنطقه تعتبر البقره الحلوب للأمريكان كمورد للطاقه وسوق سلاح لايكف عن الشراء فكان لابد للأمريكان من خلق توازن نووى مضمون وخلى بالك بقى من ألفاظى هنا لابد من خلق توازن نووى يردع تفكير اسرائيل فى مجرد التفكير فى أستخدام النووى للحفاظ على المنطقه وخيراتها وأيضا سيضمن بقاء اسرائيل لأن أمريكا محتاجه أسرائيل فى أشعال حرب التسلح التى تستنزف خيرات هذه المنطقه

** يبقى علشان أعمل التوازن ده لازم أخلق دوله نوويه موازيه لأسرائيل تكون رادعه لأى تفكير اسرائيلى متغطرس وتكون أسرائيل أيضا رادعه لها يعنى بحط قوتين قصاد بعض يخوفوا بعض لكن مايقدروش يعملوا حاجه

** طبعا مافيش دوله عربيه تنفع فى الليله دى وتركيا لها أطماع من زمان فى المنطقه وأحيانا بتشرد بره القفص والموضوع ممكن يعمل مشاكل مع الروس لأن روسيا وقتها كانت لسه قوه عظمى وإيران كمان ماتنفعشى لأن موقفها مع العرب فى حرب 1973 كان ضد أسرائيل وضد مصالح الأمريكان لكن ممكن لو غيرنا نظام الحكم فى أيران نقدر ننفذ الخطه فى أيران وعلى الفور بدأوا التنفيذ وتم تجهيز الخمينى فى فرنسا والراجل بصراحه تقمص الدور وعمل فيها أبو الثوار وأشعلت أمريكا الثوره فى إيران بمساعدة الفرنسيين وعاد الخومينى لأيران وقامت الثوره الدينيه فى أيران وطبعا ولأن أمريكا كانت بتشتغل من خلف الستار الفرنسى فكان طبيعى وحسب التوجهات الدينيه تحصل بعض المناوشات بين أيران وأمريكا كشئ طبيعى لسبك القصه ويتهرب النووى الروسى بواسطة المافيا الروسيه وبعلم الأمريكان من روسيا اللى بدأت تتفكك ليذهب للأيرانيين وتسكت أمريكا اللى ماسكتتشى على الوهم العراقى ولا على شوية الكيماوى السورى ولا على صفحيتين الكيماوى بتوع القذافى

** نجحت أمريكا فى خلق توازن نووى فى المنطقه ورادع لأى تفكير اسرائيلى لتدمير البقره الحلوب ويحفظ للأمريكان سوق السلاح ونجحت بإختيارها لليمين الدينى المتطرف المذهبى فى أشعال حرب أخرى طائفيه فى المنطقه نفس الأسباب السابقه

** أوباما طبعا لترسيخ هذه النظريه كان عاوز يمسك الأخوان الحكم فى مصر وسوريا  وليبيا وتونس واليمن لكن طلعله خازوق أسمه السيسى اللى أتقمص من حركة الطيارات الأباتشى وبدأ يفتح لنفسه ولغيره سوق سلاح تانيه وتلقفه الروس لنهم شرقانيين وعارفين لو مصر أتفتحت قدامهم حتجرجر وراها شمال أفريقيا ودول الخليج وهو ماحدث فعلا

** وجود السيسى وتقاربه مع الروس ومع السعوديه والروس عاوزين يصالحوا مصر على ايران يبقى كده الليله الأمريكانى حتبوظ لأن لو أيران ومصر أتصالحوا يبقى فيه تقارب أيرانى سعودى حيحصل يعنى أمريكا حتخسر كتير من هذه التقاربات فى المنطقه

** كل ده يفسر ليه أمريكا أرسلت قوات مارينز اليمن النهارده وليه بتهدد بالتدخل البرى فى اليمن وعلشان نفهم كل ده محتاجين مقال منفصل لوحده بس محدش يزعل منى علشان حنخبط قوى فى أبو سوسو لو أتكلمنا بصراحه ونعرف ليه أمريكا بتهدد بفتح ملف هجمات 11 سبتمبر وعلاقة السعوديه بالقاعده ونعرف ليه أمريكا مقتلتشى بن لادن زى مابتقول وليه عملوا المسرحيه بتاعة قتل بن لادن وليه تم أستبدال القاعده بداعش مع ان القاعده شغاله مع الأمريكان وأبو سوسو زى ماقال الكتاب فى اليمن وسوريا والعراق وماتزعلشى منى لما تفقد الثقه فى أى حد يكلمك بأسم الدين لأنك حتعرف بلاوى يشيب لها الوليد

** أنتظرونا وتحليل لماذا أرسل الأمريكان قوات مارينز لليمن

                   جنرال بهاء الشامى