سيداتى آنساتى سادتى نحن على وشك الأقلاع بطائرة الزمن
التاريخيه فى الرحله رقم 12 لنستكمل ماتوقفنا عنده فى الرحله السابقه بعد أن
تزودنا بالوقود فبرجاء ربط الأحزمه وعدم التدخين وأغلاق الموبيلات لأننا فى هذه
الرحله نريد منكم التركيز جيدا قبل الأقلاع
الساعه 8.29 صباحا بتوقيت واشنطن الساعه 3.29 بتوقيت
القاهره أتصل القائم بأعمال السفير الأسرائيلى شاليت من فندق والدروف
أستوريا بهنرى كسينجر وأبلغه أن الطائرات المصريه والسوريه تهاجم على
طول الجبهات وبكثافه
الساعه 8.30 صباحاً بتوقيت واشنطن الساعه 3.30
بتوقيت القاهره أتصل هنرى كسينجر بالملك حسين أبو الواد نايتى اللى بيدرس
للأردنيين معلومات مزيفه عن التاريخ والملك فيصل ملك السعوديه يطلب منهما التدخل
وأستغلال نفوذهما لمنع وقوع حرب شامله
الساعه 8.35 صباحا بتوقيت واشنطن الساعه 3.35 بتوقيت القاهره
أتصل كسينجر بـ الكسندر هيج رئيس أركان البيت الأسود وكان نيكسون فى
الوقت ده فى ولاية فلوريدا وطلب منه يبلغ الرئيس نيكسون أن فيه حرب أندلعت فى
الشرق الأوسط
الساعه 8.40 صباحاً بتوقيت واشنطن الساعه 3.40 بتوقيت القاهره
بكورت فادهيم سكرتير عام منظمة الأمم المتحده وأخبره على السريع أن فيه حرب قامت
فى الشرق الأوسط وإيه اللى ممكن يتعمل فى الليله دى
الساعه 8.50 صباحا بتوقيت واشنطن الساعه 3.50 عصراً بتوقيت
القاهره أتصل كسينجر بمساعده المسئول عن مجلس الأمن القومى برنت سكوكروفت وحاول أن
يصل معاه لتحليل للموقف ووضع التصورات للمرحله المقبله وحيقولوا إيه ويتنيلوا
يعملوا إيه وأتفقوا على الآتى :
** أن مايحدث على الأرجح حرب شامله فى الشرق الأوسط
** أن النتيجه الحتميه ستكون أنتصار سريع وساحق على
الجبهتين المصريه والسوريه لكن ممكن يتأخر بعض الشئ النصر المبين على الجبهه
المصريه لصالح أسرائيل
** أن نتيجة ذلك أن العرب بعد هزيمتهم سيلجأون للأتحاد
السوفيتى الذى سيضطر لأظهار تأييد للدول العربيه
** أن الدول الأوربيه الغربيه التى تسعى لأنفصال قرارها عن
الولايات المتحده الأمريكيه قد تتخذ طريقا فى الأزمه بعيدا عن طريق
الولايات المتحده الأمريكيه
** الجميع يعلم أن الرئيس نيكسون خرج مهزوما من فضيحة ووترجيت
وده مؤكد حيخلى بعض الأطراف تستغل االموقف وأولهم الأتحاد السوفيتى
** أن الولايات المتحده لابد أن تتصرف بثقه فى النفس لكن بدون
أستفزاز للآخرين
** تحسبا لأى مواقف فأنه يجب تحريك الأسطول السادس الأمريكى
لشرق البحر الأبيض المتوسط ليكون قريبا من موقع الأحداث و الجاهزيه للبدء فورا فى
تنفيذ خطط الطوارئ لتعزيز القوات الأمريكيه بالمنطقه
** فى هذه الظروف ومنعا للتضارب يجب توحيد التحدث بأسم
الولايات المتحده الأمريكيه حسبما يقرر الرئيس نيكسون سواء كان البيت الأبيض أو
وزارة الخارجيه
الساعه 9.00 صباحا بتوقيت واشنطن الساعه 4.00 عصرا بتوقيت
القاهره أتصل تانى القائم بالأعمال الأسرائيلى شاليف على هنرى كسينجر وقال له أنه
تم رصد محاوله لعبور قناة السويس من الضفه الغربيه للضفه الشرقيه بواسطة قوات
الصاعقه المصريه وهناك هجوم شامل على الجبهه السوريه من قبل الجيش السورى
** حاول تخليك مركز معايا يعنى العبور بمعناه الحقيقى كان بعد
ساعتين من ساعة الصفر الفعليه
الساعه 9.07 صباحا بتوقيت واشنطن وكده بدأت أمريكا كلها تصحى
من النوم الساعه 4.07 بتوقيت القاهره أتصل أبا أيبان بهنرى كسينجر ليخبره برساله
شفويه من جولدا مائير بأن قصة الهجوم الأسرائيلى على مواقع عسكريه مصريه بخليج
السويس كلها كدب وخدعه من السادات وأن حقيقة الوضع أن مصر تشن هجوما واسعا على كل
المواقع الأسرائيليه بالضفه الشرقيه للقناه وأنه تحدث بنفسه مع جولدا مائير ووجدها
هائجه وتسب وتلعن باللغه العبريه وحين لاتسعفها اللهجه العبريه تلجأ للغه
الأنجليزيه اللى أتعلمتها فى حوارى نيوييورك على حد تعبيره
الساعه 9.15 صباحا بتوقيت واشنطن الساعه 4.15 بتوقيت القاهره
تلقى هنرى كسينجر معلومات عن أجتماع مجلس الأمن القومى الذى بدأ فى
البيت الأسود فى تمام التاسعه وكان ملخصها أن هناك حالة تضارب فى الآراء
** وليام كولبى مدير المخابرات المركزيه يقول أن من المحتمل أن
تكون الروايه المصريه عن بدء العمليات صحيحه وأن تكون القوات الأسرائيليه هى التى
بدأت الهجوم وخلى بالك مين اللى بيقول وبيتكلم رئيس المخابرات
الأمريكيه وده فى حد ذاته أنتصار لحد دلوقتى
** جيمس شليزنجر وزير الدفاع أخد أيضا نفس الخط بتاع مدير
المخابرات وعلق وقال لو اللى بتقوله أسرائيل حقيقى وصحيح فهذه أول مره لم تكن فيها
هى البادئه وده برضوا لحد دلوقتى أنتصار
** الأدميرال توماس مورر رئيس هيئة الأركان برضوا أخد نفس
الخط وقال أحتمال أن تكون أسرائيل هى البادئه بدافع الضربات الوقائيه
وده كمان برضوا أنتصار لحد دلوقتى
** لكن جوزيف سيسكو وكيل الخارجيه لشئون الشرق الأوسط رجح صدق
الروايه الأسرائيليه
** روى آثرتون مساعد سيسكو خد نفس الأتجاه بصدق الروايه
الأسرائيليه على أساس أن يوم الغفران هو آخر يوم ممكن أسرائيل تفكر فيه بالهجوم
ولحد دلوقتى ولحد ساعته وتاريخه الموقف والتضارب اللى حاصل وأربك الحسابات
الأمريكيه يعتبر نجاح فى الخداع السياسى والمعلوماتى والمخابراتى وأن العقول
المصريه نجحت فى الأنتصار على المخابرات الأمريكيه والحرب شغاله بقالها ساعتين
وربع وأمريكا معلوماتها متضاربه وده اللى قلته لك فى مقال اللامعقول فى عالم
العقول بخصوص عالم المخابرات
الساعه 9.20 صباحا بتوقيت واشنطن الساعه 4.20 عصرا بتوقيت القاهره
وخلى بالك قربنا ندخل على المغرب وجنودنا الصايمه قربت تفطر لأننا فى رمضان أتصل
دوبرينين مره تانيه بكسينجر وأبدى شكوكه فى الروايه الأسرائيليه وقال الزيات كان
معايا فى أتصال دلوقتى وبيؤكد صحة الروايه المصريه وفعلا حسيت من نبرة صوته أنه
صادق (( علشان النقطه دى بالذات السادات مقالشى للزيات على ساعة الصفر علشان لما
يتكلم عن أنه مايعرفشى يبان أنه صادق )) لكن كسينجر رد عليه وقاله لنفترض ذلك لكن
أنا وأنت نعلم أن الروايه المصريه خادعه ولنفترض أن أسرائيل أرادت أن تهاجم فلماذا
تهاجم فى خليج السويس وهناك مواقع أفضل بكثير ثم كيف يكون هناك عمل عسكرى منسق فى
توقيت واحد على الجبهتين المصريه والسوريه ثم أنفعل كسينجر وعلى حد كلامه فى كتابه
أن وقف وأنفعل على دوبرينين وقال أى أن كان من بدا لكن مايحدث فى الشرق الأوسط سوف
يمتد تأثيره للقوتين العظمتين وسوف يجر واشنطن وموسكو لمواجهه
تعالى بقى نشوف كسينجر قال إيه عن عنصر المفاجأه رغم ثقتى فى
نصر ساحق وسريع لأسرائيل على الجبهتين لكنى مستغرب كيف أستطاعت مصر وسوريا تحقيق
هذه المفاجأه على المستوى التكتيكى والأستراتيجى معاً والجمله دى فى كتاب شخصيه
مثل كسينجر تعتبر نصر كبير فى حد ذاته فى عالم الخداع الأستراتيجى اللى قام بيه
السادات على المستوى السياسى والدبلوماسى وقامت بيه القوات المسلحه المصريه
والسوريه على المستوى العسكرى وخلى بالك أننا بقالنا ساعتين وتلت وأمريكا اللى
بتعرف دبة النمله قبل ماتحصل لسه معندهاش معلومات مؤكده عما يحدث فى الشرق
الأوسط وأول يوم قتال قرب يخلص وده كمان انتصار مخابراتى عسكرى مدنى من
المصريين والسوريين علشان بعد كده لما أقولك على حاجه عن المخابرات الأمريكيه
والتضارب اللى عندها تصدقنى
سياداتى آنساتى سادتى المسافرين معنا على هذه
الرحله أرى أنه من الضرورى الهبوط الآن لنتزود بالوقود آملين أن نطير بكم مره أخرى
لو فى العمر بقيه لنستكمل رحلتنا التاريخيه وسلسلة مقالاتنا معجزة جيش وشعب على أن
نعود بالطائره لأرض الوطن الحبيب من نيويورك لأرض الوطن لنتعرف على مايحدث فى
القاهره ودمشق
جنرال بهاء الشامى
امريكا دي حضرتك بلونه فاضيه منفوخة هواء
ردحذف