أين تذهب أموال القروض ؟؟؟

 المعارضه علم أولاً وفن ثانيا 

■■ أوعى تكون فاكر علشان معاك موبايل فيه نت وبتدفع عليه 1 جنيه فى اليوم بقيت محلل سياسى ولا ناقد فنى ولا معارض قصف جبهات ..... لاياروح طنط الموضوع مش كده خالص وللأسف مواقع التفاشل الأجتماعى مش زى مابيقولوا كله مستخبى ورا شاشه ..... لالالالا أى حرف بتكتبه وخصوصا فى التعليقات بيكشف شخصيتك مهما بقى كتبت على صفحتك أنك مدير إدارة مراجيح مولد النبى أو رئيس قسم النسا والولاده فى عشة السبتيه 

■■ أى بنى آدم متمرس من تعليق واحد بيعرف يفهمك ويمكن دى فرصه أقول للمتنكرين على الصفحه أوعى تكون فاكر أنى مش هارشك وعارفك وعارف ميولك وسايبك علشان بتلذذ بالمجهود اللى بتبذله فى التخفى قدامى وفى الآخر حتتصدم لما تعرف أنى عارف أنك خروف وحالق فروته

 

■■ فيه هرى كتير اليومين دول على فلوس القروض بتروح فين وأتصرفت فين والبوقين الحمضانين وطبعا كل الأكونتات المتنكره بتلاقيها ذى الدبان بتعف على البوست وتشم ريحة الغباء من آخر الفيسبوك وتقرا تعليقات ماأنزل الله بها من سلطان

■■ السؤال حلال ومنطقى جدا ومن أبسط حقوقك ويمكن أن يكون هذا السؤال فلوس القروض بتروح فين هو أول سؤال تسأله لأى حكومه علشان تحاسبها .... لكن يكون السؤال فى غير محله ولا محل له من الأعراب عندما تعلم أصول وألف باء أتفاقيات القروض والمنح والمساعدات

               

■■ زمان أيام الأمان كانت الدوله اللى بتديك قرشين بيكونوا فائض عندها وعلشان توقفك على حيلك لكن دلوقتى ممكن دوله تستلف فلوس علشان تسلفهالك علشان تخلص بالقروض مصالح عندك (( مصر أعطت أحد الدول الأفريقيه قرض من كام يوم يعنى بنستلف ونسلف ))

■■ حديك مثال أمريكا بتعطيك معونه عسكريه قد كده هنا سؤال المعونه دى بتاخدها مثلا فى أيدك وتروح تشترى بيها لبان وتبعزقها على المراجيح لا ياروح قلبى المعونه بيتحدد أوجه الصرف والشراء بيكون من الدوله المقرضه أو المانحه يعنى أنت عاوز إيه من الفلوس دى بتقول عاوز أجيب منها كذا وكذا هو بيجيلك الحاجات دى من مصانعه وهو اللى بيشتريها ويحدد تمنها لكن أنت تقفش فلوس فى أيدك الكلام ده كان زمان أيام الجهل والطيبه

■■ واحد نحنوح حيقولى أومال مجلس النوام بيعمل إيه مش هو بيراقب الحاجات دى حقولك لاياروح خالتك مجلس النوام بيعرف ويناقش أنت حتجيب القرض منين وتصرفه فين وشروط القرض والعائد منه لكن رقابه على أصل القرض ده اللى بتقوم بيه الدوله المقرضه لأنها صاحبة المصلحه فى الرقابه على القرض

■■ أستنى ماتتسرعشى فى الرد على كلامى فيه حاجه أسمها منحه وحاجه أسمها قرض وحاجه أسمها وديعه والفرق كبير بين الثلاثه والوديعه هى الفلوس الوحيده اللى بتمسكها نقديه وبتكون علشان عمل توازن فى مخزون العملات الدوليه عندك لكن برضوا متقدرشى تتصرف فيها إلا للضروره القصوى وطبقا لبنود أتفاقية الوديعه ودائما بتكون صعبه ومجحفه

■■ من الآخر علشان بتوع الفيسبوك مابيحبوش التفاصيل أنك تقفش فلوس قروض فى أيدك ده بعينك وبيصل الأمر فى بعض الأحيان لتكوين لجان للأشراف على أوجه الأنفاق لما يقولك قرض ألمانى صحى بقيمة 5 مليون جنيه بيبقى معروف حتشترى كام جهاز وكلهم طبعا من ألمانيا وكام عربية أسعاف ألمانى وكدهوون

■■ القروض الداخليه هى فقط اللى ممكن يبقى فيها دغن وعجن أما القروض من بره فبعيد عن شنبك تقفش فى مليم يامعلم

■■ اللى عاوز يعارض نعلمه أزاى يعارض .... بتكره السيسى ومش طايق صورته أنا أعلمك تعارضه أزاى علشان الناس تصدقك لاتقول عليه حرامى ولا أمه يهوديه ولا عميل أمريكانى ولا بيحارب الأسلام والكلام الأهبل ده ..... السيسى عسكريا متقدرشى تطلع فيه غلطه وعلى مستوى السياسات الخارجيه نظلمه لو قلنا عملاق لكنه يستحق لقب أكبر وأكبر وهنا الفضل يرجع لصبيان عمرو موسى وأحمد ابو الغيط فى مدرسة الخارجيه المصريه أما على مستوى السياسات الداخليه .... أعتبر النت عندى فصل أو مستشعر الحرج لأنى بصراحه مؤمن أيمان تام أن السيسى فشل فى أختيار حد يدير البلد من جوه (( حيعمل أيه وقبل برضوا ماتتسرع وتقفش فى كلامى قولى حيعمل إيه و 90 % من السياسيين الموجودين والسابقين والفلوليين والأخوانيين كلهم ولاد رمه حراميه وأبويا لو عرفت أنه مارس سياسه فى مصر فى يوم من الأيام حتبرى منه ))

 

■■ متبصليش كده روح ذاكر سياسه الأول قبل ماتتكلم مع الناس تخيل السباك ممكن يعمل إيه لو بيولد المدام بتاعتك قيصرى وهو ده اللى أنت بتعمله بالظبط لما تتكلم فى السياسه حتضحى بالجنين والأم والأب والدكتور والممرضه والمستشفى علشان مارك بتاع الفيسبوك يحسبلك لايك فهمت بقى ياعم المعارض وحتفهم أزاى وأنت أساساً وأنت بتتهجى أسمك وبتكتب نحن (( نحنو )) وبتكتب بقول لك (( بئولك )) وبتكتب سيدة مصر الأولى (( سيدة مصر الأوله )) وأتحداك لو تعرف يعنى إيه نون النسوه يامنسون

جهزلى عربية الكشرى ياصلاح أنا زهقت

جنرال بهاء الشامى