الأنطلاقه القويه فى عالم الطعميه

الست أم صلاح ست شديده وجميله وبنت أصول لكن الزمن جار عليها وبتربى فى أيتام أعرفها منذ مولدى وتوفى زوجها وليس لها عائل فقرر أهل الحته يساعدوها من الحوجه وبما يحفظ كرامتها 

أهل الخير أتبرعوا لها بفلوس وفتحت محل طعميه وللضروره أحكام طلبت منى عامل يشتغل معاها ورشحت لها الواد يوسف يشتغل معاها ويخاف عليها وعلى مالها 

أى عمل فيه أخطاء وهذه طبيعه بشريه وفى يوم الواد يوسف لقى صرصار ميت واقع فى عجينة الطعميه وعندك ياعم الحاج وراح الواد يوسف أبن الكلب الناقص واقف فى نص الشارع على الناصيه قدام المحل وقدام الخلق اللى رايحه واللى جايه وبعلو صوته ورايح قايل ألحقى ياأم صلاح فيه صرصار ميت فى عجينة الطعميه 

أم صلاح أتجنت وأتصدمت من تصرف أبن الكلب يوسف وراحت مزعقه فيه خربت بيتى ياأبن الكلب

عرفت بالموضوع وفريره كنت عند أم صلاح وخير ياأم صلاح إيه اللى حصل قالتلى الواد أبن الكلب مجايبك وشورتك ياغراب البيت لقى صرصار واقع فى عجينة الطعميه وبدال ماينبهنى ويكلمنى بينى وبينه جوه فى المحل وكنا رمينا العجينه كلها طلع فضحنى فى نص الشارع وطفش كل زباين المحل إيه الحل دلوقتى ياأبو شوره مهببه

هو ده بالظبط اللى حصل من مصطفى بكرى .... مصر هى أم صلاح اللى بتربى فى شعب من الأيتام العواطليه والناس اللى ساعدوها هم الدول اللى منحتنا قروض ومنح علشان نعرف نشتغل ونقف تانى على رجلينا واللى ينخفى حسه من الدنيا يوسف هو مصطفى بكرى اللى أحنا اللى رشحناه لتولى مركز رقابى فى مجلس النوام وبدل مايساعدها وقف فضحها قدام خلق الله لأنه يملك ميكرفون فى محطه فضائيه

مصطفى بكرى قال للعالم كله ومستثمريه لاتقتربوا من مصر فكلها لصوص حتى وزرائها لصوص .... لا أنكر حتى الآن وجود الصرصار فى عجينة الطعميه لكن طريقة معالجة الموضوع من مصطفى بكرى عن طريق فرش الملايه قدام العالم كله زى يوسف لما وقف فى نص الشارع وفضح أم صلاح ولية نعمته وصاحبة مصدر رزقه 

إبراهيم عيسى فعلها من قبل أيام مبارك وكانت ضربه قاضيه للبورصه لكن مبارك علمه الأدب الشرعى وهشام جنينه أيضا فعلها وأنا قلت لازم يتحاكم مش علشان كشف فساد أبسوليوتلى لالالالا علشان وقف نص الشارع وفضحنا قدام اللى يسوى واللى مايسواش وفعلها مصطفى بكرى وبدل مايشوف كلمتين يقولهم قدام الميكرفون يشجعوا المستثمرين قالهم اوعوا حد يجى مصر ويحط فيها مليم واحد

قلنا فى مقال سابق مش لازم تبقى خاين بطريقه مباشره وممكن بغبائك تكون خاين وتضر البلد اللى بتعيش من خيرها وهكذا فعل ابراهيم عيسى وفعلها هشام جنينه وأخيرا مصطفى بكرى ويفعلها وائل الأبراشى يوميا  ولن يكون الأخير إلا إذا ضربنا بيد من حديد على رأس كل من يحاول عرقلة مسيرة هذا البلد الآمين

حاكموا مصطفى بكرى بنفس أتهامات هشام جنينه وإلا أفرجوا عن هشام جنينه واعتذروا له وأعيدوه لمنصبه لو لم تحاكموا مصطفى بكرى ماسح ولاعق رخام القصور 

عندنا وفى كل دول العالم حاجه أسمها المتحدث الرسمى أو المتحدث الصحفى وبيقبضوا فلوس قد كده من دم الغلابه يبقى يلزمنا قانون يمنع النواب والوزراء وأصحاب المناصب الرفيعه من الظهور الأعلامى على أن يتولى هذه المهمه المتحدث الأعلامى وأحنا مش أقل من النادى الأهلى أيام العملاق صالح سليم مكنشى بنى آدم فى النادى الأهلى يقدر يتكلم قدام الأعلام وأنظروا لحال الزمالك على يد مرتضى منصور ملك الفضائيات وقارنوا 

الله يخرب بيت خالد حنفى على بيت مصطفى بكرى على بيت جنينه على بيت عيسى على بيت اللى حطهم فى سكتنا

أنا ببيع كشرى ياصلاح على الناصيه

       جنرال قرفان الشامى