طريقة عمل كائن أخوانجى فى البيت

طريقة عمل كائن أخوانجى كاره لنفسه والمجتمع من حوله ويسهل توجيهه لخدمة أهداف الجماعه وضد مصالح الوطن

المقادير وأكتبى ورايا ياست البيت

واحد كيلو أنسان طبيعى عنده ظروف زى أى حد عنده ظروف وكلنا عندنا ظروف

10 طن عوامل خارجيه

ربع كيلو عاطفه دينيه

2 كيلو خلل فى تكوين الأسره أو حالات وفاة العائل أو ظروف ماديه طاحنه أو أنفصال الأب والأم بأى شكل

نصف كيلو ظروف طبيعيه

5 جرام ملح بشرى

طبعا بعد صدمتنا فى سلوكيات الأخوان بعد أنتفاضة 30 يونيه كلنا تسائلنا فى أنفسنا كيف يصل تفكير أنسان لهذا الحقد والغباء وكره المجتمع وسهل التوجيه وبالعربى مهما قلت حوله يمين طلاق بالتلاته مايقتنع

بعضنا وصل أو أقنع نفسه أنهم يتمتعون بالغباء أو بلا عقول لكن الحقيقه أنهم غير كذلك وأستهدى بالله وتعالى وأنا حقنعك بأساس المشكله

أحد أهم علوم أجهزة المخابرات هو التحكم العقلى بواسطة آخرين أو كما يطلق عليه غسيل المخ وكنت شرحت لحضرتك بالتفصيل فى سلسلة مقالات اللامعقول فى عالم العقول المخابراتيه كيفية أجراء عملية غسيل المخ ومن هنا حنبدأ كلامنا ونحلله بس تعالى الأول أعرفك أبسط قواعد عمليات غسل المخ فى هذا المقال

https://www.facebook.com/Genral.Bahaa.ELshamy/posts/1932466340329105

نيجى بقى لطريقة عمل كائن أخوانجى وطبعا حعتمد أنك قرأت المقال ومضحكتش عليا ولا على نفسك ونقول أن فيه أنسان على الأبيض لسه مفيش حاجه لعبت فى صواميل مخه ولسه طالع من علبة المصنع ولسه على الزيرو وصواميل مخه بربطة الكمبيوتر وعايش فى مجتمع عادى ومعندوش أى ميول أنحرافيه عقليه وأستلم بقى عندك ياعم الحاج وأرمى الكائن ده فى المجتمع

تصرفات من معظم أفراد الداخليه قد تدفعك للأنتحار

مدرس أبن حرام كل شغلته يقلب قرشينات

مدرس أبن حرام شفته وهو بيتخانق مع زميله المدرس زيه ويحلف بالله كدب ويشتكوا بعض بالكدب وصراع جوه المدرسه أمام الطلبه

موظف فاتح درجه والله أعلم اللى بيرميله ورقه بعشرين جايبها منين والحمد لله تم تسعير الرشاوى فى بلدنا وأصبحت هناك أسعار لكل خدمه

مش حتكلم على المستشفيات والكلام الفاضى ده علشان منزعلشى مننا علية القوم

مهندس علشان تبنى دور ولا دورين لازم يقلبك

وترزى بيسرق منك ربع القماش وتاجر لو طال يقطعك ويبيعك مش حيتأخر

ومحامى قاعد مستنيك ومستنى بلاويك

وظابط فى الداخليه هو ربنا الأعلى

وأمين شرطه عامل زى الحلمات الصناعى مش عاوزك تمشى من قدامه وجيبك فيه حباية رمل

بإختصار تلاقى الدنيا حواليك كلها ظلم فى ظلم لكن ربنا فوق فى السماء وله جنود فى الأرض تقوم تتهف فىا عقلك من هذا المنطلق وتقول أشتكى علشان أجيب حقى بالأدب وبالزوق

تروح التموين تشتكى تلاقى التاجر طلع من عندهم بيطلع لك لسانه وانت اللى غلطان بتشتكى مين لمين تقوم تصعد شكوتك تلاقى نفس الحوار لحد لما تتقفل فى وشك وتتهف فى عقلك وتروح لمجلس النوام علشان الناس اللى فيه تجيبلك حقك تستفاجأ أنهم يكملوا عليك ويمصلحوا من وراك تسخن يانجم وتروح للفضائيات ويقابلك مذيع أو صحفى وبرضوا يمصلح من وراك حرارتك ترتفع وتسخن أكتر وتروح لكبار البلد وبرضوا تلاقى نفس المصير ومفيش قدامك غير أنك تقابل رئيس البلد لكن مين حيوصلك وأنت عديت على كل تروس البلد ومش منطقى رئيس البلد حيقابل كل يوم 104 مليون مظلوم فى البلد

توصل لمرحلة الأحباط وشبيك لبيك تلاقى مشاكلك بتتحل زى الحلاوه وأزاى متقوليش مع كلمتين طبطبه على كتفك وكلمتين فى ودنك البلد دى كلها كده وحتفضل كده وأى مشكله حلها بالفلوس وطالما فلوس ملكشى دعوه أحنا بنعرف نحل مشاكلنا وطبعا تسأل أنتوا مين يقولك أحنا ناس زيك وبتوع ربنا وأسمنا الأخوان المسلمين

طبعا بيحلوا أى مشكله لأنهم منتشرين فى كل حته وعارفين كل واحد يشتروه أزاى وطالما حلها بفلوس بيعرفوا يشتروا التخين

أنا شايف أنك أتكعبلت منى وصواميل دماغك فكت من بعضيها وعلشان كده لازم أنهى كلامى معاك بكلمتين

الفساد بيخلق الأخوان والأخوان فساد وللقضاء على الأخوان وتبوير الأرض الخصبه التى ينمون فيها عليك بالقضاء على الفساد غير كده بنضحك على بعض لأن لو الدنيا ماشيه طبيعى مش حتلاقى تنظيم غير طبيعى ينموا وينتشر فى أرض طبيعيه

أقتلوا الفساد وأبدأوا برؤوس الأفاعى يسهل بعد ذلك القضاء على جسد الفساد ...  أختاروا أعضاء برلمان على أسس صحيحه تقتلون الفساد لكن كيف نختار والجسد أصلا عليل وبيختار نوابه بأزازة زيت وبطانيه ونص كيلو لحمه

مش مسامحكم يامصريين على أختيارتكم الموجوده تحت قبة البرلمان

الشيف بهاء الشامى