اللامعقول فى عالم العقول رقم 12

تبقى عبيط لو فاكر أن دوله زى أمريكا رغم أى معاهادات ورغم أى أستقبالات ورغم أى أحضان وقبلات أمام الكاميرات ممكن علشان خاطر سواد عيون رئيسك تتخلى عن مخططتها وأحلامها اللى أنفقت عليها مليارات

أنتهى عصر المواجهات المباشره التى تكلفهم أرواح وليه أضحى بحد من عندى وانت عندك اللى يقوم بالمهمه دى وهنا عليك ترجع لمقال اللامعقول فى عالم العقول اللى قلتلك أحتفظ بيه لأنه حيكون مرجع لنا فى أكتر من ملف

طبعا أكيد فاكر الفقره اللى أتكلمنا فيها فى هذا المقال فى موضوع خلق الجماعات العقائديه وكيفية توجيهها عن بعد وضربتلك مثال بالسادات فلم تكن أمريكا بحاجه لأصدار أمر مباشر والتورط فى قتل السادات لكن زى ماوضحتلك فى المقال هى بتقوم بالمهمه دى عن بعد وظاهريا أيديها نظيفه لكن مخابراتيا أيديها ملوثه بدماء السادات

http://genralbahaaelshamy.blogspot.com.eg/2017/05/blog-post.html

تبقى عبيط لو فاكر أن الأكونتات اللى بتختلق الأشاعات شغاله كده شليطى مليطى بالعكس وزى ماوضحتلك فى نفس المقال اللى بيقوم على خلق الأشاعات علماء طب نفسى وبعلوم وطرق مدروسه وعلميه وفيديو زى بتاع الجعجاع أحمد موسى رغم عدم التأكد من صحته عمل المطلوب وساب أثر نفسى عميق وسط قواتنا وتبقى عبيط لو مش فاهم أن كل ده مش حرب بالوكاله

تبقى برياله لو فاهم أن أكونت زى بتاع جمال سلامه واللى زيه شغالين كده شليطى مليطى دى اكونتات شغاله طبقا لخطط مدروسه وعاوزك تبص على متابعين جمال سلامه ورغم أنهم وطنيين وناس محترمه لكن ممكن يقوموا بأى عمل عدائى ضد بلدهم نتيجة غسيل المخ اللى عمله جمال سلامه واللى زيه ولازم تبقى فاهم أن الجبهه االداخليه تحطيم معنوياتها لايقل عن هزيمة القوات فى المواجهه وتبقى خيبه لو مش فاهم أن دى حرب بالوكاله

 

خيبه لامتكونشى فاهم أن آيات عرابى وألاضيشها واللى بتعمله على صفحتها وأكونتات اللجان الألكترونيه زى لبانه صالح ومرهم الشرقاوى والغلبه لمن يملك الزتونه والعبره بالخراطيم وصاصا راجع وكناصة الصراصير وكناص البراغيت وصائد الفيران وندهت عليك ياطه والبسبوسه حبيب الملايين والهجاص الغامض وغفير الأهرامات وفاضح الأسرار وفارس بلا حمار والحاضر الغائب من الفصل وحارس البتنجان وكلنا رجال الطرشه ومحسن بيه منفاخ ومحمد فشيخ و تعلوب تعاليبو والحرامى علاء الدين وصائدة الصراصير كلها حرب بالوكاله ومش لازم تكون البهايم دى فاهمه هى بتتساق أزاى لكن انت لازم تبقى فاهم أنهم بيتوجوها عن بعد وبدخل أكونت يعلق عليه وينفخ فيه ويمجد فى عبقريته علشان أنفخه معنويا لكى يستمر فى نهمه فى البحث عن أى معلومه شاذه وغريبه وممكن أحطها قدامه بأكونت تانى على الخاص وهو بهبله ينشرها وأبقى حققت غرضى

عملية الواحات نزلت البيضه عليك وكله عاوز يعمل فيها وكالة أنباء وقريب من المطبخ السياسى ومش قادر تفهم أن صمت الداخليه بيقولك لو سمحت الموضوع أكبر منك وياريت تحط جزمه فى حنكك وتسكت .... أى نعم عندك لهفه أنك تعرف الحقيقه لكن فيه حقائق مش لازم تعرفها زى حقائق كتير ماتعرفشى عنها حاجه ولا تقدر تجد لها تفسير زى الأسراء والمعراج ومش لازم كل أسرار البلد تبقى على بوستات الفيسبوك

مشكلتك أنك البعيد عاطفى وأعلنت الحزن وغيرت صورة البروفايل وكتبت على صفحتك حداد وللأسف ماتعرفشى أنك كده حققت غرض الأرهابيين وبتقولهم رسالتكم وصلت وأنت بتصرفاتك العاطفيه اللى أعلنت هزيمتك واعلنت نصرهم عليك ولو فكرت من غير عواطف كنت عشت عادى وتعمل مش فى دماغك ويموت واحد فيه غيره ملايين وتعمل وانت بتمثل عدم أهتمامك لكن من جواك بتتقطع وتسيب بتوع السياسه يستغلوا الموقف صح

مسألتش نفسك لما محرك البحث جوجل تمنه 76 مليار دولار يبقى الفيسبوك بكام وليه بيوصلك بالمجان وهل الأعلانات العبيطه اللى عليه تغطى مرتبات الهاكرز القائمين على حمايته وخيبه لامتكونشى فاهم أن الفيسبوك عمل مخابراتى معلوماتى وحرب بالوكاله وأنت عليه بيلعبوا بيك الكوره وأعتقد دلوقتى فهمت ليه بتعامل مع الموقع ده ببرود ومابردش عليك على الخاص

مسألتش نفسك ليه الفيسبوك عمل الخاص والشات ومسألتش نفسك الفيسبوك اللى سد كل الثغرات ليه سايب لحد دلوقتى ثغرات الشات والخاص ... خيبه بقى لامتكونشى فاهم أنها مقصوده وخيبه لامتكونشى فاهم ليه الفيسبوك مانع نشر صليب هتلر المعكوف ومانع نشر كلمة مــــــراون الــبـــرغـــوثـــى وعلشان كده كتبتها بالطريقه دى وخيبه بالروبه لامتكونشى فاهم أن الفيسبوك عمل مخابراتى وحرب بالوكاله وأديتك كذا مثال قبل كده ببوست لو الفيسبوك كان موجود أيام حرب اكتوبر وعملتها معاك بشكل فكاهى

عارف أن مقال مش حيحوق فيك وحتفضل زى ماأنت بكل معتقداتك العفنه المنتنه أن الأرهابيين فى سيناء وجوه البلد أرهاب علشان مظلومين مش حرب بالوكاله والأعلام المملوك مش موجه بطريق غير مباشر وان الفيسبوك موقع للتواصل الأجتماعى وصلة الرحم لكن كتبته مش علشانك ولا علشان اللايك المعفن بتاعك اللى مايجيبشى حق سيجاره من اللى حرقتهم وأنا بكتب المقاله دى أنا بكتب علشان وعد قطعته على نفسى لأمى وعلشان لما أقف بين آيادى ربنا ويسألنى عملت إيه لبلدك أعرف أرد وأقووله حاولت أفهم الناس لكن الطبع غالب

حرام عليكم بلدكم وملعون ميتين أم اللايك والشير على ميتين أم اللى أخترعهم واللى خلاكم تعبدوه بهذه الطريقه

الملف ده محتاج كلام كتير لكن أصابعى بدأت تؤلمنى لكن لنا لقاء آخر متى شاء الله

جنرال بهاء الشامى