الملف الليبى وخطورته على مصر رقم 17

الصراع السياسى فى أمريكا بين الحزبين الكبيرين وبين ترامب وخصيمه له تأثير بالغ الأهميه على الملف الليبى

أمريكا على لسان ترامب أعلنت ترحيبها بمبادرة أو إعلان القاهره كحل سياسى للأزمه الليبيه لكن فى الوقت نفسه نجد تصريح لبنبونى يقول فيه حان الوقت الآن لأن يتحاور الليبيون وأن ينتهى التدخل الروسى أو غيره فى إشاره للتغاضى الأمريكى عن التدخل التركى معاقبة للتدخل الروسى ومن هنا نستطيع الجزم أن لأمريكا موقفين تريد إستقرار ليبيا لكن بدون تدخل روسى

قلتلك فى سياق تحليلات الملف أكثر من مره أن غرور حفتر وتصرفاته الفرديه تخيف حلفاءه فقرروا تجميده أو تحويله لما يطلق عليه جثه سياسيه ... ديهدى يعنى إيه جثه سياسيه

يعنى موجود لكن تم تهميشه وبدأوا يستبعدونه من حسابتهم بعد تصرفاته الفرديه وهو شعر بكده لذلك يحاول الصمت وأتبع نظام الأنتظار السياسى وطبعا حيحاول يلم القبائل حوله لكن السيسى سبقه فى زيارته للمنطقه الغربيه يوم ماعمل الخط للواد الجعر أبن تنزيله جوز الأوزعه أمينه

خطة الواد ترامب سحب 9950 عسكرى أمريكى من ألمانيا شجعت الكل يتسابق لأحتلال مكان أمريكا اللى لو الواد ترامب نجح حينفذ خطته أنها تاخد مكانه على الأقل سياسيا ويمكن ده اللى صحصح البت ميريكل متأخر وخلقت لنفسها دور فى ليبيا

لازم تكون فاهم ليه أبو بنطلون رصاصى حدد الخط الأحمر بسرت والجفره لأن مصر وروسيا يهمهم السيطره على المنطقه دى والباقى كله سلطات وشكليات

معنى أن أبو بنطلون رصاصى الأقرب لليبيا من الجعر التركى يتكلم بهذا الحسم والوضوح بالتدخل العسكرى فهو أولاً تهديد للجميع اللى حيقرب من حتتى حاكل وشه وأنط فى كرشه وكانت إستفزاز للجعر التركى بتحريك قطع عسكريه تركيه بشكل واضح نحو ليبيا وليس تحت راية الناتو وبكده يظهر أنه مستعمر مش مجرد داعم للسراج علشان الورقه اللى وقعوها مع بعض

مش ملاحظ أن من بعد التهديد المصرى أن فيه هدوء عسكرى فى الملف الليبى وده له أحتمالات أما أن كله بيعيد ترتيب أوراقه بعد مصر مأاعلنتها بوضوح الحته دى تخصنى أو أن فيه مساعى للجلوس على مائدة المفاوضات

تونس والجزائر والمغرب بدأوا ياخدوا بالهم أن وجود الأستعمار التركى فى ليبيا فيه تهديد مباشر لهم وخصوصا أن الدول الثلاثه عندهم تيارت يمينيه متشدده حيقدر يحركها الجعر التركى زى ماقلتلك عن طريق الحضانات السياسيه ويبتدى يخلق بهم قلاقل فى الدول الثلاث وتونس بالذات بدأت تتحرك فعليا فى القصه دى لكن الواد تيبون لحد لحظة كتابة المقاله ملتزم بالصفريه الجواريه والحياد السلبى (( شرحنا فى أكتر من مناسبه النظريه الصفريه ))

فرنسا دخلت على الخط لسببين الضغط على الجعر التركى فى مسألة المساجد الفرنسيه وإحراج أمريكا أكبر راس فى حلف الناتو اللى تورأيا بتتحرك تحت أسمها وعاوزه تقول للعالم خلوا بالكم أمريكا مطرمخه على تورأيا وأنا حتعامل بشكل شخصى فى سواحل المتوسط وكده الناتو والأتحاد الأوروبى  حيخسروا أقوى بحريه فى جنوب المتوسط وخلى بالك قبل ماتسن سنانك عليا وتقولى أمريكا أقوى من فرنسا فى جنوب المتوسط حقولك خطوط أمداد فرنسا أقوى وأسرع من أمريكا رغم ضخامة البحريه الأمريكيه فى المنطقه وترامب عاوز ياكلها فى ليبيا من غير مايغرم جيشه مليم

الصراعات دى كلها تضعف من موقف الجعر التركى اللى ممكن أمريكا تبيعه لو تقاسمت مع مصر وروسيا منطقة الهلال النفطى

لكل هذه الأسباب حضرتك ملاحظ أن حنفى الشرق الأوسط مقدرشى ولا حيقدر يعدى الخط الأحمر اللى رسمه أبو بنطلون رصاصى لأن قراره مش بإيده ده قرار اللى بيحركوه ولنفس الأسباب تحول حفتر الحفتور لجثه سياسيه فى إنتظار الكبار يتفقوا على إيه بشرط مايطلعوهش من الليله

آه نسيت أقولك أن المنطقه اللى مسيطر عليها السراج موقعها ممتاز سياسيا فقط لكن عمليا يبلها ويشرب ميتها قبل النوم لأن النفط الليبى متمركز فى الجنوب الشرقى والغربى والمصافى والموانى متمركزه فى الشمال الشرقى عند الخط اللى حدده أبو بنطلون رصاصى   

الصراع فى ليبيا صراع على أكبر أحتياطى بترولى فى العالم ومتنساش أن ليبيا لما تنتهى مشكلتها حتتحول لأكبر مصدر للغاز لأوروبا الجنوبيه لأن سواحل ليبيا فيها غاز بالعبيط وأحنا يلزمنا الغاز ده نسيله عندنا وأحنا اللى نصدره لأوروبا لأن مش من مصلحتنا ليبيا تسيله بنفسها وتصدره لجنوب أوروبا لأنها أقرب مننا وتكاليف النقل أقل من عندنا يعنى ممكن يخسرونا الجلد والسقط فى ليلة الغاز وعلشان كده كان أبو بنطلون رصاصى بيتكلم بشكل قوى وحاسم ولمح بشكل واضح للتدخل العسكرى لو حد قرب من منطقة الهلال النفطى وبصراحه الليله تستاهل التضحيه بتكاليف التدخل العسكرى لأنها بالنسبه لنا حياه أو موت وياروح مابعدك روح

بعد كل ده وزى ماحضرتك شايف يطلع جاهل وحمار سياسى يقولك السيسى فرط فى غاز مصر وباع طراطير وصفافير للسعوديه وأنا بسألك بذمتك بعد كل التوضيح بالشفافيه دى واحد بيدور على مصالحك وسبوبتك فى دوله تانيه حيفرط فى اللى فى بلده وتحت أيده طيب كان باع الغريب بدل مايبيع بلده وأهو لو باع الغريب محدش من بلده حيلومه

زيارة الواد خلوصى وضجتها على تليجرام وعلى السريع زى ماقلتلك المقصود منها الرد على حركة الواد ماكرون يعنى بيقول لماكرون خلاص مش حنتحرك فى المتوسط بأسم الناتو علشان متقعدشى تزعق وتهلل حنتحرك بموجب أتفاقية دفاع مشترك وبرضوا مش حيقدر زى ماقلتلك على تليجرام يتدخل بشكل مباشر لكن ممكن قوات السراج تحاول جس النبض وتتحرك شرقا لقياس رد فعل مصر لكن طبعا بدون الأقتراب من الخط المرسوم وممكن يكون فيه دعم بحرى من تورأيا وهنا ممكن الليله تكبر وندخل فى مشكله

لازم تكون فاهم أن تورأيا بتتحرك بحذر خوفا من خسارة الداعمين لأن الداعمين لو حسوا منه بالخطر أو اللعب الفردى علشان يمصلح مش حيرحموه

فيه تويته لمصطفى بكرى وطبعا مصطفى مقرب من المطبخ فيها رساله زى الزفت لأبن تنزيله وكده مصر والسعوديه والأمارات قرروا يدخلوا ليبيا عسكريا تحت مسميات عديده ولو خدت بالك من كلمة السيسى فى المنطقه الغربيه حتفهم منها كتير يعنى مش حنتوحل فى الملف الليبى كدوله غازيه زى ماأنت فاهم لكن حندعم القبائل وندربهم ونمدهم بالسلاح وقابل بقى ياعم صحاب البلد

زى ماالسياسه فن مش هز أكتاف برضوا المعارضه فن مش شيطنة تصرفات وخلاص وللأسف الشديد وآسف فى التعبير مصر مفيهاش معارضه تقدر تعتمد عليها لو السيسى أنحرف عن المسار

يووووه نسيت أقولك أن معندناش برضوا حياه حزبيه ولا سياسيين تقدر تعتمد عليهم كلهم شوية مصلحجيه بيتمحكوا فى الحاكم لتخليص مصالحهم

الكلام لسه كتير لكن بعد جروب التليجرام مبقاش ليا نفس أكتب مقالات طويله

جنرال بهاء الشامى