الصقر الذهبى رقم 6

كنا قد توقفنا وأياكم فى الحلقه رقم 5 عند الصور والملصقات التى كانت قد أنتشرت فى منطقة القاهره والجيزه وموافى أتصل بالصقر وحكى له عنها وطلب الصقر جمع التحريات عنها لحين حضوره من أمريكا فى رحلته مع مبارك واليوم نستكمل معكم ماتوقفنا عنده

 كانت رحلة فاشله لمبارك فى أقناع الأداره الأمريكيه بحسن إدارته لمصر والتسويق أن اليمين الدينى لو حكم مصر سيقودها للهلاك


بعيدا عن تقرير موافى ومعلوماته المخابراتيه فقد حامت الشبهات وقتها حول أحمد عز وأنه فعل ذلك بتعليمات من جمال مبارك والهدف الوقيعه بين صقرنا الذهبى ومبارك نفسه اللى كان مؤمن بوجوب وجود عمر سليمان بجواره فى هذه الأوقات العصيبه ومصر مقدمه على أنتخابات نهاية 2010 والأستعداد لتعديل الدستور

حامت الشبهات أيضا لكن فى أروقة الأجهزه المعلوماتيه حول من تم تدريبهم خارج مصر من شباب مايطلق عليهم 6 أبريل حاليا وشباب الثوره خصوصا وأنهم كان عندهم شغف بضرورة سقوط نظام مبارك وطرح بديل يحظى بقبول شعبى بين كافة أطياف المصريين وخصوصا أن نجاح الصقر فى العديد من الملفات جعل له ظهير شعبى لابأس به وخصوصا وأنه يعرف كل صغيره وكبيره عن البلد ولديه خبره عريضه وأحترام دولى

فوتك فى الكلام كان فى الوقت ده أو قبلها بقليل كانت تشكلت مايطلق عليها الحمله الشعبيه لدعم عمر سليمان رئيساً للجمهوريه حينها فى محاوله للقضاء على مشروع التوريث فصدر وقتها بيان أكيد كلنا فاكرينه يؤكد على تأخر الحاله الصحيه لمبارك ومن حق مصر أن تنال مكانها الطبيعى بين مصاف الدول المتقدمه وباقى الكلام الأنشائى وبصراحه بحثت عن البيان فلم أستطيع العثور عليه على النت لكن أنا فاكر مضمونه وخلاصته تأييد للصقر الذهبى كرئيس للجمهوريه خلفا لمبارك

كان البيان ملحوظ فيه أنه فيه صيغة مبالغه إنشائيه فى تعظيم دور الصقر الذهبى بطريقه ملفته للنظر جدا وبصراحه البيان ده موصلشى لهدفه لأن مبارك فهم اللعبه وححكيلك اللى حصل بعد شويه 

أرسل موافى تقرير للصقر فى أمريكا عن الجهات اللى ممكن تكون خلف البيان والصور وشعر الباشا أن أنتشار الصور والبيان ممكن يعمل حالة بلبله فى البلد وخصوصا أن الجو مكهرب وهو لم يسعى للمنصب فملوش داعى سرعة الأنتشار فأصدر تعليماته بأزالة هذه الصور فورا ووقف النشر وكانت جريدة الدستور والمصرى اليوم بدأت الطباعه والخبر موجود فى الصفحه الأولى والتانيه

نزلت أجهزة الدوله السياديه فورا لمطابع الجرائد ولم تسمح بالطبع وأعدمت النسخ التى تم طبعها وتم حذف الخبر من تلك الجريديتين (( خلى بالك أشمعنى الجرايد دى اللى كانت مصممه على النشر ووصلها البيان وقارن بين أهدافهم دلوقتى وأهدافهم زمان وأنت تفهم  أن ديل الكلب عمره مايتعدل ))

طلب الباشا من زيكو لقاء عاجل مع الرئيس فى محل أقامته بأمريكا لأمر هام وفورا تم اللقاء ودخل الباشا على مبارك وقدم له تقرير بما يحدث فى مصر وماوصله من معلومات وقال الباشا أنا مندهش ممن يحاولون الوقيعه بينى وبين حضرتك فرد مبارك هل أنت متصور ياعمر بعد العشره اللى بينى وبينك وثقتى فيك أنى ممكن أبص لحاجه زى كده أو أتهز لتهريج العيال وأختتم مبارك كلامه للباشا ياعمر أنت من أخلص وأوفى الرجال أنت (( رجل فى زمن الأندال )) وأرجوك لاتهتم بمثل هذه الحركات

أعتقد دلوقتى بدأت تتضح بعض الأمور أمامكم

أنتهت هذه المشكله والأزمه لكن لم تنتهى محاولات الوقيعه بين مبارك والصقر حتى قبل رحيل مبارك بساعات وأبقوا فكرونى لو نسيت أتكلم فى النقطه دى

كان يوسف غالى بيجهز لقانون الضريبه على العقارات وطلبه الباشا فى مكتبه وظل يناقشه لمدة ساعه بالمكتب فى ضرورة أعفاء السكن الخاص من الضريبه خصوصا أن الناس على آخرها ومش مستحمله (( الدنيا كانت ماشيه عسل أيام مبارك  ((

كان الباشا طبيعته صوته واطى جدا ومش مسموع لكن فى هذا اللقاء كان الصوت طالع بره المكتب خصوصا مع أصرار يوسف بطرس على موقفه لكن غالى وافق فى النهايه وقبل الخروج من المكتب بقليل

بعد يومين صدر القانون رغم أتفاق الباشا مع بطرس غالى رغم أن مبارك أستمع لنصيحة الباشا بتأجيل أصدار القانون وكلف مبارك مفيد شهاب بعدم تقديم القانون للمجلس لكن هناك يد خفيه أصرت على صدور القانون وخصوصا أن اللى كان متبنى القانون لجنة السياسات بالحزب الوطنى

بدأ نجم أحمد عز يلمع قوى قوى وبدأ يدير البلد فعليا فأستدعاه الباشا فى مكتبه بالمخابرات وقعد معاه وقاله عندى معلومات أنكم حتظبطوا الأنتخابات وأن الأخوان رفضوا يشتركوا معاكم بـ 30 كرسى وطلبوا 120 كرسى لكن معلوماتى أن فيه أتفاق بينهم وبين بعضهم  يضغطوا عليكم وآخرهم 45  كرسى ماتخلوها نص تظبيط  لكن أحمد أعز رفض نهائيا وجود أى معارضه بالبرلمان وقال مصر قادمه على مرحله تاريخيه مفيش فيها مكان للمعارضه الخاينه وأكيد عند سعادتك علم باللى بيتدربوا بره ولازم نفوت عليهم الفرصه فكشر الباشا حواجبه وقال له بطريقتكم دى حتودوا البلد فى داهيه

طبعا أحمد عز لما كان بيفاوض الأخوان على عدد الكراسى  كان عنده إصرار على إفشال المفاوضات لذلك أصر على 30 كرسى فرفض الأخوان بشده ففشلت المفاوضات لأنهم كانوا مظبطين نفسهم على  45 كرسى علشان تبقى فاهم الدنيا كانت ماشيه أزاى بين الأخوان والنظام الحاكم

 أنطبخت الأنتخابات وزادت حالة الأحتقان جدا فى المعارضه وتم تشكيل البرلمان الموازى (( فاكرين مصطفى بكرى ولا نسيتوا )) ولو فاكرين كانوا عملوا مؤتمر صحفى على سلم مجلس الدوله واللى أذاع بيانهم مصطفى بكرى أكيد كده أفتكرتوا وعرفتوا مين مصطفى بكرى رجل كل العصور والأنظمه وحنرجع لمصطفى بكرى تانى لما الأخوان ينجحوا

كان الباشا رافضا لنتائج الأنتخابات وقدم لمبارك تقرير عن كل اللى حصل فى الأنتخابات وفى آخر التقرير قال لمبارك أن الأنتخابات دى بتقوى شوكة الدعوات اللى على الفيسبوك للتظاهر يوم 25 يناير

طلب الباشا من مبارك تأجيل خطابه فى أفتتاح مجلس الشعب أو عدم الذهاب وقاله تأجيلك أو عدم ذهابك حتفهمه الناس أنك مش موافق على اللى حصل وخليه متأجل لحين فصل المحكمه فى الطعون المقدمه وكده ترفع شعبيتك قدام شعبك وتبقى رميت الكره فى ملعب القضاء

سأل مبارك الباشا وقاله عندك معلومات بتزوير الأنتخابات ياعمر فرد الباشا عندى معلومات ووثائق وتقدر تتأكد من حبيب العادلى والمجلس بصورته دى فيه كارثه على البلد فرد مبارك أنت عارف ثقتى فيك ياعمر ملهاش حدود نعمل أجتماع بكره فى الأتحاديه وتقنع الناس بوجهة نظرك فى التأجيل

راح الباشا الأجتماع وكان فيه أحمد فتحى سرور وأحمد نظيف وصفوت الشريف وأحمد عز وجمال مبارك وزكريا عزمى وحبيب العادلى مقدرشى يحضر وترأس مبارك الأجتماع وقال فى أوله عمر سليمان  طلب منى تأجيل خطاب المجلس  لحين فصل محكمة النقض  فى الدعاوى المقدمه لها بإعتبار أن الأنتخابات دى حصل فيها تزوير (( خلى بالك مبارك بيفتح سكه لشلة أبنه تدافع عن نزاهة الأنتخابات ((

أحمد نظيف قال ليس هناك دليل على تزوير الأنتخابات واحنا محتاجين لبرلمان قوى فى هذه المرحله لتمرير قوانين الأصلاح الأقتصادى عند مناقشتها ومش حنفضل نماطل فى صندوق النقد طول عمرنا  وبصراحه ده أقوى مجلس نواب تشهده مصر وكل التيارات ممثله فيه حتى لو تمثيل رمزى وأنا أؤيد ألقاء الخطاب فى موعده ومش موافق على التأجيل فنظر جمال للباشا نظرة شماته

أتكلم الأزعر أحمد عز وقال هذه الأنتخابات لم تشهد حالة تزوير واحده وهذا البرلمان نتيجه طبيعيه لتجديد دماء الحزب ونجاح ملحوظ لكوادره الشابه الجديده والمجهود الذى بذلوه فى الأنتخابات لقد أستخدمنا فى هذه الأنتخابات أحدث التقنيات والكمبيوتر لكى نخرج بهذه النتيجه وليس عيبا فينا فشل الآخرون لقد نجحنا لنقل تجربة حزب العمال البريطانى لمصر وكيفية أدارة معركته الأنتخابيه

كان كلام كل الحاضرين يصب فى هذا الأتجاه وكلهم رفضوا فكرة تأجيل الخطاب فرجع جمال بظهره على كرسيه وسند ظهره وبص لوالده نظرة ثقه

قال مبارك بعد ماكل واحد سمع الكلمتين اللى حافظهم أيه رايك ياعمر فى الكلام اللى أتقال

رد الباشا وقال أنا لا أعرف كمبيوتر ولا برامج ولا تجارب مستورده من بره وماليش فى الكوادر الشابه وكل اللى أعرفه أن المجلس عامل زى الغرفه المغلقه والمعارضه هى الشباك والشعب بيشوف اللى بيحصل داخل الغرفه من الشباك ولو قفلتوا الشباك ستزيد حالة الأحتقان والبلد كمان كام شهر داخله على كارثه وفيه دعوات للتظاهر على الفيسبوك وبصراحه الناس الغلابه أصيبت بالخنقه من قفل الشباك وبصراحه أنا خايف الناس تنفجر

كمل الصقر كلامه موجها كلامه لمبارك بصراحه ياريس حضرتك متخيل شعبية الروس الكبيره اللى سقطت وأرضيتها فى الشارع ومع ذلك سقطت فقاطعه جمال وقال مفيش تزوير والأنتخابات لم تزور وعيب نشوه أنجاز تاريخى ولايصح نشوه التجربه الديمقراطيه الوليده ونعطى الفرصه لخصومنا يقولوا الريس معترف بتزوير الأنتخابات علشان كده أجل خطابه

فرد الصقر الذهبى وقال أنا مدير المخابرات ولما أقول الأنتخابات أتزورت تبقى أتزورت (( إحنا مش بنبيع كشرى ياصلاح ((

لاحظ مبارك أن رجل مخابرات مصر بدأ يتعصب على أبنه وهو حريص على عدم غضب الصقر ولا يريد أن يخسره وأيضا مش عاوز يدخل فى صدام مع أبنه فطلب راحه لمدة ربع ساعه نشرب فيها حاجه أو عصير

 قلتلك قبل كده الباشا كان بيحب عصير البرتقال وقلتلك شيل النقطه دى معاك ياسمسم ياأبو البنات فخرج الباشا فى صالون جانبى وطلب عصيره المفضل لكنهم أخبروه أن القصر مفيهوش عصير برتقال طازج فقال خلاص نبقى نجيب مشروبتنا معانا من بيوتنا لما نكون جايين الأتحاديه فضحك أحمد سرور وقال هاتوا لعمر باشا عصيره اللى بيحبه من عربيتى أنا عارف أنه بيحبه وفعلا جابو العصير من عربية أحمد سرور وانتهت الأزمه أو الفصل البايخ اللى كانوا عاوزين يعملوه مع الباشا

دخل الجميع تانى بعد ربع ساعه غرفة أجتماعات مبارك فسأل مبارك الباشا أتمنى تكون هديت ياعمر بعد ماشربت عصيرك فرد الباشا أستوردوه حضرتك من عربية أحمد بيه سرور من خارج القصر وقالها بتريقه ففهم مبارك ماحدث وقال لعمر تعالى فى الكرسى اللى جنبى  المهم أنك شربت عصيرك

أفتتح مبارك المناقشه مره أخرى وقال موجها كلامه للصقر عاوز أيه بالظبط ياعمر فقال الباشا تأجيل ألقاء الخطاب لحين فصل محكمة النقض فى الطعون خصوصا أنهم أكثر من 500 طعن وكفيلين بفقد المجلس شرعيته لو تم الفصل فيهم لصالح المعارضه 

فقال صفوت الشريف معنى كده أننا حنسمح للمعارضه بـ 45 % من كراسى البرلمان أنا مع سيادتك أنه حصلت بعض التجاوزات لكن متنساش ان المعارضه هى اللى قاطعت المرحله التانيه وكان ممكن ينجح لهم أى عدد حتى لو بسيط لكن هما اللى قاطعوها 

خد أحمد سرور الكلام من على طرف لسان صفوت الشريف وقال انا شخصيا حاسس أنى مش حكون تحت قبة برلمان بل حاسس أنى حكون تحت قبة الحزب الوطنى داخل البرلمان ولابد من وجود تمثيل للمعارضه بأى نسبه تشوفوها ونصيحتى نلتزم بأحكام القضاء فرد أحمد عز قائلا معنى كلامك كده المعارضه ممكن تحتل البرلمان فقاطعه سرور قائلا وانا عندى الكفاءه أدير المجلس حتى لو المعارضه خدت نسبة 48 % من المقاعد

 قاطع جمال الحضور كلهم وقال أزاى الكلام ده الحزب نجح بمجهوده وبفضل التخطيط الجيد  ليه عاوزين تضيعوا مجهودنا

حسم مبارك الجدال وقال أنا كنت أتمنى تمثيل مشرف للمعارضه فى البرلمان لكن لن ننتظر ونعطل مصالح البلد لحد الفصل فى القضايا وسأذهب لألقاء الخطاب فى موعده منعا لللاشاعات والتشكيك فى شرعية المجلس

هنا فهم الباشا أنه خسر المعركه فستأذن فى الأنصراف وخرج غاضبا من حجرة الأجتماعات ولاحظ الجميع ذلك وتأكد الباشا أن سطوة أحمد عز وجمال وصلت لأبعد الحدود وشعر أن أحمد عز هو من يدير البلد فعليا ولديه قدره مغناطيسيه على تحريك جمال مبارك وكل من بداخل القصر وأنه فعلا وصل للسيطره على عقلية مبارك وأن مبارك كذب التقارير المخابراتيه وصدق أحمد عز وأستهزأ مبارك  بالبرلمان الموازى وقال جملته الشهيره (( خليهم يتسلوا ))

صوابعى خلاص وقفت ومش قادر والله أكتب أنا راجل عندى 58 سنه وحتى لقائنا فى الحلقه رقم 7 حسيبكم مش علشان تتسلوا بل علشان تراجعوا ماكتبناه من قبل لأننا على وشك الأنتقال لعام 2011 وأحداث خيبة ينايم وسفر الباشا لألمانيا وسفر سامى عنان لأمريكا وأتمنى من الجميع مراجعة سلسلة مقالات مصر أم الكون لأننا سنستعين بكثير من  الأحداث التى ذكرت فيها

جنرال بهاء الشامى