الموقف الأسباجتى رقم 13

 

 

 أاااااااحياة أبوك ياشيخ تسيب اللى فى أيدك وتركز مع ميتين أهلى أحسن المنطقه أتكعبلت والشغل أحلو والملفات بدأت تتعقد والورق عاوز يتفنط من جديد ونعيد توزيع الأدوار

ربُ ضارةُ نافعه وعسى أن تكرهوا شيئاً وهو خيراً لكم (( الملف السورى حيمشى زى مامصر عاوزه والشاطر اللى ينجح فى الآخر

مش حدخل فى التحليل بشكل مباشر ألتزاما منى بعدم الخوض فى السياسه لكن حفرد قدامك الورق وأنت بذكائك توصل للى أنا عاوزه 

كلنا عارفين قصة بوتين مع القرد من أول ضرب الطياره لحد لما راح قدم فروض الطاعه والولاء وهنا بوتين لم يحقق أنتصاره الساحق على القرد بمجهوده الفردى بل أيضا بغباء الجالسين فى المكتب البيضاوى بالبيت الأبيض 

القرد طبعا سعادتك عارف أنه راح للدب الروسى مستوى ومتوضب مشوى ومقلى على الآخر وخصوصا بعد حركة النداله بتاعة الأمريكان اللى باعوه زى ماباعوا مبارك من قبله وهنا على سبيل الذكر علشان خاطر ميدو الفيلسوف نقول الأمريكان أطاحوا بمبارك بمساعدة فلان وفلان وميدو عارف أن فلان غدر بفلان الأول فراح فلان التانى مزحلقه من المشهد وصلح الأوضاع وظبطها وخد التورته لوحده (( كفايه كده ياعم ميدو منقدرشى نقول اكتر من كده على العام ))

نرجع لموضوعنا وحاول بقى تربط الدنيا ببعضها ولم ورقك ونظمه جنب بعضه علشان توصلك معلومتى القرد رجع من عند بوتين مع تغيير جذرى فى السياسه الخارجيه التركيه بنسبة 180 % 

القرد حيفتح قاعدة أنجليرك للروس علشان طيارنهم يضرب من هناك .... شوف الزمن مش ده اللى ضرب طياره قربت من السلك بتاعه دلوقتى بقت تركيا كلها مفتوحه على البحرى للطيران الروسى .... طيب والطيران الأمريكى وحلف الناتو موقفهم إيه ؟؟؟ حسيبك أنت بقى ياحلو تجاوب على السؤال ده 

وزير خارجيته أمبارح راح زار أيران وصرح تصريحات ناريه وقلب الترابيزه على دول الخليج كلها ماعدا قطر طبعا لأن قطر وأيران حبايب (( ياما قلتلك ياأبوسوسو أبن موزه حيضيعك واللى يبيع أبوه يبيع أخوه وأنت مش أخوه أنت يادوب جاره ))

أمسك والنبى فى دى قوى وزير الدفاع الروسى يجتمع مع المعارضه السوريه المعتدله والمتطرفه (( مش عارف مين اللى أخترع معتدله ومتطرفه دى كله بيقتل وكله بيدبح فى السوريين  )) أجتمع معاهم فين بقى ؟؟؟ حذر فذر فين ؟؟؟ أجتمع معاهم فى #كطر_بنت_الوسخه ياسيدى 

وزير الخارجيه المصرى راح لبنان مش علشان يبص على المزز البنانى فشر راح مخصوص علشان الملف السورى وإيران وأى كلام تانى رش مايبلش ومصر متقدرشى تحل وتربط فيه وهى كل اللى يهمها الملف السورى وإحنا متفقين قبل كده على أهمية الملف ده بالنسبه لمصر 

ركز برضوا هنا علشان تعرف أن أوباما أفشل رئيس مسك أمريكا وكل اللى حواليه صفر على الشمال ده لو قارنتهم بالأنتصارات اللى بيحققها الدب الروسى فى أى ملف بيلعب فيه وهنا لازم ألفت نظرك للى بيحصل فى سرت وليبيا والدور المصرى الرائع هناك والدور الأمريكى الفاشل (( داعش بتنطحن هناك وبيتعمل منهم منيو مشوى ))

تركيا تغازل مصر وتطلب العفو والسماح وقالت أنا حبدأ بنفسى وأصلح اللى أنكسر ومنعول أبو مورسى على اللى جابوا مورسى على اللى ورا مورسى على اللى بيأدوا مورسى خدنا منهم إيه غير الخساره والجرسه قدام العالم بلا مورسى بلا خره

شريف أسماعيل وعلى غير العاده يستقبل نظيره اليمنى مع تركيز غير عادى على الملف اليمنى 

أبو سوسو يغازل مصر فى قرار آحادى من جهة أبوسوسو بالسماح لمصر بالأستفاده من خيرات البحر الأحمر 

على عبدالله صالح والحوثيين طبعا وفى ظهرهم ايران قلبوا الترابيزه فى الكويت على دماغ أبوسوسو وراح عمنا أبوسوسو مركز فى شغل العافيه والدراع (( اللى معاه فلوس يعمل أكتر من كده بس خلاص هانت وقربت ))

من قبل كل ده وبنفس طريقة حسنى مبارك الغبيه لما شال أيده من أفريقيا ودلوقتى بندفع التمن أبوسوسو شال أيده من لبنان (( شفت بقى ياعم خالد زيارة سامح شكرى للبنان ليه مش قلتلك بحر السياسه مالوش آخر ولا له أرار هنا لازم ترفع القبعه والطاقيه والشال للأسد سامح شكرى .... محدش يجيبلى سيرة شريف أسماعيل لا هو ولا وزرائه الفاشلين )) 

الورق أتفركش منك والدنيا أتكعبلت أنا ياسيدى حنظمها لك تانى .... تركيا وروسيا وأيران وقطر وعبدالله صالح والحوثيين بقوا فى مركب واحده .... وأبو سوسو وأبو زايد ودول الخليج فى مركب تانى ...... ومصر فى المركب ده شويه وده شويه وبتلعب لمصلحة أهم ملف يخصها وهو الملف السورى اللى تقريبا فلت خالص من أيد أبو سوسو 

لو مش قادر تستقبل رسالتى أنا عاذرك لأن الموقف حاليا أشبه بما يطلق عليه الموقف الأسباجتى لكن اللى أقدر أقوله الخارجيه المصريه مصحصه قوى قوى قوى وبتشتغل صح فى الوقت الحالى وببراعه تحسد عليها على الجناحين الجناح الأول الأسد سامح شكرى والجناح الآخر الجندى المجهول أحمد أبو الغيط وأوعى تستبعد خبرات عمرو موسى وتلاميذه فى الخارجيه المصريه وقربت خلاص وزى ماقلنا قبل كده الملف السورى قدامه عامان أو أكثر أو أقل قليلا 

أى حد بقى يطلع يقولك بشار مالوش فيها والبوقين الحمضانين دول أعرف أنه بيتكلم بس من حلاوة الروح لكن للأسف الكلب أبن الكلب الواطى بشار نعم حيسيب الكرسى وقريب قوى بس للأسف حسيبه بكرامه وحسيبه وهو فى نظر الكل بطل قومى على الأقل لأنه عرف يحافظ على جيش بلده ضد شوية مرتزقه ومأجورين 

أتمنى معاونى الرئيس المصرى ورجاله فى السياسه الداخليه يكونوا بنصف أو ربع كفائة العاملين فى السياسه الخارجيه وأفسم بالله مصر ساعتها حيبقى لها شأن آخر

لم أتحدث فى السياسه ولم أحلل بإستفاضه كما عودتكم واللى عنده إعتراض على أى كلمه قلتها يقرا كلامى كويس ويفنطه بس بلاش موضوع العواطف لأن زى ماحضراتكم عارفين الدول لاتدار بالعواطف والبوس من بق بعضينا الدول .... تدار بالمصالح

جنرال بهاء الشامى