الظالم والمظلوم رقم 2

أنا اللى بحرك عبد الناصر وأقوله أخرج أو متخرجشى وميقدرش يتحرك إلا لما أقول

أنا اللى بحمى 30 مليون مصرى ومعنديش خطوط حمرا علشان أحميهم

أنا مش قديس أو نبى أنا رئيس جهاز مخابرات وأذا كان رئيس الدوله مهمته يحمى البلد بالجيش بأعداء واضحه قدامه  وجبهة قتال ...  أنا مهمتى أحمى البلد والشعب والجيش والرئيس معاهم بأعداء خفيه وأنظمة حكم بتكتب فى مصر قصائد شعر وتدبر لنا فى الخفاء المؤامرات

تلك الكلمات التى قالها صلاح نصر  على الملأ تم تحريف معانيها وتطويعها لأغراض خبيثه وبالعقل والمنطق رئيس جهاز مخابرات عندما ينطق مثل هذه الكلمات لم يكن يقصد ماحرفوه فيها وتعالى نشوف الحقيقه بهدووء لأننا للأسف شعب بطل يحكم عقله وأصبح يسمع فقط مايقال له لكن يحلل ويعقل الكثير منا فقد هذه الخواص

كل تلك الكلمات قيلت فى مناسبه واحده وفى تصريح صحفى واحد أذن لايمكن أجتزائها وفصلها عن بعضها إلا لو كانت لك أهداف وأغراض لم يقصدها ناطق الكلمات

أنا مش قديس أنا رئيس جهاز المخابرات وأنا اللى بحرك عبد الناصر وأقوله أنزل ومتنزلشى كلمات المفروض أن العامه من الناس أصبحت فهماها وتفهم مغزاها فهذا رئيس جهاز المخابرات المسئول عن حماية رئيس الدوله وحماية منصبه وده طبعا أهم حماية الشخص دى مهمه لوحدها وحماية المنصب دى مهمه تانيه ومعروف أن رئيس أى دوله يتحكم فى تحركاته طاقم حراسته ومدير مكتبه وجهاز الأمن الوطنى حاليا أو بتعبير أدق مخابرات وزارة الداخليه وقبل كل هؤلاء وذلك وتلك جهاز المخابرات العامه المسئول عن حماية منصب رئيس الجمهوريه ومن يشغله ورئيس الجمهوريه مش شخص عادى ولما يحب يدخل التواليت مش بيقوم ويدخل ويقضى مصلحته وقت مايحب زى ماحضرتك ممكن تكون فاهم

فيه ناس بيقولها عاوز أدخل التواليت وبياخد منها الأذن وهى بتدخل قبله الحمام لتأمينه وبعد خروجه للتخلص من فضلات رئيس الدوله بطريقه أمنيه تمنع أى طرف أو جهه من أخذ عينات منها لأغراض أمنيه ووضحنا النقطه دى فى أحدى مقالات اللامعقول فى عالم العقول 

رئيس الدوله ولأنه شخص مش عادى تحركاته بيتحكم فيها أجهزه وأشخاص مهمتها حمايته وحماية منصبه ويمكن السيسى قالها فى حواره مع ساندرا نشأت أنه بيتألم من أجراءات الحراسه لأنه مش قادر يعيش براحته زى الأول وهو بيحب التفاعل مع الناس 

لما يكون رئيس جهاز المخابرات مسئول عن حماية منصب رئيس الدوله وشخص الرئيس يبقى طبيعى الرئيس لايتحرك إلا لما يتقاله أه أو لأ من أكتر من جهه وعلى رأسها المخابرات العامه ويبقى كده صلاح نصر بيتكلم فى صميم أختصاصات عمل جهاز يعنى تفهم أنه بيعرفك بحجم وخطورة مهام المنصب يعنى أنت بتشوف الرئيس قدامك بيتحرك عادى لكن قبل أن يتحرك فى مجهود غير عادى وغير مرأى يقوم به أفراد آخرين وهذا مايقصده صلاح نصر 

لكن اللى حصل أن هذه الجمل التى قالها صلاح نصر تم تحريف معانيها والمستهدف منها لتخدم أغراض خبيثه وكأنه يريد أن يقول أنا فوق رئيس الدوله وتم تحريف أنا مش قديس أو نبى على أنه كافر وطبيعته يرتكب الموبيقات كمنهج شخصى فى حياته العمليه لكنه كان يقصد أنه ممكن أن يخطأ لأنه أنسان أولاً وأخيراً ودى الجمله اللى كان مركز عليها الكاتب والصحفى مصطفى أمين فى حملته ضد صلاح نصر

قلنا فى حلقات سلسلة اللامعقول فى عالم العقول وتقريبا الحلقه رقم 1 أن جميع أجهزة مخابرات العالم تستخدم الأسلوب الجنسى فى عملها وقلنا السعوديه تصنيفها فى هذا المضمار متقدم جدا رغم المظهر الدينى للدوله السعوديه ويمكن المظهر ده اللى بيساعد عملاء السعوديه فى صعوبة كشفهم بالنسبه للعملاء لأنه مستبعد حبتين عاطفيا  وبتكلم بالنسبه للعملاء أو الشخصيات المطلوب الحصول على معلومات منها أن العاهره اللى نايمه تحت منه بتستدرجه لحساب دوله مظهرها الدينى واضح وبارز

معاك مقال فيه تفاصيل ياريت ترجعه وحتستفاد منه كتير بالأمانه

https://www.facebook.com/Genral.Bahaa.ELshamy/posts/1861526410756432

صلاح نصر لم ينكر عمل المخابرات المصريه ووجود قسم لفتيات الليل والعاهرات لكن صلاح نصر كان متميز فى أصطياد من لاتحوم حولهم الشبهات مارحشى جاب واحده من شارع الهرم لكن جند فتيات من الجامعات وجند بعض الفنانات بمحض إرادتهم وكانت منهم إعتماد خورشيد 

صلاح نصر وقبل أن يموت كتب فى مذكراته فى السجن وكتب فى كتابه حديث الأفك والخيانه أن أعتماد خورشيد حتقول كل اللى قالته بعد موته وكأنه كان عارف اللى حتقوله لأنه كرئيس للجهاز وبعد تقديم تقارير من جهازه عن سيكلوجية هذه العميله قال أنه قرر تجميدها كعميله لأنها ممكن تنكشف وفسر فى كتابه ليه بيجمد العميله يعنى مابيكلفهاش بمهام لأن أستبعادها ممكن يعمل مشاكل نفسيه ويسهل تجنيدها فى الأتجاه المضاد والقصه دى بيحددها جهاز التحكم النفسى فى العملاء التابع لأى جهاز مخابرات

لازلنا مع بعض وخطاب العقول الأقوى من أى مستندات يسهل تزويرها وخصوصا أحنا بنتكلم على شخصيات مهمه جدا وآسف ححاول أتكلم بسفاله وقلة أدب شويه لو عندنا واحد صايع مرافق مومس تجده فى الطبيعى عنده غيره عليها ومش عاوزها تنام مع حد غيره وحتى النقطه دى موجوده فى كثير من الحيوانات وهو بيمارس الجنس مع أنثاه يثور لو ذكر تانى أقترب منه وده طبيعه موجوده فى أى ذكر يغير على أنثاه حتى لو العلاقه فى الحرام أو غير شرعيه

طيب هل يعقل رئيس جهاز مخابرات يكلف مراته بمهام جنسيه تقدر تقوم بيها أى عاهره أخرى تبع الجهاز وخصوصا أن جهاز المخابرات كان عنده أسماء رنانه أخرى ومومسات أكثر جمالا ودلعا من أعتدال خورشيد 

فى جلسات محاكمة صلاح نصر أظهر شيكات بأسم إعتدال خورشيد تقاضتها نظير عملها فى جهاز المخابرات فهل يعقل رئيس جهاز المخابرات يتجوز الست دى ... طبعا فيه ظباط مخابرات بالجهاز بيتابعوا هذه العميله وظباط تانيه مكلفه بمراقبتها ومراقبة سلوكياتها ومراقبة تحركاتها فى كل صباح ومساء فيما يطلق عليه (( الأسوره المخابراتيه )) يعنى متراقبه 24 ساعه زى خيالها ومش متسابه كده شليطى مليطى لما نعوزها تنام مع واحد نقول لها تعالى نامى مع فلان من غير مراقبتها 24 ساعه لأنها ممكن تودى الجهاز كله برئيسه فى 6000 مصيبه لو تم تجنيدها تجنيد مضاد أو حبت عميل وأفشت له بأسرار لكن طبيعى يتم مراقبتها بدقه وعلى مدار الساعه بطريقة الأسوره المخابراتيه 

الأسوره المخابراتيه هى الرقابه اللصيقه على مدار الساعه وحتى لو العميل دخل الحمام لازم المراقبه تكون عرفت دخل الحمام وعمل إيه 

وضحنا أن أى عميله جنسيه تخضع لمراقبة الجهاز التى تعمل لحسابه وده شئ طبيعى وظباط المخابرات وضحت لك فى المقال اللى سبت الرابط بتاعه بتراقب بعضها 

تُقدم تقارير المراقبه لظابط المتابعه المسئول عنها وتُقدم لطبيب نفسى لتحخليل سلوكياتها ومدى وفائها للجهاز الذى تعمل من أجله 

السؤال الآن هل ظباط المخابرات اللى كانت بتقوم بمهمة مراقبة المومسات ومنهم إعتماد خورشيد عايشين فى مية اللفت وميعرفوش أن أعتماد خورشيد تبقى مرات رئيس جهازهم ومفيش ظابط عرف القصه دى ولا كان صلاح نصر بيروح لها وهو لابس طاقية عبد المنعم أبراهيم ولا صلاح نصر لايراه إلا المؤمنون أو عرفوا أنها بتقابل راجل حتى مجهول لو هذا قد حدث أذن الجهاز الذى حقق كل هذه النجاحات ضد الموساد جهاز فاشل بالعقل ومن غير تفكير

كده أطلقنا أول رصاصه على عقد زواج صلاح نصر وأعتماد خورشيد فأين هذا العقد المزعوم ولاحظ أن بخاطب عقول بدون فرض رأى لكن ياعسل بنتكلم بالمنطق ومحدش شاف ربنا لكن عرفناه بالعقل وشفناه فى أبداعات خلقه وإحقاقا للحق طلعت إعتماد خورشيد مع الأعلامى نسان ردت عليا وأشهرت عقد زواجها وسأخصص حلقه منفصله للرد عليها ضمن الحلقات وحثبت لحضرتك أن الورقه مزوره بالمستندات والعقل لأنى كلفت فريقى يبحث عن ورقه عليها توقيع صلاح نصر لمقارنته

أعتدال خورشيد نفسها قالت أنها أتجوزت صلاح نصر بورقه عرفى وكانت ورقه واحده وأنها أتجوزته خوفا منه وحنرد طبعا على كل جزئيه فى كتابها لأنها كانت أهم راس حربه فى الهجوم على هذا الرجل وأنها سرقت الورقه دى يعنى مفيش أثبات أنها مراته غير ورقه واحده  وهى اللى سرقتها فأين ورقة زواج أعتدال خورشيد من صلاح نصر ؟؟؟

إعتدال بتقول أن الورقه ضاعت فهل يعقل أن دليل برائتها وعفتها وجوازها من أكبر راس فى البلد يروح منها وكان ممكن وهى مديرة أستوديو  قد الدنيا ورقه خطيره ومهمه زى دى تصورها وتعمل منها كذا نسخه وتشيلها فى أى مكان لو حد أكتشف أنها لها علاقه جنسيه مع شخصيه مهمه زى دى فكيف تثبت برائتها من الزنا لو مفيش معاها ورقه تثبت شرعية العلاقه 

صلاح نصر وخلى بالك مع ميتين أهلى أننا بنتكلم على رئيس جهاز المخابرات العامه كتب ورقة جواز عرفى من نسخه واحده وحطها فى جيبه فهل منطقى رئيس جهاز المخابرات العامه اللى ضحك على جهاز الموساد تتسرق منه ورقه وحنفترض أنها أتسرقت قال إيه ياعينى مايحسش أنه أتسرق منه حاجه ولو دى ركبت فى دماغك عليا الطلاق بالتلاته ماتركب فى دماغى بتلاته شلن لأن لو صلاح نصر أتسرقت منه ورقه مهمه زى دى وأتسرقت من جيبه يبقى على الدنيا البالوظه والمهلبيه ويبقى الراجل اللى دوخ أسرائيل والموساد والسى آى إيه راجل قرطاس وكل أجهزة مخابرات العالم بتأكلنا المهلبيه عن قدراتها الجهنميه وأحيييييييييه بالتقليه لو حد نصف عاقل صدق التمثيليه دى إلا لو لغى عقله نهائيا وعمله ديللييت 

طيب ماتيجى نتعرف يانجم على إعتدال خورشيد علشان نشوف الليله ماشيه أزاى 

من هى إعتماد خورشيد ؟؟؟

هى : إعتماد محمد حافظ رشدى من مواليد المنصوره وتتمتع بجمال عالى من صغرها وأنوثه طاغيه منذ أن كانت طفله عندها 14 عام فقط وهربت من بيت والدها بالمنصوره لتعيش مع جدتها لأمها فى القاهره بعد زواج والدها ولقطها أحد متعهدى توريد الكومبارس لجمالها الصارخ وقدمها لأحمد خورشيد والد عمر خورشيد علشان تعمل دور قدام فريد شوقى وشاديه فى فيلم (( السبع أفندى (( وعارضت جدتها بشده شغلها فى السيما لكنها بعد شهرين فقط من تمثيل دورها وهى عندها 14 سنه تزوجت من أحمد خورشيد وكان عنده وقتها 44 سنه وأستعان بدكتور صديقه علشان يعمل لها شهادة تسنين علشان يقدر يتجوزها وقتها وأتجوزها بدون رضا أو علم أهلها وهى عندها 14 سنه

تانى يوم الصبح هربت من بيت أحمد خورشيد وراحت بيت جدتها وطردتها وقالت لها مطرح ماكنتى بايته أمبارح روحى كملى عيشتك وأستطاع فريد شوقى أرجعها لبيت جوزها وأصبح من يومها إسمها إعتماد خورشيد بدلاً من إعتماد رشدى وأصبحت مديره لأكبر معمل تصوير فى الشرق الأوسط وهى عندها 18 عام فقط وكان عندها 3 أولاد وهى عندها 19 عام

 

على لسانها وفى كتابها بتقول أن مصطفى عبد الناصر أخو جمال عبد الناصر كان حاول يراودها عن نفسها ولما صدته أنتحر وبلع كميه من الحبوب المهدئه ولما أتنقل للمستشفى الحاج حسين أبو عبد الناصر راح لها فيلتها بأسكندريه وطلب منه تزور أبنه علشان ياخد العلاج ولما ربنا شفاه عبد الناصر طرده على سوريا وهناك فى المستشفى شافها صلاح نصر فهل واحده عارفه كل مشاهير مصر لاتعرف صلاح نصر 
 

على لسانها بتقول أن جمال عبدالناصر أستقبلها وقعد معاها 5 ساعات ولما أعترفت له بوجود 5 آلاف جنيه ذهب + مليون دولار مدفونه فى فيلتها من تبرعات الملك سعود لحرب اليمن فأرسل جمال عبدالناصر ناس حفرت الفيلا وجاب الفلوس وقالها متقوليش لحد على موضوع الفلوس فى أيحاء قذر أن عبدالناصر حرامى

 

 بعد دباجه وقصه طويله عن مطاردة صلاح نصر بتحكى وتقول وعاوزك تركز الله يرضى عليك فى كلامها أن صلاح نصر لما خدها فيلته فى المريوطيه وكانت لحد اللحظه متعرفشى هو مين ... واحده عارفه كبار البلد ومشاهيرها وبتقول فى كتابها مكانتشى تعرف صلاح نصر تانى راس فى مصر  ولما راحت فيلته سابها هى والضيوف تحت وبعدين نده على سكرتيره الخاص وقاله أبعتلى أعتماد فخدها السكرتير من الدور الأرضى وطلعها فوق أودة نوم صلاح نصر وفتحت الباب والكلام على لسانها وجدت صلاح نصر عريان زى ماولدته أمه ونايم على السرير ولما شافته كده قال إيه قالتله أنت مين وعاوز منى إيه ؟؟؟



قال إيه نده صلاح نصر على الخدم وسكرتيره وقالهم وهو واقف عريان بلبوص تعالوا قولوا لأعتماد أنا مين ومحدش منهم رد وقالوا له هو فيه حد فى مصر مايعرفشى حضرتك والكلام على لسانها وقالت وبعدها مشيوا فراح هو على الشماعه وهو لسه عريان وجاب لها الكارنيه بتاعه وأعطاه لها ولما قرأت أسمه ووظيفته وعرفت أنه مدير المخابرات العامه والكلام على لسانها ورب الكعبه مش كلامى قال إيه أعتماد خورشيد اللى كانت خايفه من صلاح نصر وهو فى القفص أثناء محاكمته رمت الكارنيه على الأرض وتفت عليه وراح صلاح نصر راكع على الأرض وباس رجليها وقال لها أنا بحبك من سنة 1960 وعاوزك تحبينى
 

برضوا الكلام على لسانها وصلاح نصر راكع تحت رجليها اللى بتخاف وترتعش منه وهو محبوس فى القفص قالها بعد ماعرفتينى ممكن تقبلينى صديق أو رفيق أو حبيب وأنها وافقت خوفا منه منين خايفه منه ومنين رمت الكارنيه وتفت عليه ومنين باس رجليها وهى خايفه منه مش اللى يكدب برضوا يكدب كدب معقول ومايسرحشى قوى
 

علاقة جوزها الجنسيه بعاملة المساج بتاعته بتقول أن صلاح نصر اللى زرعها فى طريقه

 بتقول أن صلاح نصر بعد سنتين من مطاردتها بيسأل جوزها عندك مانع أتجوز أعتماد فجوزها قاله أنت فعلا جوزها وعايش معانا فى البيت بقالك سنتين زى جوزها وبتقول أن صلاح نصر كان بيبوسها ويمسكها من أماكن حساسه قدام جوزها طوال السنتين

بتقول أن يوم جوازها من صلاح نصر كان شارب وقال لجوزها عندك مانع أتجوز أعتماد النهارده وجوزها لم يمانع فجاب ورقه وكتب فيها عقد زواج عرفى وخلى جوزها يمضى عليه شاهد وأعطاها ربع جنيه مهرها وخدها على أودة النوم وهى حامل فى الشهر السابع ومن غير جوزها مايطلقها ولا تكون فيه عدة طلاق يعنى أتجوزت راجل وهى على ذمة راجل تانى وجوزها كان شاهد على عقد الزواج وكمان مافيش عدة طلاق وكمان كانت حامل فى الشهر السابع
 

 لازال الكلام على لسانها بتقول أنا غفلت صلاح نصر وسرقت الورقه من جيبه يعنى ورقه واحده وأصبحت معاها 
 

بتقول فى كتابها أن صلاح نصر كان مسخر كل الفنانات والممثلات فى أعمال منافيه للآداب ماعدا لبنى عبدالعزيز علشان كانت صديقتها وهى اللى أنقذتها من أيد صلاح نصر وشاديه علشان علاقتها بمصطفى أمين وفاتن حمامه علشان هربت مع عمر الشريف وليلى رستم علشان كانت مريضه وأن الأربعه بس اللى فلتوا من أيده والفنانين والممثلين الرجاله كان أغلبهم شواذ جنسيا من أول أحمد مظهر وفريد شوقى اللى رجعها لجوزها لحد عبدالحليم حافظ وكان صلاح نصر بيستغلهم وأن زواج فاتن حمامه من عمر الشريف علشان بس تهرب من صلاح نصر (( فاتن حمامه وقتها كانت متزوجه من عز الدين ذو الفقار وحبت عمر الشريف وهما بيعملوا مع بعض فيلم صراع فى الوادى وأنها أختلقت مشاكل مع ذو الفقار علشان تطلق وتتزوج عمر الشريف وتسافر معاه )) بأختصار إعتماد عاوزه تفهمنا أن كل فنانين وممثلين مصر شواذ جنسيا ))  وهى الوحيده فى هذا المجتمع اللى شريفه وطاهره وعفيفه رغم أنها كانت عايشه مع صلاح نصر قبل الورقه المضروبه عامان وبيعاشرها معاشرة الأزواج وبيمسكها من أماكن حساسه قدام جوزها وكانت علاقاتها الجنسيه مع الأمراء العرب على كل لسان فى الوسط الفنى
 

إعتماد ولسه الكلام على لسانها أنها شافت نجاة الصغيره وهى بتمارس الجنس مع سعاد حسنى ومع ورده الجزائريه وصباح )) سحاق )) فى حفلات السمو الروحانى وأن صلاح نصر كان مجند أو مسخر فتيات الكليات والجامعات وأولاد المجتمع الأرستقراطى وتقريبا من كل كليه وجامعه 500 فتاه فى الحفلات اللى كان بيعملها صلاح نصر وأنها لما كانت بتحضر الحفلات دى كانت بترجع اللى فى بطنها

 إعتماد بتتكلم فى كتابها أن معظم الوزراء كانوا بيحضروا حفلات السمو الروحى لكن عبد الحكيم عامر الوحيد اللى كان مابيمارسشى الفحشاء إلا مع برلنتى عبد الحميد وأن برلنتى عبد الحميد غارت منها وعملت هى كمان كتاب واخدلى بالك إى حد يعمل كتاب يبقى غيران منها وعاوزك تركز على تحليلها النفسى

 إعتدال فى كتابها من الآخر كده كل مصر ومشاهيرها وفنانيها ومطربيها ووزرائها كانوا شواذ جنسيا وكلهم بيمارسوا الجنس مع بعض والدنيا سايحه فى بعضها وأن برلنتى كانت عشيقة عبدالحكيم عامر مش زوجته ولم يتزوجها وهى الوحيده فى مصر اللى شريفه وعفيفه مع أنها كانت بتتمسك من أماكن حساسه على حد قولها قدام جوزها 

 

 برضوا الكلام على لسانها أنها كانت بتضرب صلاح نصر بالجزمه على دماغه وعلى وشه كل لما تشوفه وأنه كان بينبسط لما تتف عليه وفى مره ضربته بالفازه ودماغه أنفتحت (( مدير المخابرات دماغه أنفتحت ))  من غير ماحد يعرف أو يشوفه أو يسأل وكأننا بنتكلم على بهاء الشامى مش صلاح نصر مدير المخابرات

 إعتماد طوال الكتاب بتحاول توهمنا رغم تمجيدها فى عبدالناصر إلا أن كل ده كان بيتم بعلمه وده اللى بنقول عليه السم فى العسل
 

 الفقره دى هامه وخطيره وللكبار فقط إعتماد رشدى أو خورشيد فى جلسات محاكمة صلاح نصر قالت عندما سألها القاضى حسين الشافعى هل كنتى تتقاضين مبالغ ماليه عن مضاجعتك الرجال فأجابت فى الأول بتكون العلاقه بمزاجى الشخصى لكن بعد كده بتتطور وتكون نظير هدايا أو مبالغ ماليه فسألها القاضى كام كان أجرك عن المره الواحده فأجابت من 30 لـ 50 جنيه وقتها وحسب جنسيته وكنت باخد مثلهم من المخابرات على المعلومات اللى بنقلها لهم فسألها القاضى كان التصوير بيتم بعلمك فردت أيوه لما بيكونوا عاوزين يصوروا العميل كنت بكون عارفه علشان أحاول أخلى وشه يظهر أمام الكاميرات اللى كنت بكون عارفه مكانها فسألها القاضى كنتى عارفه أن الشغل ده للمخابرات فقالت أيوه كنت عارفه وبعمله بمحض أرادتى نظير عقد سنوى بـ 3 آلاف جنيه فهل سيده زى دى تنفع تبقى مرات راجل وخصوصا لو مسئول وفى منصب حساس زى صلاح نصر
 

إعتماد خورشيد اللى كتب مقدمة كتابها من حق الشعب أن يعرف هو مصطفى أمين ومعروف قصة مصطفى أمين وصلاح نصر وحنتعرض للقصه دى بالتفصيل  أما قصة فاتن حمامه وعمر الشريف فهى قصه طويله ملخصها أن كان فيه فعلا قصة حب بين فاتن وعمر الشريف وأنها تزوجته عن حب بعد فيلم صراع فى الوادى مش زى مابتقول إعتماد أنها أتجوزت علشان تهرب من مصر ومعلومه كده على الماشى فاتن حمامه كانت ساكنه فى عمارة على أمين أخو مصطفى أمين وهو اللى ساعدها فى الحصول على الطلاق من ذو الفقار جوزها الأولانى

 إعتماد بتقول فى كتابها أن صلاح نصر اللى كان بيعذب الشيوعيين وبيقبض عليهم وكان مطلع عين أبوهم كان شيوعى واخدلى بال حضرتك شيوعى وبيكره الشيوعيين
 

طول الكتاب تلاحظ أن إعتماد خورشيد بتتكلم عن مظلومية الداعيه الأسلامى سيد قطب وأن الأخوان براءه من مؤامرة المنشيه وأن اللى ظلم الأخوان هو صلاح نصر وأن سيد قطب مات شهيد لأنه مظلوم
 

طيب نقول تانى والتكرار يعلم الشطار واحده أتجوزت رئيس جهاز المخابرات وكان بيشغلها تبع جهاز المخابرات مومس يعنى وقبل على نفسه مراته تبقى مومس ومحدش فى جهاز المخابرات من بتوع مراقبة العملاء والعاهرات أكتشف الحدوته والجهاز نفسه بقى فى الزلابيه وميعرفوش حاجه عن العملاء وبيتقرطسوا وأجهزة مخابرات العالم لم تكتشف أن صلاح نصر متجوز واحده عرفى ومشغلها مومس عنده فى الجهاز وإسرائيل اللى رصدت مليون أسترلينى لقتله جهاز الموساد بتاعها نايم هو كمان فى البالوظه وأجهزة مخابرات العالم والسى آى إيه نايمه فى البالوظه ورئيس جهاز مخابرات مصر أتسرقت ورقه من جيبه وقال إيه معرفشى والورقه دى ياكبد أمها رغم أهميتها مصورتهاش وعملت منها كذا نسخه وراحت منها ومطلوب مننا نسمع من لسانها الطاهر ونصدقها ونلغى عقلنا ونرميه فى زلعة المش علشان نصدق إعتماد خورشيد ونرجع لمقولة العملاق عمر سليمان لزكريا عزمى فى رحلة الطيران لألمانيا برفقة حسنى مبارك لما قاله يازكريا أنا مش محتاج أزرع عملاء فى القصر الجمهورى أنا أعرف عدد كرات دمك اللى أنت متعرفهاش ويبقى كل ده قدام عقلى وببساطه كده مطلوب منى ألغيه وأصدق عاهره ومومس كانت بتنام تحت الرجاله نظير شيكات بتاخدها من المخابرات المصريه 

أعتقد بالعقل والمنطق الآن ودى آخر رصاصه فى عقد زواج أعتماد خورشيد أن قصة زواجها من صلاح نصر كلها  ملفقه وأطغاث أحلام ... ممكن يكون نام معاها مره أو مرتين وده شئ يعلمه الله وتم طبعا فى الخفاء لكن عقد زواج  وزوجته الكلام العبيط ده مدخلشى دماغى 

صوابعى كده جابت آخرها بقالى 3 ساعات بكتب لكن اللى حابب أقوله أنا خاطبت عقلك فقط ... حكمته وشغلته خير وبركه ... سايبه فى الكومدينو وخايف تستعمله يبقى لو قلتلك ريان يافجل مش حتقتنع ونرجو من الأخوه المتابعين عدم الأستعجال وسبق الأحداث أحنا لسه قدامنا حلقات كتيره ومش حنسيب حذفوره واحده أن شاء الله ولا كتاب أتكلم ولا مقال أتكتب فى أم الليله دى إلا لما نرد عليه مش علشان نبرأ صلاح نصر الراقد الآن فى التراب وفيه غيرنا يقدر يدافع عنه وأولى بالدفاع عنه أولاده وأسرته لكن علشان نبرأ جهاز وطنى هو المخابرات المصريه وكان رئيسه فى يوم صلاح نصر وتلاقت أهداف الأعداء على تشويه صورة المخابرات المصريه فى شخص هذا الراجل الظالم والمظلوم

جنرال بهاء الشامى