هيجان الوليه على الأس 400

ليه أمريكا قالبه الدنيا ونازله تهديد شمال ويمين لأى دوله تشترى منظومة صواريخ أس 400 ؟؟؟

للأجابه على هذا السؤال لابد من طرح بعض النقاط

أولا لازم تكون عارف أن كلمة منظومه تعنى أنه مش صاروخ واحد لكنها مجموعة صواريخ مثبته على قاعده واحده متحركه

ثانيا لاز تكون عارف أن المنظومه دى قديمه وتم تطويرها وهى كانت قديما أس 300 لكن دخل عليها بعض التغيرات التكنولوجيه لكى تواجه الصواريخ الباليستيه

ثالثا عندى فى المنظومه دى زى ماقلتلك 4 صواريخ أو 4 فى 1 بمدى مختلف وبدون الدخول فى مصطلحات عسكريه مجعلصه وبطريقه مبسطه الـ 4 صواريخ واحد منهم مداه 400 كم والتانى مداه 250 كم والثالث مداه 120 كم والرابع مداه 40 كم ... أذن أنا قدام منظومه تعمل مع أى أهداف من 40 كم إلى 400 كم وتقدر تتعامل مع أهداف عاديه وتقدر تتعامل مع أهداف باليستيه أو صواريخ طويلة المدى يعنى بالبلدى عندى منظومه تقدر تتعامل مع أى هدف سواء صواريخ أو طائرات

المنظومه دى رغم أنهم شغالين عليها تقريبا من عام 1999 م لكن كانت فيه عوائق فى التنفيذ نظراً للضغوط الأقتصاديه على روسيا ورغم أنهم جربوها فى عام 2004 لكن توقف الأنتاج لنفس السبب وظهرت تقريبا كسلاح فعال ومجرب فى عام 2013 أو 2014 مش متذكر قوى وخلى بالك من التاريخ كويس ومكانشى حواليها الضجه دى

أذن المنظومه دى بالبلدى وداعا للسكود ووداعاً للباتريوت أو القبه الحديديه ووداعا لأى صاروخ باليستى

كل جيش فى العالم له عقيده قتاليه وعقيده تسليحيه وعقيده تكتيكيه

الجيش الأمريكى تحديداً ومعاه الجيش الأسرائيلى عقيدتهم التكتيكيه التمهيد الجوى المكثف وبع حرق أرض المعركه يتم الأقتحام البرى ورغم تكلفة هذه العقيده التكتيكيه الباهظه إلا أنها أقل عقيده فى خسائر الأرواح وده أهم مايميز الجيش الأمريكى قلة خسائره البشريه

الجيش الأمريكى والأسرائيلى جيوش هجوميه معتديه يعنى دائما هى اللى بتبدأ المشكله ومايترتب عليها من ردود أفعال ولو راجعت تاريخ البلدين العسكرى دائما تجد أنهم المعتدين حتى حرب أكتوبر اللى بدأتها مصر كانت أحد حروب رد الفعل الطبيعى

من هنا ومن خلال منظومة الأس 400 أنت تقدر عن مهاجمة الأمريكان أو الأسرائيلين تحيد أسلحتهم الهجوميه ومن هنا أفقدتهم أهم مايميزهم سواء طيران حربى هجومى أو صواريخ طويله وقصيرة المدى من خلال أساطيل الأمريكان الموجوده فى كل محيطات العالم أذن أنت هنا أمام تحييد لأساطيل الأمريكان وطيرانهم وبواخرهم وطوربيداتهم

برضوا كل ده مايستهلشى الضجه دى كلها لأن أمريكا عندها منظومة صواريخ مجنحه لكن المفاجأه التى يعلمها أى متابع للشئون التسليحيه أن روسيا فى ضربة ترامب الصاروخيه قدرت تسقط صاروخين أمام سواحل سوريا ولأن روسيا مسيطره على المنطقه اللى سقط فيها الصاروخين بسرعة البرق نزل 2 غواصين وقدروا يعطلوا التدمير الذاتى لهذين الصاروخين وقدروا يطلعوهم من المياه ويسافروا فى نفس اليوم روسيا لتفكيكهم ودراسة التكنولوجيا المتقدمه اللى فيهم يعنى قريب حيكون فيه تحييد تام لهذه المنظومه وده اللى دفع بوتين لتكريم هذين الغواصين

خد المعلومه دى برضوا أحتمال نعوزها فى تحليل تانى أن بعد سقوط طائرة الأستطلاع الروسيه الأخيره أيل 200 حاصرت السفن الحربيه الموجوده أمام سواحل سوريا مكان سقوط الطائره وبسرعه نزل الغواصين فككوا تكنلوجيا التجسس اللى فى الطائره منعا لسرقة هذه التكنولوجيا العاليه

هل كل ده كافى لهذه الضجه ؟؟؟

لو رجعنا لسبب توقف أنتاج منظومة أس 400 كل هذه السنوات سنجدها أسباب أقتصاديه ولم تنتعش خزينة تاجر السلاح الروسى إلا بعد أتجاه الجيش المصرى بكل ثقله للتاجر الروسى وعدم أعتماده على التاجر الأمريكى فى أى صفقات سلاح متطوره أذن العامل الأقتصادى مهم

عندى بقى منظومة الأس 500 وهى دى مربط الفرس واللى عامله للأمريكان أسهال لأنها ستقضى على كل عقائدهم العسكريه وستتمكن هذه المنظومه من تحييد أى أسطول أمريكى فى أى مكان بالعالم بقطع الأتصال عنه يعنى أى أسطول أمريكى ومصدر قوة الأمريكان حيقف فى المحيطات شليطى مليطى فاقداً الأتصال مع مراكز القياده وأتخاذ القرار بعد ضرب منظومة أس 500 لأى قمر صناعى للأتصالات أو الأستخبارات ورغم أن أمريكا عامله دوائر مغلقه لكل أسطول على حده للأتصالات لكن تحييد الأسطول وقطع أتصالاته عن واشنطن سيسب له نسبة عجز عاليه يعنى مثلا حيبقى واقف الأسطول مش عارف يتصل بأى جهه يطلب أمداد أو معونه ويفقد الأتصال مع الطائرات اللى تطير من عليه لتنفيذ أى مهام ويفقد السيطره على منظومة الصواريخ المجنحه

يبقى رواج منظومة أس 400 بعد ماتقدمت أكبر جيوش العالم بطلبات لشراء هذه المنظومه المتقدمه بالتأكيد سينعش خزينة تاجر السلاح الروسى ويمكنه من الأنتهاء من هذه المنظومه فى الموعد المحدد لها 2022 علشان يدخل على الأس 600 وينتهى منها فى عام 2030 ليعلن للعالم أنتهاء قوة وجبروت أمريكا وأنتهاء عقيدة الأساطيل البحريه

ملحوظه صغيره :

روسيا لديها تعاقدات تسليح حتى 2027 يعنى ستظل متربعه على عرش تجارة السلاح حتى تاريخه وستظل خزينتها تساعدها على أتمام هذه الصفقات لذلك وبما أن المنظومه أس 400 تدخل تحت بند التسليح التقليدى أمريكا تحاول بأقصى طاقتها لوقف تسويق هذه المنظومه لهدفين الضغط على روسيا أقتصاديا ووقف تمويل تصنيع صفقة الأس 500 لكى تمنع روسيا من التفوق عليها وكتابة شهادة وفاتها

جنرال بهاء الشامى