الدين الأبراهيمى الجديد رقم 12

نعود لنستأنف هذه السلسله من المقالات بعد الهجمه الشرسه على الأزهر الشريف والسنه النبويه والحلقه رقم 12 من ملفات الدين الأبراهيمى الجديد

وَمَا كَانَ الْمُؤْمِنُونَ لِيَنفِرُوا كَافَّةً ۚ فَلَوْلَا نَفَرَ مِن كُلِّ فِرْقَةٍ مِّنْهُمْ طَائِفَةٌ لِّيَتَفَقَّهُوا فِي الدِّينِ وَلِيُنذِرُوا قَوْمَهُمْ إِذَا رَجَعُوا إِلَيْهِمْ لَعَلَّهُمْ يَحْذَرُونَ (122) سوره التوبه

الآيه دى معناها بإختصار أن ما ينفعش كل المسلمين يخرجوا يحاربوا ولازم جزء منهم يقعد يتعلم ويتفقه فى دينه ولما الجزء اللى كان بيحارب يرجع همه يفقهوه فى الدين اللى أتعلموه

عاوز كلام واضح تانى وفيه إيه أكتر من أن ربنا بيمنعهم من الجهاد علشان يتعلموا أليس هذا أزهر بمفهوم عصرهم

يعنى إيه أزهر ؟؟؟

الأزهر هو حلقات علم للتفقيه فى الدين كما قال الرسول

لما الرسول صل الله عليه وسلم يرسل بعض من الصحابه للقرى التى دخلها الأسلام لشرح مفهوم صحيح الدين أليس هذا أزهر بمفهوم عصرهم

أذن صاحب أول مؤسسة أزهر فى العالم هو رسول الله صل الله عليه وسلم وطلب العلم أحد سنن الرسول وشرح الدين هو من صميم سنة الرسول

طيب نشوف موضوع هجوم الغوغاء المحسوبين على المسلمين للحصول على لايك وشير إيه حكايتهم ونرد على تخاريفهم

الرسول لم يقوم بتجميع القرآن الكريم فى عهده لأن كل اللى حواليه وقتها كانوا من حفظة القرآن الكريم وكذلك لم يفعل مع الأحدايث النبويه لأن كل الصحابه ولادهم وأحفادهم وقتها كانوا معاصرين للأحداث وكانوا حفظة قرآن وأحاديث

نتكلم شويه مع بعض بالبلدى ونرجع للقصه الهزليه النقديه الوليه ولدت قرد فقد ولدت أحدى السيدات طفل أذنه كبيره عن أقرانه ولما شافته أول واحده قالت فلانه ولدت طفل ودانه كبيره حبتين واللى خدت الكلام منها قالت فلانه ولدت طفل ودانه كبيره زى وادن القرد واللى خدت الكلام منها قالت فلانه ولدت طفل ودانه ودان قرد واللى خدت الكلام منها قالت فلانه ولدت طفل ودانه ودان قرد وفيه شبه من القرد وظل الكلام ينتق منها لهنا حتى وصل المر أن فلانه قالت فلانه ولدت قرد

من القصه دى تقدر تفهم أن نقل الكلام لو لم يكن موثقاً بالكتابه فمن الممكن ان يتم تحريفه عند النقل وفى النهايه يخرج من مضمونه وبعيدا عن الموضوع الأصلى

قلنا الصحابه كانوا معاصرين الأحداث وكلهم حفظه للقرآن والسنه النبويه مع تفاوت نسبة الذاكره فى الحفظ أذن السنه كانت موجوده لكنها غير موثقه

البخارى لاحظ أن هناك أختلاف فى نقل الأحاديث فقرر تجميعها قبل أن يتم تحريفها بالكامل وتخرج عن مضمونها ووصل ماجمعه البخارى تقريبا لـ 60 ألف حديث معظمها مكرر لأنه جمعها من أكتر من مصدر فقرر تنقيحها وأستبعاد المتشابه والمكرر منها حتى وصلوا تقريبا لـ 4 آلاف حديث

البخارى لم يكتب الأحاديث بنفسه ولكن من قام  بذلك تلاميذه ثم قام أحدهم فيما بعد منعا لخطورة النقل الشفوى بتوثيق الأحاديث

من هنا فهمنا ليه تم التجميع وليه تأخر تجميع السنه لـ 240 هـ وكده ردينا على اللى بيقولوا أحنا مابنعترفشى بصحيح البخارى لأنه لم يتم تجميعه فى عهد الرسول خابوا وخاب مسعاهم 

ليه الهجوم على السنه النبويه وصحيح البخارى وهل شيخ الأزهر كان صادق وهو بيقول القرآن من غير السنه النبويه غير كامل ؟؟؟

حنفترض أننا لغينا السنه النبويه كما يريدون وكما يرغبون فكيف أصلى وكيف أحج ؟؟؟

تعالى نوضح دى شويه علشان محدش يتنح ونقول بالبلدى دكتور الجامعه بيضع المنهج ثم يقوم المعيدين بتفسيره أذن شرح المعيدين مكمل لصحيح منهج الدكتور

بلاش دى خد غيرها لما بتشترى تلاجه أو أى جهاز (( الأنسان المسلم ))   بيكون معاه كتالوج (( القرآن الكريم )) وبتقرأ الكتالوج وفيه بعض المصطلحات الفنيه بتحتاج لتوضيح من متخصص من الشركه (( الرسول الكريم )) ولما بيجى متخصص الشركه ويركب الأسلاك ويبدأ فى تشغيل التلاجه أنت بتكون عينك عليه (( الناس اللى عاصرت الرسول وشافته بيعمل إيه )) وبعد مايخلص شغله بيقولك على بعض التعليمات ويشرح لك بعض التفاصيل الخاصه بالتلاجه (( الأحاديث النبويه وتفسيراتها عن لسان الرسول )) وخليك برضوا معايا

التلاجه موجوده والكتالوج موجود وأنت مش فاهم بعض الأمور فى تشغيل التلاجه وبتشتغل ربع ساعه وعطلانه باقى اليوم وأضطريت تستعين بالفنى من الشركه وأشتغلت التلاجه طوال اليوم أذن هنا أنت كنت محتاج لتفعيل تعليمات الكتالوج بشكل كامل لشرح متخصص  وهو ده اللى كان يقصده شيخ الأزهر الشريف أن السنه النبويه مكمله للقرآن الكريم ولايمكن الأستغناء عنها بأى حال من الأحوال

أساسيات الأسلام خمسه منهم شهادة أن لاإله إلا الله محمداً رسول اللهً وده نطق لفظى مش محتاج لشرح مفصل

الأيمان بالله وكتبه ورسله واليوم الآخر وهنا أنت محتاج لشرح الأيمان أذن أنت محتاج للسنه

فرض الصلاه يستحيل أن يتم بدون السنه النبويه

فرض الحج لايمكن أن يتم بدون السنه النبويه وسيدنا عمر بن الخطاب أقر بذلك وقال للحجر الأسود لولا أنى رأيت أن رسول الله يقبلك ماقبلتك

فرض الزكاه موجود بنص قرآنى وشرح توضيحى من رسول الله

أذن من كل ماسبق لايمكن أن تحيى شعائر دينك بدون سنه نبويه أذن السنه النبويه مكمله للقرآن الكريم وحنروح بعيد ليه الرسول قال تركت فيكم ما أن تمسكتم به كتاب الله وسنتى ..................

كده أنتهينا من النقطه دى واللى عاوز شير ولايك بلاش يخوض فى الدين وينزل صور بنات خليعه وهو يوصل لأعلى نسبة مشاهده ولايكات وشير

طيب ليه الهجوم ده دلوقتى وخدوا من كلمة شيخ الأزهر ذريعه كما يقول المثل بطريقة ولاتقربوا الصلاه

أنا وضحت لحضرتك أهمية السنه النبويه ولأنه ميقدرشى يقرب نهائيا من القرآن لأعتبارين هو حساسية المسلمين عموما لأى أقتراب من القرآن والمصريين بشكل خاص وغير طبيعى ... أذن هو مافيش قدامه غير السنه النبويه لو قدر يستبعدها يبقى أستبعد جزء كبير متمم للدين ومن هنا يبدأ فى تفسير آيات الدين براحته ولا أنت مخدتش بالك من حلقة الدكتور محمد الباز على قناة الحياه وسبتلك رابطها فى مقالات سابقه لما طالب بتجميد أحكام القرآن مؤقتا لعدم مؤامتها للعصر الحديث ... عاوز وضوح للمؤامره أوضح من كده ولا أنت غفلان عما يكيدون

هو عاوز يلغى السنه عشان بعد 100 عام مثلا تلاقى واحده ست بتؤم المسلمين وممكن تلاقيها خطيب للجمعه وممكن تلاقى القبله ناحية تركيا وتلاقى اللى يقولك الصلاه كانت سريه علشان كانوا بيخافوا وقت الحرب بالنهار وتلاقى كمان اللى يقولك الناس كانت زمان صحتها حلوه وكانوا بيصلوا كتير وأحنا دلوقتى ناس نايتى ومنقدرشى غير على ركعتين ويسر ولا تعسر وكل واحد يفسر الصلاه براحته 

أتذكر أنى قلت فى أحدى مقالاتى أن بعض الملفات يجب مناقشتها بحذر شديد لأن فيه ملفات بتكون عامله زى الحديد لازم تسخين الحديد لدرجة الأحمرار ثم الطرق عليها بقوه حتى يتم أستعدالها وبعض الملفات عامله زى عجين الخبيز أى أقتراب منها لو لم يكن بحرفيه وعنايه ممكن يغير شكلها ومضمونها 

الأزهر فيه أخوان لا أحد ينكر ذلك لكن الأزهر من الملفات الشائكه التى تحتاج لجراح ماهر متخصص فى الجراحات الملاحيه بأحدث أجهزة الليزر والمناظير وأكبر خطأ أن يتدخل الفيسبوكيين فى ملف الأزهر

   

يمكن التأثر بحالة الكراهيه لتنظيم الأخوان يكون مأثر عليك وعاوز تستبعدهم من الأزهر بجراحه عاديه  لكن هذا الملف أنا وأنت وكل العاقلين والأخوان أيضا يعلمون هذا وإلا لم يكن يهتموا به من الأصل ومحتاج زى ماقلتلك لعملية جراحه ملاحيه على أيد جراح ماهر وأعتقد السيسى حتى الآن ناجح فى كل الملفات التى طرقها يبقى ياريت نسيبه يشتغل بهدوووء والمطلوب منك الدعم المعنوى

للحديث بقيه لكن أصابعى بدأت تؤلمنى فاستسمحكم أنهاء المقال على وعد بلقاء متى شاء الله

جنرال بهاء الشامى