مين اللى بيغتصب المصريين خلف مصنع الكراسى ؟؟؟

السؤال الهام والجوهرى والمنطقى والشائك ليه شباب اليومين دول مش طايق نفسه ومش طايق البلد رغم أنه مش أخوان ولا متعاطف معاهم

للأجابه على هذا السؤال سنتعرض لشرائح كثيره ومتعدده لكن عاوز أعطى مثال قبل سياق الحديث

كنت فى زيارة مدير معهد الأورام بطنطا وطبيعتى لما بكون قاعد مع أهل التخصص تجدنى مستفز لكى أستطيع الحصول على أى معلومه منهم وسألته بضحك هو ليه من ساعة حضرتك مادخلت الطب السرطان أنتشر بهذا الشكل وكل يوم السرطان بيزيد  ؟؟؟

الأول عرفنى ماهو السرطان

هو نمو غير طبيعى لخلايا طبيعيه وهذا النمو حسب مكانه بيعمل مشاكل معينه والأبحاث الطبيه حتى لحظة كتابة البوست لم تحدد سبب فعلى وحاسم للسرطان لكن العوامل الوراثيه لها دخل فيه وأشطر جراحى الأورام هم الأطباء عديمى الرحمه بحيث لاتأخذه شفقه على المريض وقت أستئصال الورم حتى لايترك له أى جذور بالجسم

السرطان لم ينتشر كما قال لى ولكن ماأوهمنى أنه أنتشر وتوغل هو سهولة طرق الكشف عن الماضى وقالى أن السرطان موجود من زمان جدا لكن كان أكتشافه مستحيل وكان المريض بيموت من غير مايتم تحديد سبب موته وضرب مثل وقال الرسول مات بالحمى فهل مات محموما اليوم وأكتشفت أن الفراعنه كان يعرفون عن السرطان وكان الكلام بيجيب بعضه وتعالى نرجع تانى لموضوعنا بس خلى الجزئيه دى معاك ضرورى 

أبن طبيب أعالج عنده يعيش فى رغد من العيش وكل طلباته مجابه وعايش زى مابنقول عيشه ملوكى ولما بتكلم معاه لاحظت نفس النبره عنده

الدكتوره إلهام هانم التهامى طلبت منى كتابة توضيح لهذه الظاهره لأنها ملاحظاها فى المجتمع اللى عايشه فيه رغم أنها من علية القوم

الملخص أن الظاهره موجوده ومنتشره وليست قاصره على فئه معينه لكنها أيضا منتشره بين شباب الأغنياء

معذره عاوزك تراجع حلقات سلسلة اللامعقول فى عالم العقول لأنى أتكلمت فيها فى حلقة البنطلونات المقطعه عن طرق أستهداف أعمار معينه وعاوزك تراجع حلقات وزير الغلابه علشان محدش يقولى أنت بتخترع كلام جديد لأنه مذكور بالتفصيل فى هذه الحلقات وأن كان بطريق غير مباشر

هل الفساد قاصر فئه معينه الأجابه بالطبع لألألأ

هل الفساد مكانشى موجود أيام عبد الناصر طبعا كان موجود لدرجة أن عبد الناصر كان بيكلف الشرطه العسكريه بضبط سعر سلعه  معينه زى الأرز مثلا 

الفساد كان موجود بشراهه أيام السادات وكلنا فاكرين مصطلح القطط السمان وحيتان الأنفتاح

الفساد كان موجود للركب فى عصر مبارك بيع أراضى وأغتصاب حقوق الغير وكافة أنواع الفساد وبكل صوره وأشكاله وكان واضح جدا فى تعينات الوظائف وكانت وزارة الزراعه رمز صارخ للفساد وكلنا عارفين الكلام ده مش جديد علينا

بعد 2011 وأغتصاب حكم مصر من الأخوان هم أنفسهم مارسوا الفساد فى أبشع صوره لدرجة أن الشاب أمين عبدالناصر أبن أخت أحمد أبو بركه المستشار القانونى لجماعة الأخوان أتعين فى وزارة الكهرباء قبل ماينتهى من الأمتحانات وتظهر النتيجه ويتعرف أن كان حينجح ولا لأ

والسؤال الآن هل السيسى الحاكم الحالى أستلم البلد وهى كلها ملايكه وأنبياء وخلفاء راشدين ... الأجابه بالطبع لأ بل أستلمها زى مابنقول بالبلدى منقوعه فى  محاليل مركزات الفساد

طيب لما الفساد مش جديد علينا وكل لما بتمر الأيام بيزيد ويزيد هل من المنطقى أن أحاسب عليه السيسى ؟؟؟

تعالى نتكلم بالبلدى شويه

الناس لما شافت السيسى ومن خلفه الجيش وقفوا بالمرصاد للأخوان تخيلوا السيسى معاه فانوس علاء الدين وبضغطه على زرار سينتهى الفساد فى لحظه ويمكن أنا نبهت لخطورة محاربة الفساد بشكل جذرى وأعطيت أمثله لفشل التغيير الجذرى فى حلقات حرب الخليج العربى 

الشباب كان متعشم عشم خيالى أن السيسى حيقوموا فى يوم يلاقوه قضى على الفساد وكل واحد حياخد حقه فى التعيين والحصول على شقه ويدخل قسم الشرطه يتعامل معامله آدميه ومحدش حيمد إيده فى جيب المواطن وياخد اللى مش من حقه ومن هنا الشباب عندهم حالة صدمه فى السيسى نفسه

فى جلسه مع الدكتور محمود نصر أحد من تم ترشيحهم لمنصب وزير الزراعه وسألته عن سبب رفضه للمنصب فقال لى أنا راجل كبير فى السن ووزارة الزراعه محتاجه نسف من جذورها من أصغر موظف لأكبر تخين فيها وصعب أنك تطهرها فى 10 سنوات لأنها من الوزارات التى يطلق عليها الوزارات اليوميه اللى بيعتمد عليها الشعب فى أكله وشربه ولو حاولت تطهرها فى سنه ممكن تقع وخلال السنه دى الشعب مش حيلاقى ياكل والعمر مش حيسعفنى أطهر حتى ربعها

طبعا الفساد شئ محبط ومهبط للعزائم ويوصلك كشاب فى مقتبل الحياه للأحباط واليأس لما تلاقى الفساد قدامك فى كل مناحى الحياه من أول لما تصحى لحد ماتتخمد تنام وطبعا سلوك هؤلاء الشباب شئ طبيعى  جدا لكن اللى مش طبيعى هو تحميل السيسى أخطاء الحكام والشعب على مدار 70 عام ماضيه

طبعا بعد السيسى مامسك قضايا الفساد التقيله بدأت تظهر وده مش معناه أن السرطان مكانشى موجود لكن طرق أكتشافه الحديثه بدأت توهمك أنه وليد اليومين دول زى وصف طبيب الأورام

تعالى نتكلم بصراحه ماهى وظيفة أعضاء مجلس النواب ؟؟؟

الحصانه لو ماتعرفشى علشان تخلى النائب محدش يقدر يكلمه لما يفتح ملف فساد ويقدم أستجواب

مجلس النواب هو مجموعه من المواطنيين الذين حصلوا بموجب توكيلات شرعيه على إدارة شئون باقى المواطنين ومهمتهم مقتصره على الرقابه والتشريع

أذن مجلس النواب هو المنوط به محاربة الفساد مش رئيس الدوله زى مابتحلم ومجلس النواب دول أختيار حضرتك بدون أى تدخل من السيسى يعنى لازم تتحمل خطأك لو فيه خطأ أو تعدل من أختيارك لو عاوز أفضل وهنا نطرح سؤال كم قضية فساد ناقشها مجلس النواب فى خلال السنوات الماضيه ؟؟؟  



الأجابه صفر فلماذا عاوز تحملها للسيسى وطبعا الفساد بيكون من الحكومه يعنى مش مطلوب من الحكومه تحارب لك فساد اللى مطلوب يحارب الفساد هم أعضاء مجلس النواب واللى بيختار النواب هو حضرتك يعنى الكره فى ملعبك

فى حلقات وزير الغلابه قلتلك أن كمال الجنزورى لاحظ أن أوس البلاوى وأوس الفساد فى البلد هم أعضاء مجلس النوام ولما جه يحط شوية ضوابط لهم هيجوا الدنيا عليه ومعاهم شوية وزراء لهم مصالح

كلمه للشباب محدش حيحل لك مشاكلك ولاحد حيجيب لك حقك أنت اللى حتجيب حقك وبالطرق الشرعيه والقانونيه وأنا اللى برجوك ماتسيبشى حقى وحقك وأنزل وأختار مره صح وأنتخب نائب برلمان يجيب حقنا مش يمص دمنا  ولو أنا كانت أختيارتى خطأ وبعترف قدامك أن طول عمرى أختيارتى فى هذا الصدد كانت خطأ ويشوبها الفساد وأنت أتعلم من خطائى وأختار أنت صح أنا فى عرضك وصلح غلطتى 

لو قرأت حلقات ملف الداخليه ستجد أن سبب فساد الداخليه هو عضو مجلس النواب وحلقات الجنزورى وضحت فيها أين يتم زراعة الفساد وأنا بقولك اللى حيحارب الفساد هو صوتك وأختيارك وأما أنك تغلط غلطتى وتختار حرامى أو تصحح خطأى وتختار واحد محترم يامحترم

جنرال بهاء الشامى