طراطير وصفافير والهبد العبيط رقم 1

فى أول أنضمام مينا بركات لفريقى وتعينه ناشر بصفحة الأخوان خوارج هذا الزمان حذرته من نشر أى بوست مسروق وحذرته من نشر أى أخبار مفبركه للحصول على الشير واللايك وحذرته من مسح أى بوست أو تعليق لأى حد طبقا لقواعد الفريق

حقيقى مينا ألتزم جدا بتعليماتى لكن فوجئت فى يوم الصبح أن فيه بوست ليا شخصيا أتمسح من على الصفحه ولما سألت قال لى أن هو اللى مسحه وكان البوست بخصوص خبر إيقاف أمدادات شركة أرامكوا لمصر

أتناقشت معاه وكانت مبرراته أن الخارجيه المصريه والسعوديه نشروا بيان بتكذيب الخبر

سألته عن توقيت نشر البيانين فقالى أن البيانين صدروا فى وقت واحد وبعد ثلث ساعه من نشر الخبر ففهمته أن تصريحات وبيانات المسئولين بهذه الطريقه وبهذه السرعه تدل على أن البيانين كاذبين وأن فيه أتصال تم على مستوى عالى وأتفقوا على لم الدور إعلاميا

لم يقتنع مينا بركات بما قلته له وخصوصا أن الموقع اللى نشر البيانات مواقع حكوميه فطلبت منه الأنتظار والأيام ستثبت صدق كلامى

بعدها بيومين تحرك وزير البترول المصرى وراح العراق وتانى يوم راح الجبير يبوظ لنا الطبخه فى العراق وأعلنت إيران عن عرضها تمويل مصر بالبترول اللى تحتاجه بالشروط اللى تعجبها وبطريقة السداد اللى تريح مصر (( أيوه ياجدع إيران تتمنالك الرضى ترضى وعارفه قيمتك حتى وأنت بتعانى ولو السيسى أرسل رئيس مجلس مدينة كفرالزيات بصفه رسميه لأيران حيطلع الخومينى من قبره يستقبله ويرجع يموت تانى )) وعندى أمارات كتيره على كلامى ورجعت كلمت مينا بركات وأقتنع بوجهة نظرى ومن ساعتها وهو تلميذ نجيب بيسمع الكلام علشان يتعلم

اللى عاوز أقوله لحضرتك من الواقعه دى أن كلام المسئولين دائماً يتسم بالدبلوماسيه وإياك تنخدع فى كلامهم وأقرب مثال عندنا رئيس دوله ليل نهار بيرضع فى الميكرفون وبيقول كلام يهز جبال لكن البراهين على الأرض بتقول عكس كلامه وتدل على أنه ظراااااااط كبير

يعنى مالكش دعوه ببيانات دعم التعاون المشترك وبحث سبل تنمية العلاقات الثنائيه والكلام الأنشائى ده أنت تسمع البيانات وتركز فى تحركات المسئولين بعد كده وأنت تفهم أسباب الزياره والمقابله الحقيقيه وتعالى نضرب مثال فى موضوعنا

أخلص الناس لك عدوك لأنه يريد أن يثبت لك ولائه هنا تستطيع أن تستخدمه لصالحك لكن بحذر وهنا تكمن البراعه فى توظيفه

بعد توقيع أتفاقية طراطير وصفافير فى القاهره والضجه اللى حصلت عليها خدت جنب على الفيسبوك وأبتعدت عن الكلام فى الموضوع ده واللى يسألنى أقول له معنديش رؤيه حاليا فى أنتظار التحركات العمليه من المسئولين ولم أنشر أى بوست عن طراطير وصفافير سواء بالتأييد أو المعارضه وناس كتيره أنتقدتنى زى الأستاذه الصحفيه حمديه ذكى  لأنى مش عاوز أتكلم بدون رؤيه كامله ومش علشان أتنين مضوا ورق قدامى يبقى أطلع أحلل سواء بالمعارضه أو التأييد لأنه هنا حيكون تطبيل مش تأييد

كانت أعصابى ساعتها من الهجوم والنقد عليا فى الحضيض وخدت كلام فى جنابى يهد جبال لأن الناس كانت منتظره منى أى تحليل أو توضيح بس أتكلم أزاى والرؤيه أمامى غير واضحه

كان فى الوقت ده عمنا أبو بنطلون رصاصى نازل توقيع أتفاقيات شمال ويمين والمشاكل حوالينا من كل مصيبه والأخوان سانه سنانها قوى فى موضوع طراطير وصفافير وقنواتهم شغاله الله ينور والسيسى الخاين والأحتلال السعودى وكدهووون وأشى بقى يقولك الأتفاقيه فى صالحنا وشروطها أحنا اللى كسبانين وشغل التطبيل اللى مايكلشى معايا لأنى مش مؤيد لحاكم أنا مؤيد لسياسته وطريقة إدارته ولما أشوف حته من أرضى بتروح منى لبلد تانيه حتى لو حقها مش حطبل وأؤيد يبقى كده تأييدى مبنى على حاله عاطفيه نشأت بينى وبين الحاكم وممكن يضيع البلد وأنا قاعد بطبله وده مش طبعى

 أوبا وفى يوم أقرأ خبر أن مصر واليونان وقبرص اللى أتوقعت أتفاقياتهم قبل السعوديه أرسلوا ورق الأتفاقيات للأم المتحده والواد خالد على رفع قضيه بوقف أتفاقية طراطير وصفافير

فريره جريت على القانون الدولى المعنى بشئون ترسيم الحدود ووقعت على كتاب لعمنا مفيد شهاب خبير القانون الدولى وقعدت أقرأ لحد ماأعصابى أرتاحت وبدأت أفهم وأربط الأحداث

شمرت كمامى وروحت نازل على الفيسبوك بتحليلات غامضه عن طراطير وصفافير وتحديت العالم كله وقلت مش حتتسلم ومش علشان خالد على رفع قضيه خالد على ده مصلحه وبيتوجه توجيه غير مباشر الموضوع أكبر من كده وخالد على سكه فقط لتهدئة الشعوب اللى مش فاهمه سياسه لحد ماالموضوع ينام

بدأت أنزل بوستات أسئله غامضه وأتشهرت وقتها بالغموض وكل لما الوقت يمر تتأكد تحليلاتى التى لم أعلنها سوى للمقربين وشفويا لحد ماأبن تنزيله بدأ يدخل فى ليلة غاز شرق المتوسط وبدأت أرد على جعجعته وبدأت الناس تتقبل فكرتى

لتفعيل أتفاقية حدود ثنائيه وتحويلها لمعاهده دوليه ملزمه للتخين فى المجره الكونيه لابد من إرسالها للأمم المتحده علشان لو دوله عاوزه تعترض عليها يكون قدامها 60 يوم ثم تتحول تلقائيا لمعاهده ومش من حق حد يعترض عليها فهل أرسلت السعوديه ومصر أتفاقية طراطير وصفافير للأمم المتحده رغم مرور سنوات وهل لو أرسلتها ستوافق إسرائيل بدون إعتراض ؟؟؟

طيب ليه ده محصلش وليه وقعوا أتفاقيه أمام الناس وكان غرضهم إيه من توقيع ورق وخلاص وأثارة بلبله وإحباط مؤيدى أبو بنطلون رصاصى وإيه دور خالد على وأزاى تم تحريكه بطريق غير مباشر لخدمة أهداف غير معلنه وهل كانت فيه صفقه فى القصه دى ولا مفيش وإيه موضوع محطات توليد الطاقه الجنوبيه لتصدير الكهرباء للأتحاد الأوروبى وماهو دور قضية خراخشنجى فى هذه الليله وهل أبو بنطلون رصاصى ممكن يفرط فى حباية رمل ولا كانت الليله مصلحه لبلده وتحمل إهانات كلاب السكك علشان بلده وليه خالد على خد سنه مع أيقاف التنفيذ فى قضيته كل الأسئله دى سنجيب عنها الحلقه القادمه متى شاء الله

سهل أنك تقرأ الأخبار اليوميه ولا تلفت نظرك وسهل أنك تكون متابع جيد لنشرات الأخبار لكن ربط التحركات والأحداث محتاج تكون قارئ مزكرات سياسيين بالعبيط وقبل كل هذا محتاج توفيق من الله ليهديك للربط الصحيح لما يحدث حولك فعليا مش تصريحات مسئولين كلها دبلوماسيه 

جنرال بهاء الشامى