معجزة جيش وشعب رقم 8

كانت رحلتنا عبر التاريخ قد توقفت للتزود بالوقود والآن وبعد أن تزودنا بكل مايلزم فى رحلتنا عبر التاريخ تعاود طائرتنا الأقلاع فبرجاء ربط الأحزمه وعدم التدخين وإغلاق الموبيلات وياريت كل واحد يلتزم بكرسيه وبالنسبه للناس اللى بتقول الطياره زباله ومعفنه وبنزينها بيخلص بسرعه أحب أقول لهم نظرا لأن عدد المسافرين والمتابعين ضعيف وضئيل قررانا ترشيدا للنفقات ناخد الطياره الصغيره ولما العدد يكبر حناخد الطياره الكبيره وعاوز سعادتك تبص على التفاعل وتقارنه بالمجهود المبذول 0000 بأمانه حاجه تحبط بجد وتجيب الجلطه وماتشجعشى على الأستمرار

طبعا ساهمت الأهرام وهيكل فى خطة الخداع لكن اللى خلى أسرائيل تصدق أن أى تحركات فى هذا الوقت مناورات لأن مصر عملت معظم مناوراتها فى الخريف

كل العوامل اللى قلت لحضرتك عليها خلت جولدا مائير تقول على السادات  وقتها لهنرى كسينجر أن السادات   أراجوز وبهلوان سياسى ولابيحل ولا بيربط لكن برضوا جولدا مائير فى نفس كتابها (( قصة حياتى )) بتقول على السادات بعد مرور 6 سنوات لا أعرف كيف سرق مننا السادات سيناء كامله أنه داهيه وثعلب سياسى (( الكتاب موجود على موقع البرامج الخاص بى )) وعلى فكره أستعنا فى كتابة السلسله بجزء كبير من هذا الكتاب ومعرفشى ليه وزارة الثقافه مش مهتمه بنشر هذا الكتاب أو على الأقل تتبنى نشره أى جريده قوميه على حلقات مع كتاب مذكرات موشى ديان وعاوزك ياريت تقرا المقال ده الله يرضى عليك علشان توفر عليا مجهود كبير

http://genralbahaaelshamy.blogspot.com.eg/2016/09/blog-post_13.html?spref=fb

فى كتاب (( حاييم هيرتزوج )) (( حرب أكتوبر والأيام الحاسمه ))  بيقول فيه (( من سوء الحظ أن المخابرات العسكريه الأسرائيليه لم تقرأ الأهرام بعنايه أو قرأتها كما أراد لهم السادات أن يقرأوها وياريت الأخوه المتابعين يقروا مذكرات القاده والمحللين  الأسرائيليين علشان يعرفوا أن الناس دى فى لحظات صدقهم مع أنفسهم بيعترفوا أن السادات عرف يخدعهم كلهم

لم يكن بيجال آلون القائد العسكرى المخضرم  بعيدا عن المشهد الخداعى وكان كل تفكيره فى المشروع الذى يحمل أسمه وكان آخر تصريح له قبل الحرب يوم 3 أكتوبر بيقول فيه (( أن أحتمالية الحرب أقل من القليل )) خلى بالك من الغرور والثقه والأستهانه بالخصم

أما موشى ديان وزيرالدفاع الأسرائيلى تعالى نشوف كل تصريحاته قبل الحرب وحناخدها من كتاب أعترافات ديان لأن موشى ديان له كتابين عن حرب أكتوبر إعترافات ديان وقصة حياتى

** فى 17 أغسطس 1972 : أن حالة اللاحرب واللاسلم لاتضايق أسرائيل فأن كانت هذه الحاله تضايق العرب فهذه مشكلتهم

** فى 4 سبتمبر 1972 : أن الهدوء يسود حولنا على جميع الجبهات وأن خروج الخبراء الروس من مصر يمثل تحسنا كيفيا فى الوضع الأمنى الأسرائيلى

** فى مايو 1973 كنت قلتلك عن قرار حرب للسادات فى هذا التوقيت  وأوعى تكون نسيت بسرعه  كان موشى ديان عمل تعبئه جزئيه مش عامه وخلى بالك علشان فيه فرق بين العامه والجزئيه  وطلب من قادة الجيش  يستعدوا لأحتمال الحرب (( كلمة أحتمال الحرب تفرق كتير فى العلوم العسكريه يعنى أمر مستبعد ))

** فى يوليو 1973 : خلى بالك علشان التصريح ده مهم جدا وموجود على مجلة التايم وحلله بدماغك علشان تعرف كلام جولدا مائير لنيكسون أن المصريين ينسوا حدودهم القديمه  كان طالع منين فعمنا موشى ديان قال  ((  أن السنوات العشر القادمه ستشهد تجميد لحدود أسرائيل على الخطوط الحاليه ولن تكون هناك خلالها حروب بين العرب وأسرائيل )) وعلى فكره التصريح ده عاوز مقاله لوحده أنا قرأته أكثر من مره وكل مره أكتشف فيه حاجه

** فى 11 أغسطس 1973 : فى أحتفال تخريج دفعه جديده من كلية أركان الحرب قال (( أن موازين القوه العسكريه فى صالحنا ونحن متفوقين على كل العرب مجتمعين ومهما كانت نوايا العرب وتوجهاتهم فهم غير قادرين على تجديد الأعمال العدائيه لأن سياداتنا العسكريه على الموقف هى نتيجة مزدوجه لأعتبارين تزايد ضعف العرب من ناحيه وتزايد قدرتنا نحن من ناحيه أخرى وأن العرب لن يستطيعوا تغيير واقعهم على الأقل فى المستقبل القريب ولدينا خطط سياسيه على المدى البعيد ليظلوا على حالهم ننفذها بواسطة بعض الأصدقاء )) الجمله المطوله دى لوحدها محتاجه سلسلة مقالات تفسرها زى سلسلة الصقر الذهبى

دى كانت بعض مقتطفات سريعه من بعض الكتب ومزكرات السياسيين اللى عاصروا الفتره دى وخلاصة عصارة كتاب ((  أوهام اليقين )) لكن اللى عاوز أكرره ليه الدوله مابتهتمشى بكتب موشى ديان وجولدا مائير لأنك لو قرأتها حتفهم حاجات كتير بتحصل دلوقتى ولو كان بإيدى الأمر أقسم برب الكعبه كنت أمرت بتدريس هذه الكتب لأولادنا فى المدارس علشان يعرفوا تفكير وعقيدة عدوهم التقليدى وقبل ماحد يقولى أتفاقية كامب ديفيد تمنع تدريس كتب زى دى حقوله أحنا مصريين ومعروف فى الكون كله طبعنا العناد ونعرف نلاقى لها مخرج ولازم العيل فى الحضانه يبقى فاهم مين اليهود ومين أسرائيل ومين أمريكا أحسن بيحز فيا قوى أن بعض شبابنا مبهورين قوى بأمريكا وعاملينها قدوه لهم

أوهام اليقين لم تكن ببعيده عن صناع القرار الأمريكى ووسط هذا الصخب يستطيع أول يهودى الوصول لمنصب وزير الخارجيه فى أمريكا فى يوليو 1973 (( هنرى كسينجر )) وكنت قلتلك قبل كده فى نفس السلسله أنه كان مستشار الأمن القومى لريتشارد هارد نيكسون وأستطاع هذا الداهيه اليهودى (( ده بقى مش عاوز كتب ده عاوز كليه تدرس تاريخ حياته ))  أن يصبح أقوى رجل فى أمريكا بعد أن أزاح من أمامه وليام روجرز أشهر وزير خارجيه أمريكى فى القرن الماضى وعرف يستغل كويس قوى إنشغال نيكسون فى فضيحة ووترجيت وأزمات الخروج من حرب فيتنام  وعدم تعين مستشار للأمن القومى من قبل نيكسون  وعرف ينشر أتباعه فى الخارجيه الأمريكيه وتقدر من الآخر تقول أنه كان رئيس أمريكا الفعلى لكنه قبل 1973 كان بيتعامل مع ملف الشرق الأوسط بنوع من اللامبالاه فكانت له مباحثات سريه مع حافظ أسماعيل حول مشكلة الشرق الأوسط وهو اللى قال بنفسه فى كتابه (( محاورات فى الدهاليز )) أنه كان بيتلاعب  بحافظ أسماعيل  وأنه كان بيحاول يكسب وقت من مباحثاته السريه معاه

فى 26 سبتمبر ظهر هنرى كسينجر كنجم للنجوم وكوزير لخارجية أمريكا فى الأمم المتحده ودعا جميع وزراء خارجية المنطقه المعنيين بقضية الشرق الأوسط لما أسماه محاورات تمهيديه والوصول لحلول جزئيه وخلى بالك معايا يكون من نتيجتها إعادة فتح قناة السويس كمرحله أولى تعقبها مفاوضات أخرى وكلف جوزيف سيسكو بالقيام بجولات مكوكيه بين غرف الوفود العربيه تحت أشرافه وهنرى كسينجر هو صاحب المصطلح السياسى (( جولات مكوكيه )) فى نفس الوقت عقد هنرى كسينجر أجتماعا مع أبا أيبان سفير أسرائيل لدى واشنطن  وأتفقا على محاولة أيجاد حل جزئى لأعادة أفتتاح قناة السويس  وأتفقا على أن يبدأ مساعيه بالأردن لأنه كانت فيه زياره مرتقبه للملك حسين أبو الواد نايتى فى منتصف أكتوبر 1973 لألقاء خطاب بالأمم المتحده وعلى فكره قبل حرب 1973 مكانشى معترف باللغه العربيه كلغه رسميه فى الأمم المتحده وكان أى رئيس عربى لازم يلقى كلمته باللغه الأنجليزيه أو الفرنسيه وكان من نتائج حرب أكتوبر ياآيات ياعرابى الأعتراف الرسمى والدولى باللغه العربيه كلغه رسميه عالميه ونرجع لموضوعنا وياريت لما تلاقينى بخرج بره الموضوع حد يشدنى ويدخلنى الموضوع تانى ... المهم كسينجر قال لأيبان لو الملك حسين عرفنا نجيبه حيبقى سهل نجيب مصر ولو جبنا مصر  كله حيجى لوحده بدون مجهود

فى نفس اليوم بالليل وفى نييورك دعا هنرى كسينجر وزراء خارجية الدول العربيه التى لم تقطع علاقاتها مع أمريكا بعد حرب 1967 لعشاء ودى ودعا معاهم الأمين العام لجامعة الدول العربيه محمود رياض والكلام على لسان كسينجر فى كتابه بيقول كل الوزراء العرب كانوا مبهورين به ووصفوه بأنه ساحر فيتنام وطلبوا منه أن يمارس سحره فى الشرق الأوسط  (( الناس اللى بتتكلم على الأنبطاح ياريت تقروا التاريخ وركز فى اللى جاى يابتوع الأنبطاح ))

دعا هنرى كسينجر الدكتور محمد حسن الزيات وزير الخارجيه المصرى للأجتماع به فماذا طلب كسينجر من الوزير المصرى هذا ماسنعرفه فى رحلتنا القادمه لأنه يتحتم علينا الآن الهبوط بطائرة الزمن للتزود بالوقود فبرجاء ربط الأحزمه وعدم التدخين وصحبكم فى هذه الرحله وسيصحبكم فى الرحله القادمه

جنرال بهاء الشامى