■■ الأرنب وصل بيتك ومعاك العلف اللى
قالك عليه صاحب المكان اللى أشتريت منه الأرانب وتعالى نشوف بقى حنتعامل مع الأرنب
أزاى
■■ قلنا قبل كده أنواع العلف ثلاث أنواع نمو وتسمين
ومرضعات وعلف النمو ترتفع فيه نسبة الألياف اللى مطلوبه جدا فى مراحل النمو وعلف
التسمين نسبة الدهون فيه مترتفعه وتصل لـ 3 % لكن أنا شخصيا مفضلشى أستخدام علف
التسمين علشان بيتلف بسرعه ومدة تخزينه ضعيفه جدا ومشاكله كتير مع الأرانب وكل
الهيصه دى علشان 1/2 % فقط من الدهون يبقى نخلينا فى علف النمو بالنسبه للأرانب
الصغيره وبلاش علف التسمين أما علف المرضعات فضرورى جدا بالنسبه للأمهات الحوامل
والمرضعه والذكور الشغاله نظرا لأرتفاع نسبة البروتين فيه لـ 18.2 %
■■ حنفترض أنك جبت أرنب بياكل مثلا علف من شركة بهاء
والشركه مش عجباك أو عاوز تغيره أو عندك أرانب قديمه وكلها متعوده على علف من شركة
سمير فى هذه الحاله حنتصرف أزاى لأن تغيير النظام الغذائى للأرنب بطريقه فجائيه
ممكن يعمل مشاكل
■■ حأكل الأرنب أول لما يوصل عندى علف من بتاع شركة بهاء اللى
الأرنب متعود عليه يوم وأتنين لحد الأرنب مايتعود على المكان الجديد وأحس أن
الأرنب أتعود على المكان وسلوكه مع الأكل طبيعى أبدأ أقلل من علف شركة بهاء مثلا
20 جرام وأحطهم من علف شركة سمير وعندى الأرنب بياكل 120 جرام فى اليوم وأول يوم
أقلل 20 جرام من علف شركة بهاء وأعوضهم من علف شركة سمير وأقلب العلف وتانى يوم
أزود النسبه وأخليها 40 جرام وأعوضهم من شركة سمير وهالما جرى لحد لما يعدى أسبوع سيصبح عندى بعدها الأرنب
بياكل علفه كله من شركة سمير وتحول نظامه الغذائى بشكل تدريجى وبدون أى مشاكل
■■ لاحظت أن فيه أرانب من الصغيره بيعضوا بعض على طول تعرف
أن عندك مشكله أما أن عندك الأرانب عندها نقص فى الألياف ودى على الفور بتحط لهم شوية تبن فى برام على جنب بعيد
عن العلف نهائيا واللى محتاج حيروح ياكل منها أو الأرنب ده عنده سلوك عدوانى وعندك حل من أتنين أما أنك
تعزل الأرنب العدوانى فى مكان لوحده وتسجل فى سجلاتك هذا السلوك أو أنك ترشهم
ببخاة ميه على جسمهم وخصوصا الأرنب العدوانى وطبعا حتكون شايل برام الأكل وطبعا
نسيت أقولك برام الأكل مايهوبشى ناحيته ميه ... ومية الأرانب لازم تكون نظيفه جدا لدرجة أنك أنت
ممكن تشرب من برام الأرانب وغير كده تبقى بتهرج
■■ ملاحظة سلوك الأرانب مهم وضرورى ولازم تبص على أسنان
الأرانب ولو لقيت أرنب أسنانه مش طبيعيه وفيه أسنان نموها مش طبيعى فورا لازم
تقصها ببنزه وتسجل ده فى سجلاتك وهذا الأرنب وأخواته وأمه وأبوه لازم يتم
أستبعادهم من عندك وتحط الأرنب ده تحت ملاحظاتك لأن أسنانه حتكبر تانى وتفضل
تراقبه وتقصها لحد لما يوصل سن الدبح أبو البيع كلحوم وتخلص منه ومن أخواته وأبوه
وأمه ولو خالته أو عمته موجوده فى القطيع عندك تخلص منهم فى أقرب فرصه لأن ده مرض
وراثى مالوش علاج غير الأستبعاد وقص الأسنان كل فتره
■■ كل يومين أو تلاته أحط صوابعى فى ودان الأرانب
ومراقبتها علشان لو ظهر فيها أى تصمغ وتعالى بقى ندخل فى الجد ونتكلم فى الموضوع
ده
■■ معنى أنك تحط صوابعك فى ودن الأرنب وتلاقيها مثلا فيها
دهون وكده خلى بالك أنا بعرفك أن المرض لسه فى أول مراحله ومتحولشى لسه لحالة تصمغ
الآذان وفورا لازم تعالجه والحاله لسه فى أولها وأنا بفضل العلاج بالطرق البدائيه
فى هذه الحاله والأبتعاد عن الأدويه
■■ ماهى طريقة علاج التصمغ ؟؟؟
حتمسك الأرنب وزى ماقلتك قبل كده لازم يكون عندك ماء أكسجين
وحتنقط فى ودانه الأتنين كل ودن كام نقطه وتمسك ودان الأرنب وتلفها زى ماتكون
بتعصر غسيل لمدة نصف دقيقه وبعدين تسيبها وتكرر لقصه دى مرتين والأرنب لوحده حينفض
ودانه ويطلع ماء الأكسجين منها وبعد كده تحط فى كل ودن نقطتين جلسرين طبى
■■ تصمغ الآذان نوع من أنواع الجرب ومعنى أنه يصول لحالة
تصمغ وتلاقى فيه عجين فى دوان الأرنب معناها أنك مهمل فى النظافه
■■ حنفترض لأى ظروف أهمال وصلت الحاله معاك للتصمغ يبقى
قبل ماأحط ماء الأكسجين وبملقاط حواجب وبالراحه بشد الصمغ ده من ودن الأرنب وبعدها
أكرر الخطوات السابقه
■■ نكتفى بهذا القدر اليوم وشرحنا فيهم حالة مرض وراثى
وحالة ظهور التصمغ فى الآذان وإلى لقاء قادم بأذن الله
جنرال بهاء الشامى
انت مكملتش موضوع الارانب ليه
ردحذف