الصقر الذهبى رقم 60

إنتبه من فضلك باقى حلقتان فقط ويسدل الستار عن سلسلة مقالات الصقر الذهبى ونجيب عن السؤال الدائر حتى تاريخه هل عمر سليمان حى يرزق وطريح الفراش الآن فى أبو ظبى أم قتله الموساد الأسرائيلى أم أغتالته المخابرات الأمريكيه أم مات مسموما أم مات بقذيفه صاروخيه فى سوريا

نعاود لقائنا بكم بعد توقف فى الحلقه السابقه على أقتراب الساعه من الثالثه عصرا وتفويض سليمان بالحديث مع مبارك للتنحى الكامل  بعد سفره لشرم الشيخ ولحق به علاء وزوجته وأبنه عمرو وظلت سوزان وجمال فى منزلهما بالقاهره

أستدعى طنطاوى على وجه السرعه بعض الدستورين للبحث عن مخرج لنقل السلطه لمجهول لم يتم الأتفاق عليه

حضر الدستورين وبعد جلسه قصيره أجمعوا جميعا على أن المخرج الوحيد هو تسلم الجيش لدفة الأمور ولقى هذا الحل قبول الجميع خصوصا أنه حل سيرضى مبارك لكن ماهو المخرج الدستورى لذلك ؟؟؟

أمسك سليمان بالتليفون الأرضى وطلب توصيله بمبارك فى شرم الشيخ وفعلا تم الأتصال وكان على الخط اللواء حسين محمد من سكرتارية رئاسة الجمهوريه وكان مع مبارك فى شرم الشيخ وكانت أصعب مكالمه على سليمان والحاضرين وحبس الجميع أنفاسهم عندما بدأ سليمان حواره مع مبارك

■ مساء الخير ياريس

■■ مساء النور ياعمر خير يارب

■ يافندم الأمور والموقف الأمنى  يزداد تعقيدا ولابد من أتخاذ قرارت لعودة الجماهير لمنازلها

■■ إيه اللى أقدر أعمله ياعمر ؟؟؟ لقد تركت القاهره وجيت لشرم الشيخ ولم تعد لى سلطات والسلطه أنتقلت أليك

■ لكن الأوضاع تزداد سوءا ياريس لازم نشوف حل

■■ فيه إيه تانى أقدر أعمله ومعملتوش ياعمر

■ الوضع صعب وخطير يافندم

■■ أنا قدمت كل اللى عندى وفوضتك فى كل المسئوليات أتصرف أنت البركه فيك

■ الناس رافضه التفويض يافندم

■■ ليه عاوزين إيه ؟؟؟ أنا سيبت كل كل حاجه وجيت شرم الشيخ إيه المطلوب منى أكتر من كده ؟؟؟

■ الناس مش مقتنعه وبتقول دى تمثيليه  

■■ تمثيليه أزاى ياعمر ؟؟؟ بالذمه ده أسمه كلام أنا مش عاوز حاجه ... أنا خلاص  حرتاح من المسئوليه والحكم ومشاكله أتصرف أنت ياعمر

■ أتصرف أزاى يافندم والناس مش مقتنعه والمتظاهرين رافضين أى قرار ومش مقتنعين بأى كلام ... أفتح التليفزيون يافندم ؟؟؟

■■ فيه إيه التليفزيون تانى ياعمر  ؟؟؟

■ الجماهير تزحف نحو القصر الجمهورى وحتحاصره

■■ طيب والباقيين رأيهم إيه ياعمر ؟؟؟

■ هذا ليس رأى لوحدى هذا رأى جماعى والفريق شفيق والمشير طنطاوى كلنا متفقين على هذا القرار

■■ قرار إيه اللى أتفقتوا عليه ؟؟؟

■  تسليم السلطه للجيش يافندم

■■ طيب أذا كان مفيش غير كده أبعتلى التليفزيون وأكتب الصيغه علشان أقولها فى خطاب صغير

■ مفيش وقت يافندم علشان أبعت التليفزيون لشرم الشيخ ونظل منتظرين ... الأوضاع تتفاقم وأنا خايف أحسن البلد تدخل فى بحور دم ... أرجوك ياريس عاوزين نخلص

■■ أنت عارف ياعمر أنا ولا عاوز موت ولا عاوز دم وسيبت كل حاجه وجيت على شرم الشيخ وموش عاوز حاجه ... بس قولى أنت وضعك إيه بعد التنحى ؟؟؟

■ أنا مايهمنيش وضعى حيبقى إيه أنا كل اللى يهمنى ننقذ البلد وبأقصى سرعه ياريس

■■ طيب شوفوا الصيغه المطلبوه وقولى وخلى بالك ياعمر لازم تدرسوها كويس من الناحيه الدستوريه علشان ماتقعوش فى مشكله دستوريه  

■ أوكى يافندم حندرس الصيغه وحكلمك

■■ أوكى وأنا فى أنتظارك

أنتهت المكالمه وقال سليمان على مضمونها للحاضرين المتواجدين بجواره وقال لهم الراجل خايف على البلد  وكان متفهم جدا رغم قسوتى عليه

على الفور كلف المشير اللواء ممدوح شاهين الأتصال على أحد الدستوريين والتشاور معه فى الصيغه الدستوريه المناسبه

أتصل شاهين على 3 دستوريين قانونين وأتفقوا على تسليم السطله للجيش أستنادا ((  لمبدأ الشرعيه الثوريه ))  وده المخرج الوحيد للمعضله الدستوريه الموجوده بالدستور وتعديلاته وتمت صياغة بيان التنحى كالآتى :

(( أيها المواطنون فى هذه الظروف العصيبه التى تمر بها البلاد قرر الرئيس  محمد حسنى مبارك تنحيه عن منصب رئيس الجمهوريه وكلف المجلس الأعلى للقوات المسلحه بإدارة شئون البلاد والله الموفق والمستعان ))

فورا أتصل سليمان بالرئيس مبارك وأخبره أنهم توصلوا لصيغه نهائيه وهى تتضمن تكليف القوات المسلحه كما طلبت

قال مبارك وهذا هو االمطلوب لكن أرجوك لى عندك طلب أن يتم أستبدال كلمة تنحى وتضع بدالها كلمة  تخلى كما ورد بالبيان (( تخليه عن منصب رئيس الجمهوريه )) ثم طلب منه عدم أذاعة البيان إلا بعد رحيل زوجته سوزان وأبنه جمال حتى لايتعرضا للأيذاء

■■ فقال سليمان أرجوك تكلمهم بنفسك لأنهم مش مقتنعين

■■ فقال مبارك لسليمان أوكى بس  خلوا بالكم من البلد ياعمر

■■ فقال سليمان ألا تفكر فى السفر ياريس ؟؟؟

■■ فقال مبارك وأسافر ليه ؟؟؟ أنا قاعد فى شرم الشيخ  ومش حسافر إلا للضروره وحرجع تانى

■■ قال سليمان حنعطيك فرصه أسبوع للتفكير

■■ فرد مبارك ولا أسبوع ولاغيره أنا عاوز أموت هنا وأندفن هنا

■■  فقال سليمان طيب نعطيك حصانه قضائيه محدش يعرف الأمور حتوصل لإيه

■■ فرد مبارك حصانه قضائيه ليه ؟؟؟ هو أنا عملت حاجه ؟؟؟ أنا مش عاوز حصانات ولو فيه حاجه غلط عملتها أنا مستعد للمحاسبه ... أنا لو قبلت بالحصانه ياعمر  يبقى فيه حاجه عاوز أتستر عليها

■■ تأمرنيش بحاجه ياريس ؟؟؟

■■ شكرا ياعمر وأبقوا خلوا بالكم من البلد

أغلق الطرفان الخط وكانت آخر مكالمه لمبارك بصفته رئيساً للجمهوريه وكانت دى آخر مكالمه بينه وبين أخلص المقربين منه وآخر مره يسمعوا صوت بعض

عدل سليمان الصيغه كما طلبها مبارك وأستدعى سامى عنان اللواء إسماعيل عتمان مدير الشئون المعنويه لتجهيز كاميرات التصوير ليقوم بألقاء البيان لكن بعض الحضور أعترضوا على ألقاء  سامى عنان للبيان وأصروا على أن يلقيه عمر سليمان بحجة أن الناس ممكن تفهم أنه أنقلاب عسكرى لو ألقاه أحد قادة الجيش وبعد مداولات أبدى عنان موافقته على رأى الأغلبيه 

تم تسجيل البيان بمبنى وزارة الدفاع وتم الأتفاق على أن يقوم اللواءأسماعيل عتمان بتوصيله للتليفزيون وعملوا منه نسختين للطوارئ وكان الكلام ده الساعه 4 عصرا

لاتزال الجماهير فى الشارع والقصر الجمهورى محاصر وسوزان لاتزال فى القصر ومعها أبنها فماذا حدث هذا موعدنا معه فى الحلقه القادمه متى شاء الله

جنرال بهاء الشامى