ليه السيسى صادر أموال الأخوان دلوكيتى ؟؟؟

قلنا مراراً وتكراراً أن ممارسة السياسه إحترافيه وليس جعجعه ميكرفونيه أو أمام كاميرات الفضائيات وحلق حوش وخد وهات

السياسى الشاطر اللى يقدر يحافظ على أوراق ضغطه بكل مايستطيع من قوه والسياسى الماهر البارع هو من يختلق لنفسه أوراق لم تكن موجوده ويصطنعها بنفسه 

جميع أجهزة مخابرات العالم تمارس قانون غير مكتوب لكنه عرف متعارف عليه أصبح فى شكل قانون ملزم لمن يريد الأستمرار فى هذا العالم  هو حماية العملاء لو تم ضبطهم 

لو راجعت بنفسك كل ملفات العملاء والجواسيس تجد أن الدول التى كانت تجندهم تسعى بكل قوتها لحمايتهم وعندنا عزام عزام وهبه سليم وأنشراح والقس الأمريكى والصحفيه التركيه والأربعه الكطريين فى العراق ومصر كلهم وأى عميل تسعى الدوله التى جندته لحمايته وإسترجاعه 

الأخوان صنعتهم وجهزتهم وترعاهم وتمولهم  وتخطط لهم وتحميهم أجهزة مخابرات أجنبيه وأستهدى بالله وتعالى معايا حنوضح كل شئ 

كلنا عارفين أن فيه معركه بارده بين مصر وأمريكا تدور رحاها منذ عام 2012 بضربات موجعه 

ترامب عنده خطاب أخر شهر سبتمبر وحيرمى فيه بقنبلته حل الدولتين على أساس وطن بديل للفلسطنيين ونتانياهو النهارده طرح مبادره جديده بتوطين الفلسطنيين فى أماكنهم يعنى اللى عدنك فى مصر تديله حضرتك الجنسيه ويقعد عندك على طول ومالوش حق الرجوع واللى فى السعوديه ولكويت هكذا وطبعا الحل ده ممكن يلقى قبول المهاجرين بعد مصر ماعملت دفنس أمبارح لخطاب ترامب وصرحت أن ملف القدس غير قابل للتفاوض لكنه غير مقبول لباقى الدول

كده أشتعلت حرب التصريحات بين مصر والعرب من ناحيه وبين الأمريكان والأسرائيليين من ناحيه وأنجلترا وأيطاليا وفرنسا يِشغلوا روسيا فى ملف الجواسيس الروس 

أى جهاز مخابرات لازم يحمى عملائه ويمارس كافة الضغوط للافراج عنهم أو تبادلهم مش علشانهم لأنهم خلاص أتحرقوا لكن علشان يفهم أى حد رمه خاين بعد كده متخافشى لو أتمسكت حعرف أحميك وحسخر كل قوتى للأفراج عنك لو أتقفشت وحعرف على الأقل أفرج عنك أو أبدلك 

من هنا أمريكا واليهود حيعملوا البدع للأفراج عن الأخوان أو عدم إعدامهم وإلا تبقى سمعة أجهزتهم مابتعرفشى تحمى عملائها تملى الدنيا وأى خاين بعد كده يخاف ودى حتأثر عليهم حتميا 

السيسى بيمارس سياسه بإحترافيه عاليه جدا ومعاه جيش سياسى محترف فى الخارجيه المصريه اللى معرفشى مبارك يتلفها أو يسيب الأخوان تخترقها وكلنا شفنا السيسى بعد توليه المنصب كان حريص على أستبعاد من تحوم حوله الأشاعات ومنهم مرزوق 

السيسى عارف أن الأمريكان مش حيسبوا الأخوان وحيتدخلوا بكل السبل سواء الجزره أو العصا وأنت شايف بنفسك بيعملوا معانا إيه وبيضغطوا علينا من كل أتجاه مره حقوق أنسان ومره وقف منحة أتفاقية كامب ديفيد ومره حوادث فى المنيا وبعدها يجيلك وفد كنائسى وبتتكرر كل زياره للسيسى لنوييورك لألقاء خطابه فى الأمم المتحده 

هوبا السيسى ضرب كرسى فى الكولب وخلق لنفسه ورقة ضغط جديده وصدرت أحكام القضاء بأعدام الأخوان قبل سفره 
 

هوبا السيسى برضوا قبل سفره خلق لنفسه ورقه كمان وصادر أموال الأخوان وضمها لخزينة الدوله بما يعادل ميزانية دولتان على الأقل ... الأخوان اللى قالوا مبارك معاه 70 مليار طلعوا فقراء ومعاهم ياكبدى 300 مليار وماخفى ولسه كان أعظم 

كده السيسى قبل مايسافر بقى معاه ورقة سجن الأخوان وورقة صدور أحكام أعدام ضدهم وورقة مصادرة أموالهم علشان يشتت المفاوض الأمريكى فى أكتر من ورقه عاوزنى أفرج عنهم ولا معدمشى ولا عاوزنى أفرج عن فلوسهم وحاورينى ياطيطه 

من هنا تفهم أن قرار السيسى بضم مليارات الأخوان لخزينة الدوله ضربه فى وش الأمريكان وعيالنا بتقول ضربة الوش مفيهاش معلش 

خدها من أخوك الغلبان إعدام قيادات أخوان صف أول وصف تانى بارز مش حتم دلوقتى لكن ممكن تتم فى أول 2022 أو فى شهر يوليو 2022 والحدق يفهم علشان يتعدموا فى عصر اللى يجى بعده يبقى قدام العالم أتعدموا طبقا لأحكام قضائيه تمت فى عهد رئيس سابق وموضوع ملناش فيه 

خدها من الغلبان أخوك وراجع التاريخ معاك على أقل من مهلك وفى أعرق الدول ديمقراطيه أى حاكم يمسك حكم بلد لازم الجيش يرضى عنه وأى كلام غير كده ضحك على الدقون ولبانه ملهاش عازه وبيضحكوا بيها على العيال الخايبه ومفيش حاجه فى أى دوله فى العالم أسمها أحكام القضاء مش مسيسه وأى كلام غير كده تبقى بتضحك على نفسك

ختاماً السيسى محترف سياسه والسياسه صياعه مش هز أكتاف وبيعرف أمتى يتخذ القرار فى الوقت اللى محدش يتوقعه والعالم تقوم من النوم تلايقها وخداها غز فى الوش وضربة الوش مفيهاش معلش

جنرال بهاء الشامى