الموقف الأسباجتى رقم 10

 

من فضلك لاتقرأ هذا المنشور لخطورته

لو دماغك أتكعبلت أو جرالك حاجه ماليش فيه أنا حذرتك قبل القراءه علشان عمنا خالد عربى مايقوليش منك لله كعبلت نافوخى

عندنا بكره زياره هامه لأكبر راس فى الصين وترامب عاوز يفرجه على عضلاته لعسكريه وقوته وسرعة أتخاذ القرار قبل مايقعدوا ويتفاهموا فى المسائل الأقتصاديه وفكك من العسكريه علشان الصين مش محتاجه مساعدة مخلوق عسكريا

واضح فى الفتره الأخيره أن فيه صراع بين روسيا وأمريكا على أستقطاب قردوخان علشان أهمية تركيا بالنسبه للملف السورى

أمريكا هى السند والظهر والحامى للأكراد فى العراق وسوريا ومفيش مانه على رأى ميدو من قفا كده على لسريع علشان يفوق الأكراد أحسن يفتكروا أنهم من غير الأمريكان لهم سعر وقفا يفوت ولاحد يموت وفعلا مفيش حد مات

عندنا الواد نايتى أحد أهم الفاعلين فى الملف السورى موجود فى أمريكا وضربه عسكريه أمريكيه فى سوريا ياأما بتقول أنت مالكشى عندى أى لازمه أو أنه عارف وحيتكتم يسكت وأتكلمنا فى لقاعده دى فى سلسلة مقالات الصقر الذهبى وقلتلك جورج بوش عملها قبل كده مع مبارك مع انها عيب وقلة أدب

عندك زياره لوزير الدفاع المريكى لمصر آخر الشهر علشان مناورات النجم الساطع ترجع على نفس الأسم أو بأسم تانى لأنى قلتلك فى مقالات مصر الشقيقه الكبرى الأمريكان يهمهم يعملوا معاك مناورات على حروب الأرض المكشوفه لأنك أكتر دوله عندها خبره فى حروب الأرض المكشوف

ترامب فضل صابر لحد طيارة السيسى ماخرجت من المجال الجور الأمريكى وراح ضارب الصواريخ بتاعته علشان مايحرجشى السيسى وهو عنده علشان محدش يقول ترامب محترمشى السيسى وأربط دى مع زيارة وزير الدفاع المريكى آخر الشهر

الأكراد ترفع العلم فى العراق من غير مايستأذنوا الأمريكان وتركيا تولع من الغيظ وتهدد

الكيماوى خروج من سوريا فى 2014 فتفوته فتفوته على أيد الأمريكان والروس وقالوا أنهم تخلصوا منه عند أوكرانيا لكن بصراحه أنا ماشفتش حاجه لكن اللى أعرفه أن الألمان قبضوا حق السلاح الكيماوى من سوريا على داير التعربفه وألمانيا باعت الكيماوى والروس والأمريكان قسموه فى البحر مابينهم وسوريا دفعت تمنه وانا وأنت صدقنا المسرحيه

حلب والرقه فى قلب سوريا واهم مليون مره من أدلب القريه الصغنونه اللى على حدود تركيا وأغلبها اكراد ولو بشار عاوز يضرب كيماوى يخلص بيه كان ضرب فى حلب أو الرقه وخصوصا أن الرقه كانت دواعش فقط لاغير يعنى محدش كان حيهتم ده بفرض أنه عنده كيماوى

أى قاعده جويه بصاروخ جو أرض يتم تحيدها لمدة شهر على الأقل يبقى لزمتها 74 صاروخ إلا لو فرض عضلات أو ضرب أهداف أخرى

السعوديه تهلل وترحب ده العادى طالما دوله عربيه بتدمر وبتتخرب المهم الكراسى محفوظه

البيان الروسى يقول ضرب دوله ذات سياده يعنى ياأمريكا مالكيش أى حقوق فى ضربها واللى عملتيه غلط وباقى البيان بيصب على أزداوجية المواقف الأمريكيه فى مكافحة الأرهاب

بشار يخلى القاعده الجويه قبل ضربها فيه كلام كتير وأن كان أغلبه أن الحرب السوريه أكسبت بشار خبرات عسكريه متراكمه أو وصلته معلومات عن الضربه المحتمله قبلها وأكيد من الروس

السيسى وصل مصر من ساعه تقريبا وقت كتابة المنشور ولسه حيروح مكتبه وأأكيد دلوقتى قاعد بيقرا تقارير عن الملف والأحداث الأخيره علشان يبلور موقف مصرى لكن أغلب الظن مصر ستتريث فى البيانات الرسميه

معروف أن الأيرانيين شراديح وأجدع ناس تفرش الملايه على أى تصريح أمريكى والروس أتقللا الناس فى الكلام لكن الغريب أن الروس تتطلع تتكلم بسرعه والأيرانيين لحد دلوقتى ساكتين مع أن فرنسا أتكلمت وقالت محدش يعمل حاجه فى سوريا إلا لما نت؟أكد ومتظلموش بشار والألمان قالوا أمر مؤسف ومحزن وعار عدم أتخاذ قرار ضد بشار وكل ده وأيران مش واخده بالها

المستفيد من الليله دى هى تركيا وأمريكا والسعوديه ومن الفعل ورد الفعل وألف باء تقدر تحدد الجناه والفاعلين

أمريكا بتراضى أردوخان وبتقرص على الأكراد وبتفرد عضلاتها قدام التنين الصينى وبتقلل من شأن روسيا والشعب السورى بيدفع التمن

لو فهمت حاجه يبقى خير وبركه ولو مفهمتش ودماغك أتكعبلت أسأل غيرك عمل أيه بعد مكالمتى معاه الصبح ودماغه أتكعبلت زيك

جنرال بهاء الشامى