تربية الأرانب رقم 2

■■ النهارده حنشرح أزاى تشترى أرنب لأن أهم خطوه فى بداية مشروعك

■■ طبعا أنت حددت هدفك زى ماقلنا فى الحلقه السابقه من مشروعك سواء تجارى أو علشان تاكل فى البيت وقلنا أى الأنواع أفضل بالنسبه للتجارى أو المنزلى أو تربية الفرو وتحاول تبعد عن أنواع الفرو لأنها بتحتاج لمعامله خاصه وخليها لما تكتسب الخبره الكافيه

■■ الأول لازم تحدد حتشترى منين وأنا بفضل الشراء من محطات البحوث التابعه لوزارة الزراعه ودى متوفره فى أسكندريه بمنطقة أبيس أو الجميزه بمحافظة كفرالشيخ أو مزارع القوات المسلحه لو لك واسطه أو مزارع الدكتور سامى علام أو معرض القاهره الدولى السنوى وبالنسبه لوجه قبلى معنديش معلومه مؤكده وموثوق فيها

■■ معرفتش توصل للأماكن دى يبقى عليك وعلى المزارع الكبرى الشهيره

■■ أحاول أبعد عن الجيل الأول لأنه حيكون مرتفع الثمن جدا وأخلى الجيل الأول ده بعدين لما أكتسب الخبره لأنه حيحتاج معامله خاصه لأنه لسه متعود على بيئته الطبيعيه وخصوصا لو نوع أوروبى زى البلجيكى مثلا أو البوسكات الفرنسى وتقدر تشترى من الجيل التانى حتى الثالث والرابع والخامس فقط

■■ طبعا أن حعتبرك عديم الخبره وميحا خالص وحتكلم معاك بالبلدى وببساطه وتكرز معايا والكلام اللى حقوله يتنفذ بحذافيره حذفوره حذفوره وبدون مناقشه وتحفظه جامد قوى فى دماغك وأنت رايح تعتمد على الله تشترى باكورة مشروعك

■■ الأرنب لازم يكون شعره بيلمع جدا وناعم جدا واللمعان فيه واضح لأن الصحه العامه للأرنب بتظهر على شعره وخصوصاً توازن نسبة الفيتامينات فى الجسم

■■ مناخير الأرنب ناشفه جدا جدا وأضغط عليها بالراحه لو لقيته بينزل لاأفرازات من مناخيره خد بعضك وأخلع من المكان لأن المربى اللى بتشترى منه فاشل

■■ العيون جافه ومفيش دموع ولا عماص نهائيا

■■ الودان مقعره زى المعلقه ومنتصبه ومايكونشى فيهم ودن مكسوره أو مدلدله

■■ تبص على ضوافر الأرنب كويس قوى وكل ماأرتفع فيها نسبة البياض تبقى سيئه وعجوزه وتخليك فى الضوافر اللى لونها رايح لحمار أو للون البمبى الخفيف ويكون االشعر مغطى الضوافر ولو لقيتها مش طبيعى خد بعضك وأخلع من المكان ولما تروح أستحمى بمياه سخنه وصابون غسيل وأتليف كويس بليفه خشنه

■■ الأرنب خالى من الجروح نهائيا ولازم تفليه كويس قوى

■■ تحط صوبعك فى ودان الأرنب لو لقيت فيها شئ زى الفزلين أو الكريم أبعد عنه أما الأرنب اللى ودانه فيها ماده صمغيه خد بعضك وأخلع من المكان فريره لأن صاحب المكان تاجر معفن وزباله ومهمل

■■ أقلب الأرنب وأضغط على فتحة الشرج وطلع منه زبل أو براز ولازم يكون ناشف واوعى يكون مدبب زى بذر الليمون لازم البراز يكون زى البلى ومش طرى ومش مدبب

■■ وأنت قالب الأرنب خبط على بطنه لو لقيتها بتطبل أبعد عن الأرنب وأبعد عن المكان لأن ده مربى فاشل

■■ بالراحه حاول تشد شعر الأرنب لو لقيته طلع فى أيدك ماتشتريش الأرنب ده وتعدى أيدك بالعكس على ظهر الأرنب لو الشعر رجع بسرعه ومطلعشى من ظهره شعر أعرف أن المربى ده مربى ناجح

■■ ضرورى تعرف تاريخ الأرنب ده أبوه وأمه وطباع أبو وأمه وأمه بتولد كام أرنب فى البطن الواحده وأبعد عن الأرنب اللى أمه بتجيب أكتر من 6 أو 7 فى البطن

■■ أشترى الذكور من مكان والأناث من مكان لمصلحتك لعدم ظهور أمراض وراثيه عندك ولازم كل عام تغير الذكور وتشتريها من مكان مشتريتشى منه قبل كده

حاول تكون مواصفات الأرنب زى ماقال الكتاب ودى حنبقى نقولها بعد كده بالصور

■■ حاول تعاكس الأرنب وتجر شكله علشان تشوف سلوكياته ولو لقيته عدوانى بلاش منه فيما عدا الأرنب البلجيكى وحنبقى نقول وقتها أزاى تتعامل معاه

■■ لازم تعرف الأرنب ده بياكل إيه وأسم شركة العلف ضرورى ولازم أول لما يروح عندك ياكل من نفس العلف بتاع نفس الشركه وحنشرح بعد كده أزاى تغير نوع العلف والشركه

■■ العلف أنواع نمو ومرضعات وتسمين ولازم تعرف الأرنب اللى انت بتشريه بياكل أى نوع وبعد كده حقولك ازاى تأكله على مزاجك

■■ حتربى أرانب لازم تؤمن بهذا المبدأ (( لعن الله البرسيم حامله وشاربه وساقيه )) وأياك تاكل أرنبك برسيم أحسن أقطعك من الضرب وممكن تأكله بطاطس أو بطاطا أو جزر كفاكهه مره واحده فى اليوم

■■ بحذرك الأرنب أوعى يعطش صيفاً أو شتاءاً يعنى قبل ماتشيله من مزرعته يكون شارب ميه حتى لو بالعافيه (( تشيل سن السرنجه وتحط فيها ميه وتحطها فى حنكه وتشربه غصب عنه ولو أتأخرت فى الطريق وأنت راجع بيه يبقى لازم تسقيه ولو غصب عنه

■■ الأرنب ممكن يقعد يوم ويومين من غير أكل لكن أياك يعطش وزى ماقلنا أبعد عن المدعوق البرسيم

■■ أياك الأرنب يتعرض لتيار هواء وانت بتنقله وزى ماقلت الحلقه اللى فاتت تيارات الهواء مضره جدا

■■ تربية الأرانب مربحه جدا جدا وأكتر من الخرفان والماعز لو أتبعت طريقة التربيه اللى حقولها ربنا حيكرمك أحلى كرم بس أبقى أفتكرنى

■■ كده أنا عرفتك أزاى تشترى أرنب للتربيه بمنتهى السهوله وعلى الفرازه ونتقابل فى حلقه أخرى

الأرنب اللى فى الصوره جانيت فلندر أو (( فلندر )) بيور أصلى جيل أول مواصفاته قياسيه وعاوزك تلاحظ أنتصاب الودان لا مكسوره ولا مائله وعامله زى المعلقه