قوات الردع العربيه حلم هل يتحقق

 

قوات عربيه مشتركه أو قوات ردع عربيه أو جيش عربى موحد أو أى من المسميات هل ده ممكن حدوثه ؟؟؟

طبيعى ومنعا للتأثير على قوات أى جيش لكل دوله على حده لابد أن تكون هذه القوات من خارج أعداده أو تعداده الثابت والمعروف عالميا لعدم حدوث أخلال عسكرى داخل كل دوله ستشترك فى هذا التحالف يعنى حعمل الجيش ده وستكون قوام قواته من خارج تعداد كل جيش على حده يعنى مخدشى من قوات الجيوش علشان ماتتأثرشى جيوش تلك الدول لأن ممكن مثلا ألخم هذا الجيش الجديد فى معركه فى أتجاه وألخمه وفى نفس الوقت أهاجم دوله من المشتركين فى بعد جغرافى ... أذن أحنا متفقين أن أعداد هذا الجيش ستكون بعيده عن التأثير على أعداد جيوش الدول المشتركه

عندى مصر هى أكثر الدول العربيه تعداد سكانى وعندى مصر جيشها مصنف أنه من أقوى جيوش العالم فى حروب الأرض المفتوحه ولما ابص على طبيعة جغرافية معظم الدول العربيه حلاقيها صحراويه يعنى بتندرج عسكريا كأرض مفتوحه يبقى طبيعى قوام هذا الجيش سيكون أغلبه من المصريين للسببين اللى ذكرتهم

طبعا أى جيش بيستلزم وجوده لغطاء جوى ولما يكون عندى الطيار المصرى مصنف عالميا كثانى طيار بعد الطيار الروسى ويطلق على الطيار المصرى الطيار الفضى يبقى طبيعى سيكون أغلب طيارين هذا الجيش من الطيارين المصريين 

لما تعرف أن الأسطول البحرى المصرى هو أقوى أسطول بحرى فى المنطقه العربيه يبقى طبيعى معظم القوات البحريه ستكون من المصريين 

الأسباب العسكريه والبشريه والترتيب العالمى كلها ستجعل من قوام هذا الجيش أغلبه مصريين 

عندى السعوديه فى آخر تقرير لعام 2017 تعتبر أكبر دوله عربيه عندها مخازن سلاح وأكبر دوله عندها طائرات عسكريه

الجيش السورى لسه قدامه كتير قوى على بال مايقف تانى على رجله أما الجيش العراقى ومع كامل الأحترام لكنه بعد إعادة بنائه على الطراز الأمريكى لايزال لايرتقى للمستوى القديم

يبقى من منظور عسكرى عقلانى وبدون مجاملات حيكون هذا الجيش معظمه جنود مصريه وأسلحه سعوديه وأعداد رمزيه من باقى الدول حسب ترتيبها وأمكانياتها عسكريا وماديا وممكن دوله زى الكويت والأمارات يكون أشتراكها بالسلاح نظرا لتوفر تمويل تسليح هذا الجيش الجديد بحيث أعمل جيش منفرد عن باقى الجيوش منعا لتأثيره على جيش كل دوله 

بعيدا بقى عن قيادات الجيش لأن ده سيتم التفاوض عليه وكيفية قيادته ومين اللى يقوده وآلية تحريكه وأتخاذ القرار عند حدوث أزمه وتحريك هذا الجيش فى عمليات عسكريه ضد أى دوله معتديه

أولا :

 حزود بطريقه أتوماتيكيه عدد الجيوش القويه بالمنطقه وهنا حيحصل خلل فى فى ميزان القوى وسيكون طبيعيا لصالح العرب وده حيسبب ذعر لأيران وتركيا وأسرائيل ومحدش يقدر ينكر أن الدول دى لها مطامع إستعماريه فى المنطقه

ثانيا :

وجود جيش زى ده حيخلى التخين يفكر مليون مره قبل مايفكر يقوم بعمل عدائى ضد الدول المشاركه فى الجيش

أذن وجود هذا الجيش أو هذه القوات فى صالح الدول المشتركه والدول التى ستنضم له وسيكون ضد الدول التى تفكر فى أى غباء عسكرى بالمنطقه 

هل ممكن ده يتحقق ؟؟؟

مصر لديها الرغبه والسيسى لديه الطموح القومى العربى والسعوديه ومشاكلها ومخاوفها كثيره وصاحبة مصلحه كبرى فى وجود هذا الجيش أذن وجود هذا الجيش ضرورى

مصر ونظرا لأن أكبر عدد من الجنود من عندها حتبدأ تفتح فى التطوع لأنها مش حتاخد من المجندين العاديين أو المؤهلات أذن حيبقى فيه فرص عمل للمصريين الشباب وسينعكس ده بالأيجاب على الأقتصاد المصرى وعلى سوق العماله المصريه وحيكون له تأثير إيجابى على الأقتصاد المصرى وعلى زيادة خبرات جنود الجيش المصرى

عندنا متضررين من وجود هذا الجيش زى أيران لكنها لاتملك وسيلة ضغط ومعاها فى نفس الخط تركيا لكن أسرائيل تملك الضغط على الأمريكان ولكن الأمريكان تجار سلاح لكن وأنا بعمل جيش زى ده مش ممكن أترمى فى حضن تاجر واحد وخصوصا لو التاجر ده عمل معايا الدنيئه لصالح طرف بيقدر يضغط عليه زى ماحصل بالظبط فى حادث طائرات الأباتشى أذن صفقات الأسلحه مع التاجر الأمريكى ستكون محدوده زى مصفحات عربيات أو مدرعات أو صواريخ قصيرة المدى أو مدفعيه لكن أسلحه بتحتاج صيانه أو قطع غيار أو أوبشن الذخيره بتاعها محدد ستكون بعيده عن التاجر الأمريكى وستكون فى  صالح تاجر آخر وستنعشه أقتصادياً أذن الأمريكا تقدر تضمهم لقائمة المتضررين

هل أسرائيل حتسكت على وجود هذا الجيش أو أمريكا حترضى بأنتعاش خزينة تاجر سلاح آخر وهل سترضى أنك تنتعش اقتصادياً كمصرى وهى بتعمل البدع علشان توقفلك المراكب السايره ... طبعا مش حتسكت وستكون أول المعارضين

مصر مستفيده زى السعوديه وزى باقى الدول وأن كان مصر ستزيد عليهم أقتصاديا لكن مصر بعد 30 يونيه وبعد خروجها من عباءة الأمريكان وأى عباءه أخرى لاتوجد أوراق ضغط عليها يعنى طلع مصر من أفشال هذا الجيش وتقدر وحتعمل ومستفيده 

السعوديه وباقى الدول مستفيده وتقدر تعمل وحتعمل بشرط تخرج من العباءه الأمريكيه وتستقل بقرارها بعيدا عن ختم البيت الأبيض فهل سيفعلها صانع القرار السعودى ويكون قراره نابع من مصلحته مصلحة شعوبه  أم برضوا حيروح لأمريكا ويستأذنها يعمل عمل ضد أهدافها وطموحاتها ويقولها لو سمحتى ممكن توطى بعد أذنك عشان أرزعك قلم على قفاكى

يبقى القرار النهائى فى آيادى السعوديين ويعملوا به مره عمل يكفروا بيه عن ذنوبهم التاريخيه فى حق هذا الوطن العربى المظلوم

جنرال بهاء الشامى