الخاطبه

أدردش ليه وأبربش ليه لاهو أنا إيه رغايه بلا مشاغبه بلا مضاربه أنا الخاطبه مش الدايه

عريس مبسوط غنى ومبسوط ألم نقوطه فى ملايه

عريس غلبان من الشبان أجيبله كمان تورتايه

ودى حكايه فى لعبايه وكام الساعه ويايا ؟؟؟

كانت هذه أغنية فوازير نيللى الخاطبه التى من وقت إفتقادها أرتفعت نسبة الطلاق

كانت الخاطبه بتلف على البيوت ومعاها صور بعض الشباب والشابات ولاد الناس وولاد الغلابه ومن كل صوب ومن كل حدب وكانت الزيجات تتم عن طريق الخاطبه

كانت الخاطبه بتطرح قدامكم الصور ومعاها الأسم بالكامل وتفاصيل عيلته والعناوين وكل مايلزم من معلومات وبتعمل نفس الكلام فى البيت التانى وفيه أسبوعين كل عائله بتسأل عن الأخرى وتعرف مميزاتها وعيوبها من دون التلاقى بشكل مباشر وبدون أى نوع من أنواع الأحراج بحيث لو فيه موافقه كانت بتكون عن أقتناع ومن هنا كانت الزيجات بتستمر وكانت حالات الطلاق فى مصر أقل من معدلها الطبيعى العالمى بعكس الآن حالات الطلاق فى مصر تخطت المعدلات الطبيعيه والغير طبيعيه بحيث أصبحت النسبه تقترب من 50 %

لما يكون عندى فى مصر 28 مليون أسره ولما يكون عندى 13 مليون مطلقه فأنا أمام أرقام مخيفه

كانت الخاطبه للمحافظه على سمعتها فى السوق بتمدك بكل شئ حقيقى عن الأسره اللى حتتقدم لها

النهارده بتعجبك الفتاه بتروح تتقدم لها وأهلها مابيصدقوا يلاقوا عريس وأهم حاجه عندهم حيفرش كام حجره وحيجيب شبكه بكام والفرح حيتعمل فى أى قاعه وأى كوافير ومش مهم بنتهم ترجع لهم بعد كام شهر سواء حامل أو فاضيه المهم الست هانم أتفشخرت قدام أهل الحته وقرايبها بالعفش وقاعة الأفراح والكوافير والرجاله الصراحه ملهاش كلمه دلوقتى وبيروح يمضى ويقضى باقى حياته فى هموم الديون علشان خاطر الست تتفشخر قدام أهل الحته وقرايبها

الدنيا أتقدمت ومش لازم نرجع   للخاطبه أم أيشارب بؤيه لكن ممكن نعمل ده بشكل علمى عن طريق مكاتب خاطبات تروح تاخد البيانات من عندهم وتبدأ بنفسك تتحرى قبل ماتروح تتقدم رسمى ولو حصلت موافقه تكون فيه دوره تثقيفيه للطرفين لأن أطفالنا المقبلين على الزواج لايعرفوا أى شئ عن الزواج سوى الحصان الأبيض وسى السيد

جنرال بهاء الشامى