حقيقة حادث السفينه ليبيرتى يو أس أس

هناك خزعبلات وأساطير حول غرق هذه السفينه فى 8 يونيه عام 1967 م وفيه كائنات فيسبوكيه بتقول أن السفينه كانت جايه تضرب مصر بالنووى وأن إسرائيل كانت رايحه تضرب السفينه علشان تلبسها لمصر قوم إيه طائرات مصريه أيوه أصل ساعتها كان طيران مصر كله سليم وإسرائيل مضربتوش كله على الأرض ماعدا الكام طائره اللى هرب بهم مبارك على الصعيد وبعدين إيه الطائرات المصريه عملت حركات وسرقت القنبلتين النوويتين وجابتهم مصر وهذا الكلام المعتوه بيقول أن مصر حالياً عندها القنبلتين النوويتين بتوع أمريكا وياكبدى أمريكا مكسوفه ومحرجه تتكلم أو تقول لحد والنبى يادلعدى كلم مصر ترجع لنا القنبلتين النووى بتوعنا ومعاك رابط أحدى القصص التى ترددها الكائنات الفيسبوكيه

https://www.facebook.com/permalink.php?story_fbid=539106989851028&id=100012551953138

وقبل أى كلام معاك هذا المقال يثبت لحضرتك أن أثناء حرب عام 1967م كانت الوحده بين مصر وسوريا أتفشكلت عام 1961م  ومفيش حاجه أسمها الجمهوريه العربيه المتحده وكان فيه حاجه أسمها جمهورية مصر العربيه

https://genralbahaaelshamy.blogspot.com/2017/02/blog-post_4.html

تعالى بقى مع بعض نعرف قصة ليبيرتى الحقيقيه وثالث يوم من حرب الأيام السته وتحديدا يوم 8 يونيه عام 1967 م كانت سفينة الأبحاث ليبيرتى يو أس أس متواجده بالقرب من سواحل مدينة  العريش والصوره المرفقه هى صورتها يعنى لامدمره ولا ديالو ومصطلح سفينة أبحاث غالباً بيختفى ورائه نشاط تجسس 

ودى بقى يامؤمن صور المدمرات الحقيقيه

  

فى يوم الحادث هاجمت المقاتلات الأسرائيليه ومعها طوربيدات إسرائيليه بمهاجمة السفينه بالخطأ وتدميرها بالقرب من المياه الأقليميه المصريه لسواحل العريش وقُتل فى الليله دى أكتر من 30  أمريكى وأصيب أكتر من 130 بحار وحصلت أزمه دبلوماسيه بين أسرائيل وأمريكا وعبر مفاوضات دبلوماسيه أعتذرت أسرائيل ودفعت مبالغ طائله كتعويضات لأسر الضحايا ودفعت إسرائيل تعويضات عن ثمن السفينه 

لكن الأمريكان اللى حضروا الواقعه أتهموا أسرائيل بضرب سفينه صديقه وحليفه لهم وأشعل نيران تأجيج المشكله بحار كان على السفينه أسمه (( بروميت )) من كام سنه وقال أنه متذكر أن الهجوم كان متعمد وخرج بيان من وزارة الدفاع الأمريكيه وقال الحادث كان نتيجة نيران صديقه 

لاسمعنا بقى عن قنابل نوويه جتك نووى لما تنشك بيه فى مصارينك ولاسمعنا عن طائرات مصريه ولو أمريكا خدت بالكلام العبيط ده تعمل لنا مشكله على قنابلها النوويه وتقولك ألحق ياجدع يابتاع الفيسبوك مصر عندها نووى سرقته مننا ومخبياه فى درج الكومودينو بتاع محافظ كفرالشيخ

دى سكرينات من كتاب وكيل مخابرات مصر بخصوص هذه الواقعه 

قبل ماتجيب سيرة النووى ياعم العبيط تعرف الأول طبيعة القنابل النوويه وأزاى بتنضرب وأزاى بيصدر أمر بضربها وبتبقى فين وإيه كمية أجراءات الحراسه والتأمين عليها 

ممكن آه شوية يورانيوم يتهربوا من دوله لدوله أو معدات طرد مركزى مفككه تتهرب من دوله لدوله أو خطف عالم يعرف سر القنابل النوويه لكن قنبله نوويه تتسرق كده شليطى مليطى يبقى أرجوك تبقى تغطى الحلموزه بتاعتك وأنت نايم علشان متحملشى بكوبيس وحشه وتقوم تكتبها لنا فى بوستات فيسبوكيه 

محدش يقولى كل واحد يكتب اللى يعجبه على صفحته فيه عالم بيراقبنا وبيعرف مدى الجهل اللى وصل له غالبية المصريين وبننفضح أحلى فضايح وبنتعاير بالبوستات العبيطه دى والمصيبه الأكبر هى الأثار السلبيه المترتبه على هذه البوستات المريضه 

الموضوع أمريكى أسرائيلى ملناش صالح به ومكانشى عندنا وقتها طيران يقدر يعمل كده وبطلنا نرد على تخاريف الأخوان وحنرد على تخاريف الكائنات الفيسبوكيه

جنرال بهاء الشامى