بوتين لازم يلم عياله ونسوانه من الشارع
تانى وثالث موضوع الطائره الروسيه
المتابع العادى شاهد بنفسه وتابع كيفية مهاجمة الأعلام الغربى والضغط على بوتين قبل مصر وفعلا حدث هياج شعبى ضد بوتين فى روسيا (( مستنى إيه يعنى يطبطبوا عليه ماتشوف أنت لما بيموت عندنا حد بنقلب الدنيا أزاى وفورا بنطالب بإعدام قيادات الأخوان ))
قرار وقف الرحلات من وإلى روسيا قرار من أصعب القرارات على الجانب الروسى ويكلفه الكثير حسب تحليلات الخبراء
روسيا وأنا قلت قبل كده لن تتراجع عن حربها ضد داعش ومايطلق عليه المعارضه المعتدله المسلحه بتاعة السعوديه وأمريكا وخصوصا أن بوتين من الشخصيات العنيده (( فاكر مواقفه فى الأزمه الأوكرانيه ولا نسيت ))
طيب أنت متخيل واحد بتفكير بوتين وعقليته كرئيس لدوله عظمى حيستنى لما داعش تقفشله كام واحد وتدبحهم وتهز صورته قدام شعبه أولا وأمام العالم ثانيا .... طيب أنت متخيل أه بوتين ممكن يقبل موقف زى بتاع الكساسبه (( مستحيل طبعا )) ..... طيب أنت متخيل أن بوتين ممكن يقبل موقف زى بتاع المسحيين اللى أندبحوا فى ليبيا (( الشعب الروسى حيهيج عليه ويقوله منعول أبو سوريا على أبو العرب كلهم )) ..... أذن بوتين بين ناريين
طيب لو أنا حعمل مشكله فى الحته عندنا الول حطلع العيال الصغيره الشقه علشان ماحدش يتعرض لهم وأدخل النسوان بتوعنا من البلكونات علشان ماحدش يحدف عليهم حاجه وأقفل على بيتى كويس وأنزل أنا والشباب نعمل أحلى مشكله وأحنا مطمنين
بوتين دلوقتى بيعمل كده أى حد روسى متواجد فى الشرق الأوسط حيسحبه ويحاول يلم المدنيين الروس من المنطقه بقدر المستطاع ويحاول يقطع أى سكه على أستهداف المدنيين الروس فى المنطقه علشان مايتعرضشى لأى عمليات خطف أو تفجيرات أو أستهداف لمدنيين تعرضه فيما بعد لهجوم من شعبه يؤثر على شعبيته ويؤثر على أستمراره فى الحرب فى سوريا
بوتين حيلم عياله ونسوانه فى شقته ويقفل على نفسه وينزل الشارع يطل ميتين أم التخين
يبقى بقى ياحبيب قلبى ماتستبعدشى أن بوتين يمنع السفر من وإلى روسيا ده لو مامنعشى الروس ينزلوا الشارع مش يروحوا يتفسحوا فى بلاد الله
ليست هناك تعليقات:
إرسال تعليق