أنفاق سيناء من طقطق لسلامو عليكو

أولا قبل السرد يعتبر هذا المقال من أخطر ماكتبت على السوشيال ميديا وحبدأه بطرح بعض الأسئله

ليه أى ساكن حدود أى دوله فى العالم متمسك بالعيش والحياه فى ظروف بيئيه وخدميه سيئه وأحوال طقس سيئه للغايه ؟؟؟

ماهى الطبيعيه الجغرافيه لحدود أى دوله بالعالم ؟؟؟

لماذا تفضل عصابات التهريب عالمياً التهريب عبر الحدود البريه لأى دوله بالعالم ؟؟؟

متى ولماذا توقف الأرهاب فى عهد السادات داخل مصر ؟؟؟

لماذا كان الأرهاب فى عهد مبارك فى جنوب سيناء ولم يكن فى شمالها ؟؟؟

لماذا الأرهاب فى عهد السيسى فى شمال سيناء ومتوقف فى جنوب سيناء ؟؟؟

ليه ترامب عاوز يبنى سور بينه وبين المكسيك ؟؟؟

لماذا أختفى نشاط منظمة الآكابى الصهيونيه العالميه من جميع دول العالم ؟؟؟

للأجابه على هذه التساؤلات تعالى ندردش مع بعض سوا  بعيداً عن حرامية بوستات الفيسبوك وأصحاب صفحات الصقور لاتنام والحمام لايبيض وبعيدا عن  ريبورتات الفيسبوك التى تعتمد على العدد ولاتعتمد على المحتوى فمن المعروف تاريخياً أن الأرهاب عقب توقيع كامب ديفيد كان يأتينا من الحدود الغربيه المتاخمه لليبيا وفطن السادات لذلك وبما أنه يصعب على أى دوله مراقبة حدودها بالكامل وحتى لو فعلت مين يضمن عدم فساد المراقبين خصوصا لو كانت المغريات رهيبه وبكثره مفرطه

قبل السادات كانت مراقبة عمليات التهريب فى أى دوله فى العالم تتم بسلاح حرس الحدود وكثيرا ماتعرض أفراد هذا السلاح على مستوى العالم للإغراءات  الماليه ووقعوا ضحايا لمافيا عصابات التهريب الدوليه وكان على مستوى مصر السلاح ده أيام الملك فاروق قائم بذاته وحدثت بسببه مشاكل كثيره أيام فاروق فى أنتخابات نادى الظباط الشهيره

المهم السادات بحكم ذكائه عرف أن مراقبة الحدود الغربيه لايمكن إحكامها بالدقه التى تمنع تهريب الفلسطنيين من ليبيا لتنفيذ تفجيراتهم داخل العمق المصرى فأجتمع مع زعماء قبائل أولاد على فى الأجتماع الشهير اللى أطلق فيه على نفسه مصطلح كبير العيله المصريه وأستقبلهم بالقصر الرئاسى وأعطى لهم مزايا فوق الخيال من أعفاءات تجنيد لتعينات داخل الحكومه لكراسى بمجلس الشعب فى مقابل حراسة الحدود وتعالى نشوف تفاصيل الحراسه

أن المهرب يستطيع تهريب مخدرات وبشر وسلاح بشرط الأجهزه المعلوماتيه يكون عندها تفصيل دقيق بكل عملية تهريب ولو الدوله عندها ملاحظات على نوع التهريب لو كان مخدرات أو سلاح أو بشر تتصرف بعيداً عن فضح المهرب يعنى لو عاوزه تضبط صفقة سلاح تسيبها تعدى وتتبعها لحد لما تدخل البلد وتروح الجبال وتتخزن فى جبال الصعيد مثلا وبعد كده بطريقه مخابراتيه تفتعل أى مشكله بالمنطقه تعطيها الحق فى  تفتيشها وقال إيه بالصدفه تعثر على السلاح أو المخدرات أو تعمل نفسها قبضت على واحد فى المنطقه وهو اللى أعترف بالسلاح أو المخدرات المهم عملية الضبط تتم بعيداً عن أى شبهه فى المهرب تضيع سمعته فى عالم التهريب وتبدأ العصابات تبعد عنه وتشوف مهرب تانى غير معروف للأجهزه الأمنيه وعلى فكره من وقتها أصبح هذا العرف معمول به فى كل دول العالم وترجع هذه الفكره للسادات

لما كنت فى أول رحلة علاجى وبكلم شخصيه أمنيه رفيعه عن ثغره موجوده بقناة السويس فوجئت أنه يعرف عدد قطع السلاح ونوعها وعند مين وهل هو مسجل جنائى أو مقتنيها للفشخره زى مثلا فى العائلات الكبيره أو مسجل كأرهابى وعنده قد إيه زخيره وحاططها فين وهنا تأكدت أن نظرية السادات لازال معمول بها حتى يومنا هذا وتحقق هذا النجاح المعلوماتى

المهم توقف الأرهاب فى مصر بعد جلسة السادات مع زعماء قبائل أولاد على وخلى بالك أن فى الوقت ده مكانشى فيه زفت حكم ذاتى للفلسطنيين ولا كان فيه فتح أو حماس فى فلسطين وكانوا كلهم بره بلدهم ولسه ياسر عرفات مطارد فى لبنان ومن هذه النقطه بدأ معمر القذافى عملياته ضدنا خارج حدودنا بخطف الطائرات وقتل وزرائنا بره مصر بعد أحكام أولاد على سيطرتهم على الحدود الغربيه ويمكن السبب ده اللى دفع معمر القذافى أنه يقتحم حدودنا فى القصه اللى قلتلك عليها قبل كده فى المقال ده ومعاك الرابط

https://genralbahaaelshamy.blogspot.com/2019/06/blog-post_22.html

مات السادات ومسك مبارك الحكم وكان الأرهاب قاصر على الداخل لكن بعد توقيع أتفاقية أسلو 1 و 2 وعودة ياسر عرفات لفلسطين وموت ياسر عرفات وظهور عباس ثم أنشقاق حماس عنه وبدأت مصر غلق المعابر مع حماس بدأ الأرهاب يظهر تانى وخصوصا مع بداية حماس حفر الأنفاق

مبارك لضبط حدودنا الشرقيه ترك موضوع أنفاق حماس يمشى فى مقابل نفس صفقة أولاد على وكانت الدنيا ماشيه وحماس عملت وزاره للأنفاق وبدأت الأنفاق تاخد شعبيتها والسبوبه بتاعة التهريب تمشى زى السكينه فى الحلاوه

بدأت الأنفاق تبقى سبوبه ولقاها بعض الفاسدين فى مصر سبوبه حلوه فبدأت بعض قيادات الداخليه أيام مبارك تفرض أتاوات على كل نفق وبدأ صراع على أتاوات الأنفاق والدنيا ماشيه

كانت أسرائيل أيضا موافقه على موضوع الأنفاق وعلى قلبها زى العسل خصوصا أن فيه بنزين مدعم من قوت الشعب وسلع مدعمه من قوت الشعب بتتهرب وتتباع بواسطة حماس الوطنيين اللى بيدوروا على مصالح وطنهم وشعبهم فى أسرائيل وبدأ الثراء يظهر على كل قيادات حماس وكل اللى شغالين فى سبوبة الأنفاق وأنخفض أستيراد أسرائيل للبنزين 

أسرائيل كان عندها منظمه أسمها منظمة الآكابى مهمتها تجميع يهود الشتات من كل بقاع العالم وتجميعهم فى معسكرات فى أوروبا ثم ترحيلهم من أوروبا لأسرائيل وكانت فيه مفاوضات مع هذه الدول علشان تسمح بالهجره والتجميع وأفتكر أن السادات أستغل واقعه زى دى فى رومانيا وكثف نشاطه الدبلوماسى أيامها ناحيتها لشغل المجتمع الدولى وأسرائيل عن التجهيز لحرب أكتوبر قبلها بأيام وفعلاً أضطرت جولدا مائير تسافر رومانيا قبل حرب أكتوبر بأيام لهذا الغرض وزكرت تفاصيل هذه الواقعه فى سلسلة مقالات معجزة جيش وشعب ولمزيد من التفاصيل عن منظمة الآكابى أقرأ هذا المقال المعلوماتى

https://genralbahaaelshamy.blogspot.com/2017/05/blog-post.html

  

بعد أنتشار الأنفاق بدأ نشاط منظمة الآكابى الصهيونيه يختفى من العالم وبدأت فى التهريب الفردى من كل دول العالم لأفريقيا بالطيران ثم السفر للسودان ثم التهريب من السودان لمصر عبر الحدود الجنوبيه وكل ده بيمشى بالورق خصوصا وأن معظمهم أفارقه وخصوصا يهود أثيوبيا وأفريقيا وبعد مايوصلوا أسوان تبدأ رحلتهم لسيناء ومن سيناء يتهربوا عبر الأنفاق لغزه ومن غزه يدخلوا أسرائيل بعلم حماس عدوة أسرائيل ياأخى المؤمن والشعوب الغلبانه مضحوك عليها بالكلام الشعبوى أمام الميكرفونات وأختفى نشاط منظمة الآكابى ظاهريا بعد ظهور الأنفاق والبعد عن المفاوضات الشاقه والمساومات  مع الدول اللى كانت بتكلف اليهود صفقات أقتصاديه ومؤكد معظمكم فاكر الضغوط اللى كانت بتمارسها روسيا على هذه المنظمه للسماح لها بتجميع اليهود الروس

بدأت الأنفاق تصبح سبوبه عالميه وترتبط بمنظمات وعصابات دوليه عالميه والليله ماشيه حلاوه وطبعاً ساكن الحدود الشرقيه زيه زى أى ساكن حدود بدأ يطلع من المصلحه دى بآلاف يوميا وبدأ التسابق بين سكان المنطقه على أن يكون فتحة النفق فى أرضه أو فى بيته أو تحت سريره اللى بتنام عليه مراته

بدأت الأنفاق تتحول لسرطان وظهرت خطورتها بحادثة أقتحام الغزاويه ووصولهم للعريش فى واقعة الدولارات المزيفه الشهيره وبدأت الأنفاق تشكل خطر على البلد وعلى أقتصادها خصوصا مع تقارير المخابرات العامه والحربيه من تجاوز التهريب للحد المسموح به ولنوعية التهريب فبدأ حبيب العادلى فى التضييق على دولة الأنفاق فكانت حادثة كنيسة القديسين بالأسكندريه ويمكن ده كان من أهم أسباب أحداث ينايم 2011 من قبل حماس وأسرائيل بالذات بعد تضييق الداخليه على الأنفاق فى محاوله يائسه لضبطها

فى سلسلة مقالات الصقر الذهبى كنت شرحت دور وخطورة الأنفاق فى أحداث 35 ينايم 2011 ومعاك الروابط لو عاوز تعرف التفاصيل

https://genralbahaaelshamy.blogspot.com/2019/01/25_22.html

وده كمان رابط

https://genralbahaaelshamy.blogspot.com/2017/04/26.html

بدأت مصالح الجميع منظمات دوليه وعصابات تهريب عالميه ومصالح منظمة الآكابى تتهدد فبدأت عملية الأنتقام وتفجير خطوط الغاز لو لسه فاكر حاكم المصريين بينسوا بسرعه وبدأت الأعمال الأنتقاميه ضد جنود الداخليه المتواجدين بالمكان فكانت حوادث رفح الأولى والثانيه وخطف الجنود والحفاظ على الخاطف والمخطوف الشهيره بتاعة المقبور المجحوم مورسى وظلت الحوادث تتكرر بعد تولى قائد المخابرات الحربيه العالم بكل تفاصيل الأنفاق وزارة الدفاع وأكيد كلكم لسه فاكرين فيديوهات الجيش بتاعة تهريب البنزين والسيارات من أنفاق سيناء وبدأ هنا السيسى حرب مايطلق عليه حرب الأنفاق وهو لازال وزير دفاع

قام المصريين بإنتفاضة 30 يونيه وتولى قائد المخابرات الحربيه ووزير الدفاع منصب رئيس الجمهوريه وأصبح صاحب القرار الأول فى البلاد على العباد والجيش معاً فركز جهوده أولاً على محاولة أستئصال سرطان تفشى فى بطن مصر أسمه الأنفاق فقامت هذه الحرب التى ترونها أمامكم وتعرفون تفاصيلها أكثر منى

هذه هى قصة الأنفاق الشرقيه وعناصرها المتضرره من وجود قوات الجيش على حدودنا الشرقيه وهم أسرائيل وحماس وعصابات ومنظمات التهريب العالميه وعلى رأسهم منظمة الآكابى الصهيونيه وقبل كل هذا وذاك والأخطر هو ساكن هذه الحدود الشرقيه الذى يمتهن مهنة التهريب كمصدر رزق له وتكوين ثروات هائله من التهريب 

قل لى بالله عليك لو عملت مصنع وقلت لساكن حدودى تعالى أشغلك فى مصنع وأعطيك مرتب 30 ألف شهريا وأسكنك فى شقه محترمه تليق بآدميتك وبأسرتك ولاتعرض نفسك للمخاطره وهو اللى كان بيكسب كل طلعة شمس 50 ألف جنيه تفتكر يوافق ولا يقاومك حتى لو وصل الأمر لمقاومتك بالسلاح ومن هنا تعرف ليه الأرهابيين فى سيناء بيستهدفوا شرفاء سيناء  اللى بيقفوا جنب بلدهم

أعرف أستاذ دكتور جامعى موجود معاكم على صفحة الفيسبوك ويتصل بيا أسبوعيا علشان عاوز يوصل صوته لأبن مصر عبدالفتاح السيسى  وبيعرض عليا مشروع يخلصنا من الأنفاق بدون تحميل ميزانية الدوله أى أعباء وتصبح المنطقه الشرقيه مثل الكتاب المفتوح ولو مشى فيها صرار تستطيع أن تراه بعينك المجرده وكل اللى على الدوله ومطلوب منها أنها تجمع له الزباله فى مصر لمدة سنه واحده وبعد ذلك ستتحول المنطقه لمنطقه أستثماريه فى مصر لو فار مشى فيها حتشوفه بعينك المجرده فهل من يلبى نداء هذا الرجل وهل أطمع منكم أصدقائى الكرام محبى هذا الوطن فى مساعدتى بعمل حمله لتوصيل صوتنا لرئيس الجمهوريه

لو حصلى حاجه بعد هذا المقال ليس لى عند بلدى سوى طلب واحد أن تلفوا جسدى بعلم مصر وأندفن به زى أى واحد محترم كرمته بلده بدفنه فى علمها ولا أطهر ولا أشرف من علم مصر فى الدنيا وأعتقد ماطلبته يامصر مش كتير عليكى أندفن بعلمك

جنرال بهاء الشامى