السيسى الفاشل باع مصر

 

 

نعم أعترف أن السيسى فاشل وبجداره منقطعة النظير فقد فشل فى أرضاء منتقديه فى كل تصرفاته وزى المثل البلدى مابيقول لاكده عاجب ولا كده عاجب وتعالى نشوف موقفهم وموقف السيسى ولن أسميهم سواء كانوا أخوان أو سلفيين أو تقدميين أو راديكالين أو مباركيين وسنعتبرهم جميعا معارضه شريفه ومنزهه عن الخطأ والهوى والهدف والمستهدف وتعالى ندردش مع بعض فى اللى فات 

                 
■■ فاكر لما السعوديه قالت يلا ياجدعان على اليمن وعملوا عاصفة الحزم ... طبعا فاكر ... كله شمر كمامه وعمل فيها أبو العيال وأوعى ياسيسى تضحى بعيالنا علشان خاطر السعوديه وألحقوا السيسى بتاع العسكر حيبيع العساكر المصريين ويبعتهم يموتوا فى اليمن والسيسى بقى دلدول السعوديه 

                 
■■ وتعدى الأيام والشهور يامؤمن ياموحد بالله ولا السيسى بعت ولا حد راح اليمن وكل العمليه مركبين وقفوا فى المياه الدوليه لتأمين باب المندب ... أوم إيه الجماعه بتوع المعارضه قالك بلاش دى تعالوا شوفوا ملف سوريا السيسى الفاشل معصلج الملف السورى وملف الحل وبيساعد بشار الكافر ضد السعوديه ... طيب منين بقى دلدول للسعوديه وواقف ضدها فى ملف سوريا منين مع السعوديه ومنين مع بشار والغريب ياأخى محدش أتكسف على دمه وهو بيعلن عن مواقفه المتناقضه 

                 
■■ رجعوا تانى برضوا للسعوديه وقالك السيسى باع تيران وصنافير علشان الفلوس وعلشان البترول والسعوديه حتغرقه بترول للركب ... ومحدش خد باله أن كلامه متناقض مع بعضه
■■ السعوديه قطعت البترول لقوها فرصه وقالك السيسى فاشل فى السياسه الخارجيه ومش عارف يمشى أموره مع السعوديه وأتهموه بالغباء السياسى لأنه مش عارف يمشى فى فلك السعوديه والغريب يامؤمن أنهم مش واخدين بالهم من كلامهم المتناقض 

                 
■■ أيران مجرد أنها لمحت بأنها تحت أمر مصر إلا وفريره وكله سن سنانه على السيسى وماتفكها ياعم الحاج والمصالح بتتصالح والجنيه غلب الكارنيه يافاشل وفىنفس الوقت يقولك أيران بتلقح عليك علشان الملف السورى ومحدش بيدى لحد حاجه ببلاش وأوعى ياسيسى تقلب وتبقى شيعى وتبقى دلدول لأيران 

                 
■■ هما دول برضوا اللى قالك مصر بقت ملطشه ودوله زى كطر بتعمل فيها مابدالها ونسوا مبدأ الشاطر اللى يضحك فى الآخر واللى ياخد حقه بعد سنه يبقى أستعجل وسبحان الله يامؤمن هما هما نفس الناس اللى بتقولك كطر دوله عربيه واللى بيحصل لها علشان موقفها من القضيه الفلسطينيه وعيب ياسيسى متبقاش دلدول للسعوديه 

                 
■■ أسمع ياض منك له لو السيسى كان عاوز يلعبها صح كان فضل وزير دفاع ومشى أموره مع الأخوان وكان أتمرمغ فى فلوس كطر وكان رصيده فى البنوك بقى زى أى واحد فيهم على الأقل 

                 
■■ أسمع ياض منك له لو السيسى عاوز يلعبها لحسابه كان فوت ملف سوريا زى غيره مافوت ملف العراق وساعد السعوديه وأرسل قوات لسوريا والبليه لعبت معانا وديونا أتسددت زى أيام مبارك 

                 
■■ أسمع ياض منك له لو السيسى بيلعبها لحسابه كان مسألشى فى حد وبعت قواته لليمن وقبض التمن وفكها على نفسه وفكها على البلد


■■ أسمع ياض منك له لو السيسى عاوز يبيعها كان باعها من الأول وألف مين يشترى وكله مستنى أشاره وكان ساب ليبيا تخرب ماتعمر ولا كان عارض ولاكان نشف دماغه وكان البترول الليبى وصل لحد باب مصر فى المراكب الأمريكى 
                  
 
■■ أسمع ياض منك له اللى كان عاوز يبيع كان باع من الأول ولا من شاف ولا من درى كان باعها أيام الأخوان ويادار مادخلك شر

                 
■■ مبارك جتله الفرصه مرتين فى 30 سنه مره فى أفغانستان ومره فى العراق وباع فى المرتين وقبض التمن ومحدش فتح حنكه ولاحد خد باله والسيسى جتله الفرصه يبيعها 5 مرات فى 5 سنوات فى اليمن وسوريا وأيران وليبيا وأيام الأخوان ولو كان عاوز يبيع كان باع وقبض التمن 

                 
■■ عارفين إيه مشكلتكم ؟؟؟
■■ مشكلتكم .. أنكم لا تدركون أن علاقات الشراكه والدعم بين الدول تحكمها مصالحها المشتركه وثوابتها التاريخيه التى لا تتضمن التبعيه المطلقه أو العداء الأبدى

                 
■■ مشكلتكم .. أنكم لا تدركون قيمة هذا الوطن العظيم ولا تدركون قيمة رجل أرسله الله فى الوقت المناسب ويؤيده فى كل خطواته وأبقى أحسبها مع نفسك ده لو بتعرف تحسبها ياعم النحنوح ولنا لقاء قادم لتعريف مصطلح النحنوح
  #جنرال_بهاء_الشامى 

النعوش الطائره وجرح العراقيين

 

فى تقرير مطول للدكتور عاطف صدقى رئيس الوزراء المصرى فى نوفمبر 1989 ميلاديه أشار لأزدياد نعوش القتلى المصريين التى يتوالى وصولها من العراق ولم يقتنع التقرير الذى قدم لحسنى مبارك بتقارير الطب الشرعى المرفقه مع النعوش لكل حاله على حده وخصوصا بعد حادث أصرار أهالى أحد المتوفين على فتح التابوت الألمونيوم لأبنهم لمعرفة السبب الحقيقى لوفاته فوجدوا الرأس مهشمه تماماً والتقرير المرفق مع النعش يقول أنه توفى نتيجة صعق بالكهرباء نتيجة حادث عادى 

وقتها قررالدكتور عصمت عبدالمجيد أمين عام الجامعه العربيه وقتها تشكيل لجنه مصريه عراقيه مشتركه لبحث السبب الحقيقى للوفيات ولما أمين الجامعه يقول سبب حقيقى فى قراره يبقى ده دليل على أن الأسباب المعلنه غير مقنعه 

هاجت مصر كلها وماجت وأصبح الموضوع على كل لسان والصحافه ملهاش سيره إلا موضوع النعوش الطائره وخصوصا أن مفيش قريه أو بلد فى مصر إلا وصلها نعش أو أتنين من العراق 

بالفعل تم تشكيل اللجنه المزعومه لكن أستمرت النعوش فى الوصول لمصر بأعداد متزايده مما دعى مبارك لتكليف المخابرات المصريه ببحث الأمر 

تقرير المخابرات المصريه الذى قدم لمبارك ملخصه يقول أثناء الحرب التى أستمرت 8 سنوات كامله مات الكثيرين من جنود العراق وتركوا زوجاتهم أرامل وتزايدت أعداد المفقودين من العراقيين الرجال المشاركين فى الحرب و بعد أنتهاء الحرب العراقيه الأيرانيه بدأت مفاوضات تبادل الأسرى وبدأت عودة الأسرى العراقيين الذين وجدوا زوجاتهم فى عصمة أزواج آخرين أغلبهم من المصريين العاملين بالعراق ومن هنا بدأت حالات الأنتقام والقتل من الزوج المصرى المتزوج من أرمله عراقيه بعقد رسمى نتيجه لغياب الزوج فترات قانونيه تبيح للزوجه التزوج من آخر وبدأت حالات قتل المصريين تتزايد مع نجاح صفقات تبادل الأسرى بين العراق وأيران

  خرج صدام حسين قائد جبهة الرفض أيام السادات وقائد حملة تجويع وتركيع المصريين بتصريحات شعبويه لأرضاء المصريين وخصوصا بعد خوف العماله المصريه من التواجد بالعراق وعودتها لمصر وتأثير ذلك على سوق العمل بالعراق ودى نتيجه طبيعيه لموت أعداد كبيره من الشباب فى الحرب تزداد أعداد العوانس 

طبعا فيه دول كتيره عربيه وخليجيه وقتها كانت بتعتمد على العماله المصريه وبدأت هذه الدول تنفخ فى الأزمه لأنها صاحبة مصلحه لأن عودة العماله من العراق وحسب قانون العرض والطلب سيخفض من أجور العماله المصريه المطلوبه التى كانت تعتمد عليها الدول الخليجيه بشكل أساسى 

كان عندنا فى مصر نائب مجلس شعب أسمه أحمد يونس خد الموضوع على عاتقه وسافر على رأس وفد شعبى تحت أسم اللجنه الشعبيه الصناعيه فى محاوله لأيجاد حل للمشكله والحق يقال فعلا نجح يونس بمجهود فردى فى تهدئة المشكله وبدأت أعداد النعوش تنخفض بنسبه كبيره بعد مفاوضاته مع صدام حسين ومناقشة أبعاد المشكله وتأثير سحب العماله المصريه من العراق على الأقتصاد القومى العراقى

فى يوم الجمعه 18 نوفمبر 1989 وعقب هدف حسام حسن برأسه فى فريق الجزائر عمت مصر كلها الأفراح بالصعود لكأس العالم وكان طبيعيا أن يفرح المصريين فى كل أنحاء العالم ومنها العراق فأثار ذلك حقد العراقيين وأطلقوا النيران على المصريين المتجمعين للأحتفال فى شارع الرشيد وحدثت حادثة الشاحنه المشهوره التى دخلت قهوة المصريين بسرعه مجنونه وقتلت يومها 7 مصريين ليصل العدد خلال ساعتين بعد هدف حسام حسن لـ 127 مصرى غير الجرحى اللى وصل عددهم للمئات وكان طبيعى يتجمع المصريين وحدثت يومها مجزره وأعتقلت السلطات العراقيه آلاف المصريين وقتها ونكلت بهم لصالح العراقيين أبناء جلدتهم وتحولت أفراح مصر بالصعود لكاس العالم لمآتم كبير وبدأت الأزمه للعوده مره أخرى وأقوى من الأول وقتل وأختفى عدد كبير من المصريين 

سافر أحمد يونس  وحمدين صباحى للعراق على رأس وفد شعبى وطلب مقابلة صدام حسين ونقل له غضب الشارع المصرى من العراق وهو الشعب الذى وقف مع العراق والعراقيين فى فترة الحرب الأيرانيه ونجح حمدين صباحى والوفد المرافق له فى مهمته وألتقطت الصور أياها الى تتخذ ضد حمدين صباحى حالياً ويومها صرح صدام حسين فى مؤتمر صحفى مشترك مع الوفد الشعبى برئاسة حمدين صباحى وقال جملته الشهيره (( من اليوم من سيتعرض لمصرى بمكروه سيكون أعتدى على صدام حسين شخصياً (( 

كان فيه بعض المصريين اللى أنضحك عليهم وحاربوا مع الجيش العراقى وقعوا فى الأسر لدى الأيرانيين ووصل عددهم لما يزيد عن 700 مصرى وكما سافر حمدين صباحى للعراق سافر لأيران وأتصور هناك أيضا لكن الأيرانيين محترفين سياسه ومعرفشى حمدين يبلعهم زى مابلع صدام حسين  وعرضت أيران عودتهم لمصر نظير عودة العلاقات مع مصر لكن مبارك رفض مبدأ التفاوض وقال اللى يحارب بره بلده يخلصوه اللى حارب علشانهم ومن يومها والناس دى هناك ومات اللى مات منهم فى السجون الأيرانيه ولازال هناك منهم أعداد بسيطه على قيد الحياه 

هى دى قصتنا مع النعوش الطائره وبأعتراف حسنى مبارك شخصيا فى حديث صحفى فى نوفمبر 1990 أن الثمن الذى دفعه المصريين نتيجة وقوفهم مع الشعب العراقى مايزيد عن 8000 ثمانية آلاف شهيد مصرى هم أجمالى قصة النعوش الطائره  لكنه تشفى فى مجمل حديثه من صدام حسين وقال نصحته كتير لكنه لم يستجيب 

للأسف ياساده عدد من ماتوا فى حرب أكتوبر 1973 ستندهش عندما تعرف أنهم 8528 شهيد وستندهش أكثر عندما تعرف أن أكثر منهم قتلوا فى قصة النعوش الطائره ولتعلم الأجيال الحاليه من المصريين والعرب أن من ماتوا على يد العرب من المصريين أضعاف أضعاف من ماتوا على آيادى اليهود فى 4 حروب 

آسف مضطر أنهى المقال لحد هنا علشان أعصابى حتبدأ تفلت منى 

جنرال بهاء الشامى 

معجزة جيش وشعب رقم 24

 عزيزى المسافر عزيزتى المسافره معنا على متن طائرة (( فريق مصر أم الكون )) عادت رحلتنا التاريخيه من رحلتها 23 من أسرائيل وماحدث فيها من زلزال سياسى  وعسكرى ونجاح أسرائيل فى صد هجوم القوات السوريه على هضبة الجولان واليوم موعدنا والرحله رقم 24 لكن نود أن نخطركم أننا سنتوجه لأمريكا فورا لنرى مايحدث فيها يوم 8 أكتوبر 1973 مع حساب فارق التوقيت فبرجاء ربط الأحزمه وعدم التدخين وإغلاق الموبيلات لأننا على وشك الأقلاع الفورى

الأثنين 8 أكتوبر  1973 صباحا مع أول  وصول أخبار عن هجوم مضاد أسرائيلى على الجبهه السوريه ونجاح القوات الأسرائيليه فى وقف تقدم الجيش السورى (( الجيش اللى السعوديه بتحاول تخلص عليه منهم لله بعد ماخلصوا على الجيش العراقى  )) يستلم هنرى كسينجر رساله من رئيسه نيكسون مكتوب فيها وخلى بالك معايا  من كل حرف وكل كلمه

(( من الصعب عليا أن أن أصدق أن المصريين والسوريين تحركوا على هذا النحو الضخم بدون علم السوفييت وربما بغير تشجيعهم المباشر وأكثر من ذلك أننى منفعل من أن الهجوم على أسرائيل كان مفاجأه لى فأنا أشعر بالأحباط من قصور معلوماتنا المخابراتيه كما أننى فى ذهول من فشل المخابرات الأسرائيليه وقد كنت أعتقد أنها من أفضل أجهزة المخابرات فى العالم . لكنهم يبدو لى أن فوجئوا بطريقه أفقدتهم توازنهم وأتعجب كيف فعلها المصريون والسوريون )) على فكره قبل ماحد يحاول يشكك الرساله موجوده فى كتاب ( مزكرات الرئيس ريتشارد نيكسون ) ولو عاوز رقم الصفحه حتلاقيه رقم 920 ومش ناقص بقى غير أنى أجيبلك رابط الكتاب من على موقع البرامج الخاص بى لكن مش حجيبه لحد تحت رجليك أبذل مجهود سعادتك وأسعى وموقع برامجى ميتوهشى على النت ياعم المشكك

مجلس الأمن يحاول عقد أجتماع طارئ بناءاً على دعوة نيكسون له زى ماقلتلك لما كنا فى مصر أمبارح ساعة السادات ماكان بيتفرج على الفيلم ولا لحقت تنسى لكن كسينجر بعد وصول أنباء الجبهه السوريه يحاول تعطيل عقد الأجتماع على أمل أن أسرائيل حتحقق تفوق على الجبهه السوريه وبعدها تركز على الجبهه المصريه علشان تطحن المصريين علشان تبقى اسرائيل فى موقف على الأرض جيد وأفضل وأصدر كسينجر تعليماته (( لسكالى )) آه والله أسمه كده رئيس وفد بلاده فى الأمم المتحده بالحيلوله دون صدور قرار من مجلس الأمن بوقف أطلاق النار على الأقل دلوقتى لحد أسرائيل ماترجع القوات المصريه تانى لشط القناه الغربى وتكون كبدت المصريين خسائر فادحه ولقنتهم درسا لاينسوه

فى نفس الوقت كسينجر بيحاول بأسلوب اليهود يكسب وقت مع السادات وبيحاول يحور على المصريين وهو أعترف بنفسه فى كتابه  أنه كان بيراوغ الثعلب ويقصد السادات على حسب تعبيره وقرر يرد على رسالة حافظ أسماعيل اللى أتكلمنا فيها وتعالى نشوف نص الرساله :

عزيزى السيد إسماعيل

إنى شاكر جدا لكونكم وسط مشغولياتكم الكبيره الراهنه . تجتزئون وقتا لكى تتشاطرون معى تفكيركم بالتطورات فى الشرق الأوسط

وأنه حتى فيما قبل نشوب العمليات الحربيه الحاليه وقد سبق لى أن أخطرت وزير الخارجيه الزيات بأننى على أستعداد لأن أستطلع بصفه جديه ومكثفه مع جميع الأطراف وبخاصه مصر ماقد تكون الولايات المتحده على القيام به لمساعدة الأطراف على تحقيق سلام فى الشرق الأوسط ولايزال هذا العرض قائماً (( خلى دى معاك ))

ومن الظاهر أن مجهودا كهذا يمكن أن يصب النجاح على خير وجه فى أهدأ جو ممكن ولهذا السبب فأن الولايات المتحده حاولت الوصول لوقف أطلاق النار . دون أن تتخذ فى الوقت ذاته موقفا قد يؤدى إلى المواجهه مع الجانب المصرى (( وخلى دى كمان معاك ))

وفيما يتعلق بالنقاط المدرجه بمذكرتكم بتاريخ 7 أكتوبر 1973 هناك نقطتان :

الأولى : أنه ليس من الواضح لدى الجانب الأمريكى ماإذا كانت النقطه الأولى فى موقف الجانب المصرى بوجوب الأنسحاب الأسرائيلى من جميع الأراضى المحتله يجب تنفيذها قبل أمكان عقد مؤتمر أم أن المتوقع هو الموافقه من حيث المبدأ على هذا الشرط (( هنا كسينجر بيصيع باعت يقول مش فاهم علشان حد يرد عليه يفهمه  يكون كسب وقت زى ماقلتلك ))

الثانيه : هى أن الجانب الأمريكى تلقى الرساله التاليه من سفيره فى طهران

أن هويدا رئيس الوزراء الأيرانى قد أرسل فى أستدعائى بناء على تعليمات من الشاه فى الساعه 14.15 بالتوقيت المحلى  لكى يتلو عليا برقيه من الرئيس السادات إلى الشاه مبلغه إله من السفير الأيرانى بالقاهره الذى قابل الرئيس السادات فى أوائل بعد ظهر يوم 7 أكتوبر بالتوقيت المصرى وباختصار فأن البرقيه تتضمن وصفا يتسم بالتفاؤل للموقف العسكرى المصرى على الضفه الشرقيه لقناة السويس وللبطوله المصريه فى العبور للقناه وأنشاء جسر هناك . ثم تطلب البرقيه من الشاه أبلاغ الرئيس نيكسون بأن مصر حتى الآن كانت من أجل تفادى القتال . على أستعداد لقبول السلام بشروط معينه . ومع ذلك فأنها الآن مضطره للقتال وأحتمال الخسائر وهى لاتزال تريد السلام . سلاما دائما بالشرق الأوسط ويود السادات أن يعرف نيكسون أنه أذا كانت إسرائيل سوف تجلوا عن جميع الأراضى التى أحتلت منذ 5 يونيه 1967 . فأن مصر ستكون على أستعداد للتفاوض بإخلاص لوضع هذه الأراضى تحت رقابة الأمم المتحده أو تحت رقابة الدول الأربعه الكبرى أو تحت رقابه ما دوليه  يتفق عليها فأن مصر أما فيما يتعلق بشرم الشيخ فأن مصر على أستعداد لقبول رقابه دوليه لحرية المرحه عبر خليج العقبه بعد الأنسحاب الأسرائيلى ويود السادات قيام الشاه بشرح ماسبق ذكره للرئيس نيكسون من أجل إيقاف الخسائر بأسرع مايمكن

أن الجانب الأمريكى سيكون شاكرا جد لأيضاح الموقف فيما يتعلق بالأنسحاب وللأختلافات بين مواقف الجانب المصرى التى تضمنتها مذكرتكم وبين ماأبلغ لسفيرنا وأن يوضح بصفه خاصه ماأذا كان سفيرنا قد نقل على وجه الدقه موقف الرئيس السادات بصدد الجلاء عن بعض الأراضى ووضعه تحت رقابه دوليه

وأنى لأود أن أكرر القول بأن الولايات المتحده سوف تفعل كل شئ ممكن لمساعدة الأطراف المتنازعه على الوصول لوقف أطلاق النار كما أن الولايات المتحده وأنا شخصياً سوف نساهم بنشاط فى معاونة الأطراف للوصول إلى حل عادل للمشاكل التى حاقت بالشرق الأوسط  على هذا المدى الطويل

تحياتى الشخصيه الحاره / هنرى كسينجر

كده واضح أن كسينجر بيحاول يكسب وقت متعشما أن يحدث هجوم مضاد على الجبهه المصريه مثل الجبهه السوريه يحسن من موقف إسرائيل عند التفاوض

كانت الرساله عباره عن مجموعة أسئله وأستفسارات زى ماهو واضح من نص الرساله اللى نقلتها لك حرفيا وأستفسارات تتوه بالأزمه فى دهاليز قصر الشاه إلى حد السؤال عن دقة معلومات وصلتهم من الشاه وطبعا كسينجر لمح من خطاب السادات لهفته للتواصل مع الجانب الأمريكى لذلك لوح كسينجر بنقطة الأنسحاب وكان كسينجر بذلك بيحاول يكسب وقت زى ماقلت لحضرتك خصوصا وأن فيه تقرير من المخابرات الأمريكيه وصل لكسينجر مضمونه أن فيه غاره أسرائليه كبرى شنها الطيران الأسرائيلى على مدينة بورسعيد كأول غاره أسرائيليه خلف خطوط القوات المصريه خصوصا لما تعرف أن بورسعيد أكتر مدينه تعرضت لغارات جويه من الطيران الأسرائيلى ومن بعدها مدينة المنصوره ثم مدينة كفر الزيات من حيث عدد الغارات وطبعا كلنا عارفين ليه مدينة المنصوره علشان قاعدة المنصوره الجويه كأكبر قاعده قريبه من سيناء وكانت معظم طلعات الطيران المصرى منها ومدينة كفر الزيات بجوار طنطا  لهدفين الأول قاعدة برما الجويه وكوبريين كفرالزيات الملاحيين للربط بين جمرك الأسكندريه وباقى الجمهوريه وفهم كسينجر أن كده القوات الأسرائيليه بتجهز لهجوم أوسع وأشمل على الجبهه المصريه مثل الجبهه السوريه

مؤشرات محركات طائرتنا تشير لقرب نفاذ وقود هذه الرحله لذا نستسمحكم ربط الأحزمه ومنع التدخين للهبوط

سعدنا بكم على مدار الحلقات الـ 24  السابقه وإلى هنا أنتهت سلسلة مقالات معجزة جيش وشعب

جنرال بهاء الشامى

معجزة جيش وشعب رقم 23

الساده المسافرين والمسافرات على متن طائرة (( فريق مصر أم الكون )) التاريخيه رافقتكم السلامه فى الرحله رقم 23 ومطار أم الكون الدولى يتمنى لكم رحله سعيده عبر التاريخ لذا نستسمحكم للأقلاع الفورى ربط الأحزمه وعدم التدخين وأغلاق الموبيلات

قبل السرد أو أن أصحح معلومه تاريخيه للأستاذ مبارك البغيلى بخصوص أول جيش نظامى أنشئ فى العالم (( كانت مصر عباره عن عدة أقاليم ولكل أقليم جيش صغير  يحميه وبعد توحيد الملك نارمر للأقاليم المصريه تم أنشاء أول جيش مصرى موحد فى العالم سنة 3200 قبل الميلاد وهذا الجيش أستطاع تكوين الأمبراطوريه المصريه من حدود تركيا الحاليه شمالا لحدود ليبيا الغربيه غربا لجنوب السودان جنوبا وشرق العراق شرقا )) ونرجع لموضوعنا الأساسى

كنا قد توقفنا على آخر أتصال هاتفى بين السادات ووزير الحربيه المصرى الفريق أحمد أسماعيل يوم 8 أكتوبر 1973 واليوم نستكمل ماتوقفنا عنده لكن قبل الأستكمال الناس اللى عاوزه تنط بينا الأحداث أرجوكم خلوا عندكم صبر ومحدش يسبق الأحداث  أحنا ماشيين معاكم ساعه بساعه وبلاش السربعه بتاعة المصريين وخليكوا ريلاااااااااااااكس خاااااااااااااالص

الساعه 11.00 ظهرا 8 أكتوبر 1973 بتوقيت طرابلس عاصمة ليبيا الرئيس الليبى معمر القذافى يخطب فى الليبيين ليعلن عبور القوات المصريه لقناة السويس وأشتعال حرب شرسه على الجبهه السوريه فى أحدى خطاباته الحماسيه فى الوقت اللى لسه لحد دلوقتى السادات مظهرشى أمام المصريين ليحدثهم فيما حدث (( هيكل فى كتابه بيحاول يفهمنا أنه هو اللى سبب تأخر السادات فى ألقاء كلمه لشعبه حسبما نصحه هيكل أو حاول يفهمنا لأسباب غير مفهومه )) لكن القذافى فى خطابه ذكر مصطلحين أحدهم أغضب السادات المصطلح الأول هو حرب التحرير والمصطلح واضح ولايقبل التقويل والمصطلح التانى حرب التحريك وده مصطلح يعنى أنها حرب سياسيه وأن كان ظاهرها عسكرى لكن المستهدف منها هو تحريك القضيه فقط لاغير وده اللى أغضب السادات جدا  وطبعا  حاولت الحصول على نص الخطاب وفشلت واللى يقدر يعثر عليه يحط الرابط بتاعه  فى التعليقات  لكن تقريبا والله أعلم حد من مصر من المحيطين بالسادات  أتصل على السفير الليبى فى الخباثه وفهموا أن السادات زعل من الخطاب فما كان من العقيد القذافى إلا أنه أتصل على السادات تليفونيا

سرى جدا

نص الحديث التليفونى

 بين سيادة  الرئيس أنور السادات والعقيد معمر القذافى

الرئيس : أهلا ... أزيك يامعمر

العقيد : أهلا ... نريد صوره عن الموقف

الرئيس : أبعت لنا حد يامعمر ... من عندك يقعد معانا وينقل لك الصوره

العقيد : أحنا بس عاوزين نطمن

الرئيس : الموقف بخير خلصنا القنطره شرق والجزء الشمالى من القناه وماشيين الحمد لله زى ماأحنا كويسين

العقيد : ياريس شدوا حيلكم

الرئيس : أحنا ماشيين يامعمر

العقيد : ياريس ... الأذاعه بتوضح العمليات قدام العدو ... بلاش الأذاعه ... أحنا هنا متضايقين ... لازم يكون فيه أسلوب متفق عليه بواسطة الأذاعه

الرئيس : كل حاجه عال ... أبعت لنا حد يقعد معانا يومين ويبقى يرجع تانى عندك علشان يبلغك أول بأول ... يعنى حد يوصل يومين ويرجع وهكذا

العقيد : أخبار سوريا إيه ؟؟؟

الرئيس : النهارده العصر أخدوا موقع أهم من جبل الشيخ

العقيد : وأخبار القنيطره ؟؟؟

الرئيس : القنيطره خلاص

العقيد : والمضايق ؟؟؟

الرئيس : حسب الخطه يامعمر ... واحده واحده ... خليك مطمن قوى على وجود القوات فى سيناء وماتقلقشى ... القوات والدبابات عبرت متقلقش

العقيد : ياريس ... القواعد الأسرائيليه متخلوهاش تعمل

الرئيس : لما نكمل الطيارات يامعمر

العقيد : مادامت المعركه وقعت لابد من الأستمرار بغض النظر عن أختلاف وجهات النظر (( خلى دى معاك ))

الرئيس : صح .. صح

العقيد : شكرا

الرئيس : طب مع السلامه

العقيد : مع السلامه

أنتهت المحادثه لكن لنا لقاء تانى مع هذه المكالمه بس خليك فاكرها الله يرضى عليك

أعزائى المسافرين والمسافرات على طائرة (( فريق مصر أم الكون )) فى هذه اللحظه التاريخيه وصلتنى أشاره بضرورة التوجه لأسرائيل فورا  لأن كما تقول الأشاره فيه أحداث رهيبه تحدث هناك فلتنوجه بالطائره لأسرائيل بسرعه

الأثنين 8 أكتوبر 1973 وقع فى أسرائيل زلزال عسكرى هز أركان الجيش الأسرائيلى كله وأصاب أفراد الجبهه الجنوبيه بالأحباط وخيبة الأمل وأنخفضت الروح المعنويه لمستويات متدنيه بعد أن قامت جولدا مائير بعزل الجنرال جونين قائد المنطقه الجنوبيه بعد فشله فى إدارة المعارك مع المصريين تكبد فيها الجيش الجنوبى خسائر فادحه فى المعدات والأفراد وأستطاع الجيش الثانى والثالث المصريين  العبور الكامل لقناة السويس وأستولى على أسلحه كثيره من الجيش الأسرائيلى وتم تعيين الجنرال بارليف قائدا عاما للجبهه الجنوبيه  اللى قلتلك أنهم شالوه من منصب وزير الصناعه والتجاره يومها وعودته للخدمه للأستفاده من خبراته العسكريه وخصوصا أنه صاحب خط بارليف الذى لايقهر  

برضوا الأثنين 8 أكتوبر 1973 موشى ديان على الجبهه الجنوبيه بيزورها علشان يشرح سبب عزل القائد القديم وتعيين بارليف خلفا له وبيشرح للقاده الميدانيين أسباب هذا الزلزال لكن القاده بهدلوه ومرمطوا بكرامته الأرض وأزاى القاده فى المكاتب مش قادرين يديروا المعركه وقواتهم بتتعرض لخسائر رهيبه وأزاى المصريين تفوقوا عليهم رغم تفوق العتاد الأسرائيلى ورجع ديان من على الجبهه وهو فى حالة أعياء شديده بعد هجوم القاده الميدانيين عليه وفكر فى تقديم إستقالته على حسب كلامه فى مزكراته وطبعا هو حلل هجوم القاده الميدانيين للجيش الجنوبى من وجهة نظره لكن أنا حنقل لكم تحليل الدكتور بريش أحد أعضاء لجنة التحقيقات أجرانات فى حرب أكتوبر

يقول بريش فى تحليله للهجوم على ديان :

1 _ هاجموه وهو يدافع عن القرار الخاص بإمتناع إسرائيل عن توجيه ضربة أجهاض بالقوات الجويه للقوات المصريه والسوريه قبل ساعات من بدء الهجوم وكان رده ( لم يكن فى مقدور الأمريكان أن يساعدونا كما يفعلون الآن لو أننا كنا بدأنا بضربه وقائيه لأسباب سياسيه (( على فكره أنا شرحتها فى مقال سابق لو مركز معايا وفاكر )) وليست لدينا كفايه من الأصدقاء لنفرط فيهم وهو ماكان سيحدث لو أننا بدأنا الحرب ولو كنا فعلنا ذلك لما كان من حقنا أنتظار أن يصفق لنا الآخرون ))

2 _ هاجموه على الطريقه التى بدت بها أسرائيل غير مستعده لعنصر المفاجأه الذى قام به السادات وأعوانه وكان رده (  أننى أسلم بأن هالة التفوق الأسرائيلى فقدت بريقها فقد كانت تعتمد هذه الهاله على أن العرب لن يجرأوا على البدء بقتال شامل وإذا فعلوا فلابد من هزيمتهم من أول لحظه وهو يوافق على أن أسرائيل يجب أن تعتمد على نفسها  وعلى موازين القوه بينها وبين أعدائها وعلى أى حال فأن تعويض ضياع هالة التفوق يمكن تعويضا هذه المره بالعامل الأمريكى وهكذا فأن فى هذا اليوم العصيب لم يكن أمام أسرائيل إلا الأعتماد على الجانب الأمريكى الذى أشار له الجنرال موشى ديان أزاء كل ماتعرض له من أنتقادات من قادة المنطقه الجنوبيه

يوم 8 أكتوبر 1973 على الجبهه السوريه كانت أسرائيل فى موقف عصيب وعنيف فقد بدأت القوات السوريه مع أول ضوء للفجر فى التقدم بهجوم بالمدرعات بشكل مكثف وقوى وشرس أدى ألى أنهيار الخطوط الأسرائيليه على الجولان السوريه وهدد بالوصول لمستعمرات نهر الأردن وعند الظهيره ظهرت المدرعات السوريه أمام المعسكرات الأسرائيليه فى منطقة نافخ على أطراف الجولان وأصبح فى أستطاعتها الوصول لوادى الحوله من خلال جسر بنات يعقوب مما دفع الجنرال أليعازر بأتخاذ قرار بتكثيف الهجوم الجوى على الجبهه الشماليه لوقف التقدم السورى وحدثت غارات رهيبه لم يشهد مثلها التاريخ العسكرى تكبدت فيها القوات السوريه خلال ساعه واحده فقط فقدان 600 دبابه (( بعض التقارير بتقول 350 دبابه فقط وبعضها بيقول 400 دبابه لكن تقرير المخابرات الحربيه المصريه بيقول مايقرب من 400 دبابه وكده ولا كده العدد رهيب خصوصا أنه فى ساعه واحده ونجحت أسرائيل فى وقف الهجوم السورى  )) (( وخلى دى معاك ))

يانهار مش فايت الوقت سرقنا مع بعض ومؤشر وقود طائرتنا ينذر بقرب نفاذ الوقود وعلينا الهبوط فورا لأعادة التزود بالوقود على وعد بأستئناف الرحله وتربط بقى الحزام  ولا متربطشى ربنا يستر ونعرف نهبط بالطياره

جنرال بهاء الشامى

معجزة جيش وشعب رقم 22

  ليدز آند جنتلمن الطائره المتواجده على مدرج رقم 1 لمطار أم الكون التاريخى هى طائرة (( فريق مصر أم الكون )) ومحركاتها تدور لتعلن عن بداية الرحله التاريخيه رقم 22 والأقلاع لسماء التاريخ فبرجاء ربط الأحزمه وعدم التدخين وإغلاق الموبيلات من فضلكم وكنا قد توقفنا فى رحلتنا السابقه عند المكالمه اللى حصلت بين السادات وفلاديمير السفير السوفيتى بالقاهره وأغلق السادات الخط وعلى وجهه أبتسامه عريضه ليخبر من حوله أن السوفييت وافقوا على طلب أرسله لهم فى الصباح بتزويد مصر بصواريخ الـ (( فولجا )) وقال السادات هذه الصواريخ سوف تساعدنا على تغطية قوات المشاه داخل سيناء وهذا يسمح لنا بتنفيذ التكتيك قفزة الضفادع (( مصطلح عسكرى يعنى القفز الطويل المفاجئ فى أى أتجاه )) داخل سيناء عندما تبتعد القوات عن حائط الصواريخ (( واخد بالك ياعم هيكل علشان بس ماتقولشى السادات غلط لما أتكلم عن تعمق القوات داخل سيناء )) وأسوء شئ فى الكاتب أو المحلل لما يحاول يستغفل القارئ بيكون سقوطه مروع

قال السادات الفولجا سوف تصل مصر اليوم بالطائرات قبل السحور وأن فيه معدات ثقيله يتم شحنها الآن على المراكب وستصلنا فى حماية الأسطول السوفيتى المتمركز فى البحر المتوسط وطلب السادات يوصلوه بأحمد أسماعيل علشان يبلغه بنفسه وفعلا كلم السادات أحمد أسماعيل وبلغه برسالة السفير السوفيتى وقال له إيه رأيك كيف ترى موقف السوفيت الآن  فقاله أسماعيل لقد وجدوها فرصه لعودتهم مره أخرى للشرق الأوسط (( نفس الفرصه اللى قدمها السيسى لبوتين على طبق من ذهب وبيحاول يضيعها ))

كانت إدارة الأفلام الوثائقيه  بالقوات المسلحه  جهزت فيلم عن أول يومين حرب وحضر الفيلم لقصر الطاهره وطلب السادات تجهيز قاعة الأفلام بالقصر ليشاهد الفيلم  (( هيكل فى كتابه تعمد يقول فيلم فقط بدون أى توضيحات ليوحى للقارئ فى أيعاز خبيث وقذر أن الحرب شغاله والسادات قاعد بيتفرج على أفلام لكن السادات فى كتابه وقبل هيكل مايكتب كتابه بأكتر من 10 سنوات ومن غير مايعرف هيكل حيكتب إيه علشان يرضى مبارك ويشوه السادات قال أنه فيلم وثائقى   )) وأثناء مشاهدة الفيلم اللى مدته 15 دقيقه قوطع عرض الفيلم بيرقيه تناقلتها وكالات الأنباء العالميه وعرضت على السادات بطلب نيكسون عقد أجتماع عاجل لمجلس الأمن فأعطى سيد مرعى البرقيه وقاله معنى الكلام ده إيه يامرعى  فقال مرعى معناها واضح ولو فى نيتهم التدخل العنيف مكانوش لجئوا لمجلس الأمن وهوعارف كمان أن مجلس الأمن لن يتخذ ضدنا أجراء عنيف خوفا من الفيتو السوفيتى والصينى (( هيكل فى كتابه بينسب التحليل ده لنفسه رغم أنها مش بطوله تحليل برقيه أنا ممكن أحللها بصباع رجلى  لكن زى ماقلت لك أن هيكل فى كتابه عاوز يوحى أن السادات كان من غيره ولا حاجه ))

الساعه 6.45 صباحاً يوم 8 أكتوبر 1973 يصل السادات أتصال هاتفى من الشئون العسكريه للقوات المسلحه بالتقرير الميدانى الآتى :

سرى جدا 

مكتب الشئون العسكريه

تقرير موقف ميدانى عن اليوم الثالث قتال 8 / 10 / 1973

** العــدو :

_ قام العدو بعدة ضربات   مضاده ومعارك تعطيليه فى منطقة رؤوس الكبارى مع عدم التورط مع قواتنا فى معارك حاسمه

_ قام العدو بعدة عمليات خاصه فى العمق

_ يركز العدو مجهوده الجوى  لتعطيل معابر القطاع الجنوبى وأجهزة الردار

_ يركز العدو جهوده على تثبيت الجبهه السوريه للتفرغ للجبهه المصريه

_ يعانى العدو من أنخفاض حاد فى الروح المعنويه لقواته

_ يستخدم العدو عمليات الخداع اللاسلكى بصوره واسعه

قــــــواتنا :

أولا : القوات البريه

_ تواصل قواتنا البريه تنفيذ مهامها القتاليه المنوطه بها بنجاح

_ جارى تحقيق المهام النهائيه لتشيكلات النسق الأول رغم تدخل العدو الجوى المكثف

_ تقوم قواتنا بصد الهجمات المضاده بمعاونة القوات الجويه لأحتياطيات العدو التكتيكيه والتعبويه

ثانيا : القوات الجويه

_ قامت قواتنا الجويه بتنفيذ هجمات ضد أهداف العدو الجويه ومراكز قياداته وتجمعات مدرعاته التى تستعد لهجمات مضاده على المحور الأوسط

ثالثا : القوات البحريه

_ تم قذف مراكز وتجمعات العدو فى خليج السويس مع أستكمال تلغيم مدخل الخليج

_ تم أغراق 4 لنش معادى

_ تم إغراق مركب تجارى إسرائيلى بالبحر الأحمر بواسطة غواصه مصريه

الجبهه السوريه :

_ معدل تقدم بطئ  عن اليومين السابقين

_ تواجه القوات السوريه مقاومه شرسه من قوات العدو

التحليل :

_ يهدف  العدو إلى كسب الوقت مع تثبيت قواتنا فى  حدود المنطقه التى أستردها فى سيناء حتى الآن لحين توفير قدرات مناسبه وخاصه من قواته المدرعه مع محاولة سحب قواتنا المدرعه لخارج نطاق الدفاع الجوى (( واخد بالك ياعم هيكل ))

_ لم يستخدم العدو قواته الجويه بأقصى طاقتها بعد . ومن المنتظر أن يتم ذلك مرتبطا بتوفير قدراته لتنفيذ ضربه مضاده قويه بقواته المدرعه

_ ينتظر أن يستمر العدو فى أتباع أساليب الخداع  مع محاولة أستعادة المبادأه لجانبه

_ يتوقع تنفيذ عمليات خاصه فى منطقة البحر الأحمر والعمق وغرب بورسعيد فى الفتره الحاليه

الساعه 7.20 صباحا يوم 8 أكتوبر 1973 بتوقيت أم الكون يصل تقرير من المخابرات الحربيه لقصر الطاهره مضمونه :

** العدو يدفع بتعزيزات عسكريه حديثه ومكثفه للخطوط الأماميه للقتال على الجبهه المصريه فى محاوله منه لتحقيق فوز معنوى لكن التسرع وعدم الأعداد الجيد دونقدر كاف من الحشد والتركيز يكبده خسائر فادحه ومتسارعه وغير متوقعه لدرجه أحدثت أرتباكا شديدا فى تحركات وأوضاع القوات الأسرائيليه

** أعداد الأسرى الأسرائيلين تفوق المتوقع بأضعاف مما يشكل عبأ على عملية نقلهم للخطوط الخلفيه

** لوحظ على قوات العدو التدهور الشديد فى الروح المعنويه وننصح بتطوير الهجوم فى هذه المرحله مع ماترونه مناسبا لظروف المعركه

الساعه 7.30 صباحاً يوم 8 أكتوبر 1973 بتوقيت أم الكون السادات يتصل بأحمد أسماعيل ليطمئن منه على حالة الجبهه وفى نهاية الأتصال وعكس تقرير المخابرات الحربيه أتفق السادات وأسماعيل على ضرورة تأجيل تطوير المرحله الثانيه من الهجوم المصرى التى تستهدف الوصول للمضايق لسببين :

** أنتظار رد كسينجر على رسالة السادات

** لامانع من ترك الأسرائيلين يخبطون رؤوسهم فى حائط المواقع المصريه ويتكبدون أكبر قدر من الخسائر فى حالتهم العصبيه التى  تنتاب قادتهم

أعزائى المسافرين معنا يبدون أن وقود طائرتنا أوشك على النفاذ لذا نستسمحكم ربط الأحزمه وعدم التدخين وإغلاق الموبيلات للهبوط بطائرتنا وإستئناف الرحله بعد أعادة التزود بالوقود التاريخى

جنرال بهاء الشامى

معجزة جيش وشعب رقم 21

حلقة النهارده ممكن تصيبك بالضغط أو أمراض القلب من الحسره على حال العرب لذلك أنصحك وأنت بتقرا المقال تكون جنبك كرتونة الأدويه الخاصه بسيادتك وأعلن أخلاء  مسئوليتى من أى حوادث تحدث لقارئى المقال  

الساده والسيدات المسافرين على متن طائرة (( فريق مصر أم الكون )) والرحله رقم 21 من رحلات الفريق فى سلسلة مقالات معجزة جيش وشعب برجاء ربط الأحزمه وعدم التدخين وإغلاق الموبيلات وكنا قد أنتهينا فى رحلتنا السابقه على دخول كسينجر جناح الطوارئ بوزارة الخارجيه الأمريكيه علشان يتخمد ينام لكن دخل عليه مدير مكتبه معاه رساله من الشرق الأوسط من الملك فيصل ملك السعوديه رحمه الله ردا على رسالة كسينجر اللى كنت قلتلك أن كسينجر أرسلها يوم 6 أكتوبر  علشان يطلب من فيصل يكلم السادات ويضغط عليه علشان مايتهورشى ويهاجم أسرائيل وحزعل قوى لو كنت نسيت ولو نسيت أعمل نفسك فاكر علشان ماتحبطنيش وندخل فى الموضع ونشوف نص رسالة الملك فيصل بيقول إيه ومش عاوزك تزهق منى بنقلى لنص الرسائل علشان بنعوزها تانى بعد كده وأديك شفت الحلقتين اللى فاتوا إحتاجنا لرسالة السادات

هذه الرساله من الملك فيصل عاهل المملكه العربيه السعوديه

إلى معالى الوزير هنرى كسينجر وزير خارجية الولايات المتحده الأمريكيه

تلقيت رساله معاليك المستنده لتقرير وردكم من دوله معاديه (( خلى بالك هنا فيصل مش عاوز يعترف بإسرائيل كدوله رغم أنه بعد كده حيذكر أسمها صراحة لكن بدون مايقول دولة أسرائيل )) بأن القوات المصريه والسوريه تنوى شن هجوم نسق على القوات الأسرائيليه

ولدى بدأ الأشتباك فعلا بين القوات المصريه والسوريه من جهه والقوات الأسرائيليه من جهه أخرى فى البر والجو (( خلى بالك من أختلاف الروايه السعوديه والمصريه فقط لأن مصر قالت أن البدايه كانت هجوم بحرى فى خليج السويس  ))  فأن معاليك تأكد أن البادئ بهذا الهجوم هوالقوات الأسرائيليه (( الله والله والله  على العرب لما يبقوا أيد واحده مش زى دلوقتى )) وفى أعتقادى أن هذا الهجوم هو حلقه من حلقات السياسه الأسرائيليه لتنفيذ مخطط التوسعيه التى رسمتها سياستها العدوانيه ضد الدول العربيه (( شايف ياعم الجبير أسلافك كانوا بيقولوا إيه مش أنت اللى بتبوس جزم اليهود دلوقتى علشان مشكله مع دوله شقيقه أو كانت فى يوم شقيقه )) لأن العرب لم يقوموا بأى عدوان ضد إسرائيل منذ نشأتها وأن العدوان كان دائما من قبل أسرائيل لتكسب فى كل عدوان أرض جديده وفقا لمخطاطتها المرسومه سابقاً (( الله عليك يافيصل قسم ودلعنى وشوف بقى اللى جاى  )) فأن لم تهب الولايات المتحده بردع أسرائيل عن التمادى فى غيها وعدوانها فسوف ينفجر البركان الهاجع حتى الآن فى الشرق الأوسط (( شايف يانجم التهديد المباشر مش بوس الجزم دلوقتى  )) وسوف لايقتصر تدميره على المنطقه لوحدها بل سيتعداه إلى حرب عالميه شامله تصطلى جميع الدول بنارها على الرغم مما نصت عليه أتفاقية عدم المجابهه بين الدول الكبرى (( ياربى على حلاوتك وطعامتك يافيصل وأنت بتهدد مش بتوع دلوقتى بيسجدوا ويسبحوا بحمد حاكم البيت الأبيض للحفاظ على الكراسى )) 

ولهذا فأن المسئوليه الكبرى فى هذا الصراع القائم بالمنطقه تقع على عاتق أسرائيل وعلى الولايات المتحده الأمريكيه أن تجبر أسرائيل على الأنسحاب من الأراضى العربيه وأعطاء الشعب الفلسطينى حقه فى أرضه ووطنه

كنت عاوز بكل أمانه أقفل السلسله لحد هنا وننهيها  وأكتفى بما تحمله هذه الرساله من معانى لأن كده الرساله دى حققت الغرض من نشر السلسله فى العموم  لكن هناك رساله أخرى من الملك فيصل رحمه الله شفويه لنيكسون نفسه

قرأ كسينجر رسالة الملك فيصل رحمه الله وأعتبرها فات أوانها لأن خلاص فعلا الحرب قامت وقبل مايسلمها لمدير مكتبه دخل مساعد مدير مكتب كسينجر برساله تانيه من الملك فيصل شفويه موجهه للرئيس الأمريكى ريتشارد هارد نيكسون (( على فكره كل هذه الرسائل أو الوثائق موجوده عندنا وحنحاول ننزلها فى ألبوم خاص بالسلسله علشان اللى عاوز يحتفظ بيها لأولاده وأحفاده كتاريخ موثق )) ونرجع لرسالة أسد العرب الملك فيصل رحمه الله لنيكسون وبرضوا حنقلها لكم وعاوزك تركز معايا قوى فى كل كلمه ولازم تبقى عارف أن الملك فيصل كان مشهور بعصبيته فى موضوع القدس مش زى بتوع اليومين دول رووبه عليهم

مذكره شفويه تسلمت للسفاره الأمريكيه لأرسالها

لفخامة الرئيس نيكسون من جلالة الملك فيصل

فخامة الرئيس

لقد أندلعت نار الحرب للمره الرابعه فى منطقة الشرق الأوسط نتيجه لمخطط توسعى تقوم أسرائيل بتحقيقه تنفيذا لتعليمات الصهيونيه العالميه . ولقد أسدينا النصح لكل من أجتمعنا به من أصدقائنا الأمريكان . وكتبنا لفخامتكم ولفخامة سلفكم الرئيس جونسون بأن الحرب قائمه لامحاله (( هنا بيقوله فكك من الأسباب ومين بدأ ومين مبدأش لكن فيه حرب لازم تقوم لتحرير الأرض )) إذا لم تسارع أمريكا بالضغط على أسرائيل بعدم التمادى فى غيها وغطرستها والأقلاع عن تحديها لقرارات الأمم المتحده والرأى العام العالمى . وما من شك  بأن هذه الحرب إذا أستمرت فسوف تضطر جميع الدول العربيه بخوض غمارها (( واخدلى بالك من كلام السعوديه زمان مش بتاعة دلوقتى اللى بتدمر كل الدنيا حواليها وبتعمل كده علشان مين دلوقتى ولصالح مين   )) ومن بعدها الدول الأسلاميه والدول الصديقه وستكون حرب شرسه تدمر حضارة القرن العشرين وجميع القيم الأنسانيه (( قول كمان ياأسد العرب وحسرنى على اللى بنشوفه دلوقتى من السعوديه نفسها وعلشان كده كان لازم يخلصوا منك يابطل )) كما لن تكون الدول الكبرى بمنأى عنها حفاظا على مصالحها فى هذا الجزء الحساس من العالم (( تهديد واضح وصريح لأمريكا نفسها ))

وأننا لنناشد الولايات المتحده الأمريكيه أن تنظر لهذا الموضوع بعين الحكمه والعقل . لأن هذه الحرب ليست كالحروب السابقه لأن المشاعر العربيه ملتهبه والصبر لدى العرب بلغ مداه . ولهذا ننصح أن تجبر الولايات المتحده إسرائيل على الأنسحاب عن الأراضى المحتله وتطبيق قرارات الأمم المتحده التى وافقت عليها الدول المعنيه . ونأمل من الولايات المتحده ألا تزود أسرائيل بالسلاح لئلا يطول أمد الحرب وتتصعد ويلاتها ولكى لاتنتشر الشيوعيه بالمنطقه (( هنا بيفكره أننا كعرب ودول أسلاميه حنترمى فى حضن الأتحاد السوفيتى للأستفاده منه سياسيا وعسكريا ))

مش حعلق ولا حلل الرساله وأظن أنها واضحه وضوح الشمس لكن اللى عاوز أقوله أحنا بنكلم مين أمريكا هى أسرائيل وأسرائيل هى أمريكا والله يرحمه عبدالناصر لما قال لو أمريكا رضيت عنى أعرفوا أنى ماشى غلط

الساده المسافرين والمسافرات على رحلتنا  طائرتنا تعود لأرض الوطن من أمريكا لنعرف ماذا يدور فى القاهره يوم 7 أكتوبر 1973 فأستعدوا للعوده لوطنكم بطائرتنا التاريخيه

الساعه 7.00 مساءا الأحد 7 أكتوبر 1973 بتوقيت أم الكون والسادات فى قصر الطاهره زى ماقلتلك قبل كده فى زى ملابسه العسكريه مزهوا بنصره كالطاووس  فى صالون الدور الأرضى اللى بيطل على البلكونه الرئيسيه ويدخل عليه المهندس سيد مرعى وأستمع منه  لتقرير شفوى من مرعى عن اللى حصل الصبح فى نفس اليوم فى مكتب الدكتور محمود فوزى فى وزارة الخارجيه فى حضور الدكتور مصطفى خليل وإيه اللى تم فى موضوع أستخدام البترول كسلاح فى هذه الحرب وقدم له تصور نهائى للموضوع ده (( خليك مركز مع اللى خلفونى علشان تبقى فاهم أن اللى بيحصل دلوقتى من تحت راس حرب أكتوبر وأنهم مخططين لك من وقتها وتبقى عارف أن الحرب مش بارود وبس لكن فيه حرب سياسيه بتظل قائمه بعد صمت البارود وممكن تمتد لعشرات السنوات ))  ... فى الوقت ده دخل المهندس عبدالفتاح عبدالله ليقرأ على السادات مجموعة برقيات وصلت من الجبهه عن تانى يوم قتال وفى نفس الوقت برضوا دخل أشرف مروان ليخبر السادات أن السرب الليبى الثانى من طائرات الميراج وصل مطاراتنا العسكريه وأنضم للسرب الأول وكان القذافى أرسل سرب قبل الحرب ليكون تحت تصرف مصر (( خلى دى معاك ))

السادات مكانشى لسه فطر لحد دلوقتى ماأنت فاهم أننا فى شهر رمضان وبعد ماسمع شوية الأخبار الحلوه دى  طلب من الحاضرين يطلعوا الدور اللى فوق يفطروا معاه وطلعوا فعلا كلهم وفطروا مكرونه وفراخ وخضار مسلوق والحلو طبعا كنافه وقعدوا على سفرة الرئاسه وأنضمت للسفره السيده جيهان السادات وسيد مرعى وأشرف مروان ومحمد هيكل وسيد مرعى وعلى غير العاده كبرتوكول سياسى  أتكلم السادات فى الحرب وأتكلم على الميعاد اللى أتسرب ورغم كده كان مفاجأه لليهود وأتكلم أنه خايف من التفوق الجوى الأسرائيلى لذلك بيفضل أسلوب أضرب وأجرى بدون الدخول فى أشتباكات مباشره لكن جيهان السادات كانت متوتره ومش مركزه فى كلامه ومش مهتمه بالأكل رغم أنها هى اللى كانت بتشرف بنفسها على أصنافه لكن جيهان كان جواها قصه تانيه وخايفه على السادات وهو فرحان بأنتصاره يعرف أن أخوه عاطف أستشهد النهارده

خلصوا فطار وكلوا الكنافه وأتنقلت الشله كلها للصالون فى جلسه شبه عائليه لأن جيهان طلبت أن كل أسرة السادات تكون جنبه فى قصر الطاهره فى اليوم ده بالذات ودخلت بنته وخطيبها وبرضوا السادات مش عاوز يبطل كلام عن الجبهه والحرب وأتكلم عن اللواء عبدالمنعم واصل وشكر فيه وفى بطولته وقال بصوته الراجل كان واقف بنفسه على أول كوبرى عملوه الولاد

والسادات قاعد كده وكله حواليه قالوا له السفير السوفيتى فلاديمير فينوجرادوف على التليفون يافندم وطلب يوصلوا له الخط وأتكلم مع السفير وطوال المكالمه السادات بيقول نعم نعم أيوه نعم برافو ورائع وأختتم المكالمه بجمله هامه وخطيره ستغير مجرى الأحداث  لكن وقود طائرتنا أوشك على النفاذ ونريد الهبوط للتزود بالوقود لذا نستسمحكم ربط الأحزمه وعدم التدخين لتعاود طائرتنا التحليق فى سماء التاريخ مره أخرى مع

جنرال بهاء الشامى