سوريا وفرق العوالم

بعيدا عن العواطف فى عالم السياسه تعالى نشوف فرح العوالم

لما بتحب تعمل فرح ويسمع فى المنطقه بتجيب فرقة عوالم تحيلك الفرح لكن لما بقى فرقة العوالم دى تحب تعمل فرح لنفسها ماذا يحدث

طبعا بيكون فرح أسمه فرح العوالم وكل عالم وعالمه بيروحوا ينقطوا فى الفرح بمجهودهم واللى مش فاضى بيبعت نقطه حلوه أو طبال أو زمار من فرقته يساهم فى فرح العوالم 

أبن تنزيله قلتلك عمل تغيير جذرى فى الجيش التركى بعد مسرحية الأنقلاب وقلتلك أن نظرية التغيير الجذرى ثبت فشلها عمليا ولنا فى دروس التاريخ عظه وعبره وأولها ماحدث للجيش الأيرانى فى بداية قيام الثوره الأيرانيه والأطاحه بالشاه وقلتلك فى سلسلة مقالات حرب الخليج أن التغيير الجذرى كان سبب مباشر فى أطالة أمد الحرب الخليجيه وهو نفس التغيير اللى حصل فى الجيش العراقى وهو نفس التغيير اللى عملوا الخوان لما مسكوا الحكم فى مصر وحاولوا ينفذوه ويأخونوا الدوله بطريقة التغيي الجذرى فسقطوا سقوط ذريع وهو نفس التغيير اللى عمله أبن تنزيله فى الجيش التركى وعلشان كده وبما أن السيسى تلميذ شاطر فى مدرسة التاريخ ماشى بنظرية التغير التدريجى لمنظومة الفساد المصريه لأنه لو أتبع نظرية التغيير الجذرى ستكون العواقب وخيمه لذلك هو ماش تاتا تاتا وعلى مهله بعد ثبوت فشل نظرية التغيير الجذرى وسامحنى بخرج بره الموضوع الكلام بيجيب بعضه

الجيش التركى اللى كان مصنف سابقا كأحد أكبر جيوش المنطقه تراجع عمليا ووقف أمام قريه فى سوريا شهرين مش عارف يدخلها وبيحارب شوية بنات هناك وطبعا إحقاقا للحق مش قادر برضوا يدخلها بدون غطاء جوى

علشان أبن تنزيله يعمل طلعات جويه لابد أولا من موافقة الروس المسيطرين على منطقة عفرين جويا وخلى دى معاك 

عندنا الأمريكان بيدعموا الأكراد فى عفرين يعنى اللى يجى على الأكراد فى عفرين يبقى بيحط على الأمريكان وعلشان كده وقفته طولت لمدة شهرين قدام عفرين

سمعنا عن مؤتمر قمه ثلاثى بين روسيا وأيران وتركيا فى أوائل أبريل وفجأه زى الساحر الهندى صحينا من النوم لقينا أبن تنزيله دخل عفرين بدعم جوى وأستولى عليها فى ساعتين بعد مافضل واقف قدامها شهرين

أبن تنزيله مش لاعب فى الملف السورى لكنه ورقة لعب وأهم ورقة لعب فى ورق الكوتشينه فى الملف السورى لموقعه الجغرافى الخطير مع سوريا ومش ببالغ لو قلتلك أبن تنزيله هو ورقة الجوكر لكنه مش لاعب هو مجرد ورقه من أوراق اللعب ويمكن أهمها وبوتين رماله ورقة عفرين اللى عملاله هيستريا عضمه يكسبه بيها

كده بوتين غفل الأمريكان ولطعهم قفا بأيد أبن تنزيله وبما أن أبن تنزيله رفض وقف صفقة الأس 400 أذن كان ولابد من توجيه قفا لبوتين نفسه

حوش ياجدع وألحق ياجدع الواد بوتين عمل حادثة الجاسوس الروسى وأتلمت فرق العوالم كلها وطردت الدبلوماسيين الروس وكل العوالم جاملت ونقطت فى الليله دى  

بوتين قال ورحمة أمى وشرفها الغالى ماليش فى الليله بتاعة الجاسوس وأنا ياأهل الخير عازم رؤساء تحرير العالم على يوم فى روسيا وحكشف لهم كدب فرق العوالم فى العالم كله وحثبت أنى برئ من دم الجاسوس الروسى

منفعشى القلم ده ومطرقعشى على قفا بوتين قالك ألحق ياجدع الواد بشار اللى سلمنا الكيماوى بتاعه كله ودخلنا فتشنا سوريا كلها وقلبناها وخدنا الكيماوى اللى فيها بيضرب شعبه بالكيماوى (( عاوز أوضح موضوع الكيماوى وهو سلاح موجود فى كل دول العالم وكل دول العالم عندها أسلحه كيماويه بما فيها مصر وأمريكا وروسيا وأسرائيل لكن فيه أتفاقيه كل دول العالم موقعه عليها بعدم أستخدام السلاح النووى ضد المدنيين ومعها القنابل العنقوديه والأنشطاريه والجرثوميه والبكترولوجيه لكن مسموح بٍأستخدمها  ضد العسكريين لكن لما أسرائيل أستخدمت القنابل العنقوديه ضد سكان غزه كان عادى ))

طبيعى كان بوتين فى محاوله طبيعيه يطالب بالتحقيق المحايد فى قصة الكيماوى وخصوصا أن عندنا سوابق لأمريكا تنصب الفرح والهليله وتدمر بلاد خلق الله وبعدين يرجع عمنا تونى بلير يقول آسفين ياجماعه معلوماتنا خطأ وكأن آسف رجع الجيش العراقى زى زمان أو رجع العراق زى زمان أو رجع صدام حسين من الموت 

فرق عوالم والمطبلاتيه بيحالوا يضغطوا على بوتين وبما أنهم ملسعوين قفا من بوتين فى عفرين وبما أنهم مايقدروش يلسعوا بوتين قلم مباشر وفشلوا فى ملف الجاسوس قالك نضرب عيل من عيال بوتين راحوا طالعين بتمثيلة كيماوى بشار وطبعا الجزيره اللذيذه مفوتتشى الليله من غير نقوط والسعوديه طلعت ترش بنكنوت على صدر الرقاصه وشيكاليه والجبير مدوا أيديهم فى جيب الشعب السعودى وبيهبشوا ويحطوا فى صدر الرقاصه علشان يحسسوا على صدرها ويسهوها علشان ورق إعتماد شيكاليطه يتختم والواد من نصحاته راح زار بوش الأب والأبن قال إيه بيفكرهم بجدعنة أبائه وأجداده مع العوالم والرقصات 

بوتين رزع الأمريكان قفا علشان يضم أبن تنزيله لقفصه وفوت له ملف عفرين علشان محتاجه فيما هو أهم وأبن تنزيله عيل اللى يرميله عضمه يلحس جزمته ولأن أبن تنزيله عنده قواعد فى بلده للناتو ولو أتقمص من الأمريكان أو قرصوا عليه بزياده ممكن ينسحب من حلف التاتو ويحرم فرقة العوالم من ميزه رهيبه بتواجدها فى أهم بؤر الصراع وعلشان كله فاهم زى ماحضرتك فاهم يبقى اللى حيحصل إيه

قلم صغنون أثبات للوجود ماهو مش معقول عفرين تعدى كده وناخد قفا من غير مانرده لكن وبما أن محدش يقدر يقرب من قفا بوتين يبقى اللى حايخد القفا عيل من صبيان بوتين وهو بشار الأسد وياخد القلم عن طريق ضرب مطار ولا أتنين عسكريين أو قاعده متلقحه هنا ولا هناك وبعيده عن سيطرة الروس وبالمره نخدم على عوالم اليهود ونخلى الضربه تصب فى مصلحتهم

أغلب الظن كام غاره جويه بعيدا عن أماكن الأحتكاك بالروس على مواقع أستراتيجيه   

طبعا أحنا قاعدين نتفرج على قفا هنا وقفا هناك لكن فيه ناس ملهاش فى السياسه بتدفع التمن وتموت ودمها بيتوزع على العوالم

السياسه لاتعرف المشاعر أو العواطف أو الشفقه أو الرحمه وكل اللى تعرفه قفا قصاد قفا طالما تقدر ترزع القفا لكن فيه رب فوق سبع طباق حيحاسب كل من فتح أزازه وساهم فى قتل برئ فى سوريا

الأمريكان وفرق العوالم ومعاهم تركيا وأيران وروسيا وقبل منهم فى أول الصف السعوديه وكطر ودول الخليج ومن هرب من بلده وسابها للمرتزقه ومن هاجر من بلده وقال لبيك ياسوريا وبشار الغبى اللى أنسحب من لبنان ووضحتها فى مقال قبل كده كل هؤلاء سيقفون أمام الله ويسألون عن كل سم دم سورى روى تراب سوريا لكن يبقى ذنب اللى بيمول هو أكبر الذنوب من أيام وعد بلفور وتسليم فلسطين للعوالم وكل حروب المنطقه مرورا بأفغنستان والعراق واليمن وسوريا وليبيا ومايفعلوه حاليا فى الجزائر والمغرب وليعلم القاصى والدانى فى الوطن العربى سابقا أن ألد أعدائهم هم أخواتهم آل سعود اللى بيخربوها بس للأسف مش حيقعدوا على تلها 

السعوديه هى ختم الشرعيه لما تفعله فرق العوالم بالمنطقه العربيه وهى التى تنفق من أموال السعوديين على تخريب الدول العربيه وتخيل أن كل ماأنفقته السعوديه على حرب أفغانستان والعراق واليمن وسوريا وليبيا ومعاها شوال فلوس كطر لو كل هذه الموال أنفقت على سكان المنطقه كان زمان شوارع الوطن العربى سفلتوها برقائق الذهب لكن للأسف ياساده بلادنا العربيه الغنيه بتصرف وتأكل كل شعوب عوالم العالم من خيرات سكان المنطقه 

صوابعى وقفت وخلاص مش قادر وأعتبر المقال جزء لحد لما نشوف حل لموضوع صوابعى

جنرال بهاء الشامى