جدو سلحدار باشا وتيته جوليفينار هانم

نكتب رغم الجراح والآلام تنفيذا لعهد قطعناه على أنفسنا على كتاب الله لأمى فى فراش الموت وحسب وصيتها بعدم التخلى عن مصر فى وقت حاجاتها لأولادها

كان المرحوم جدك الله يرحمه ويبشبش الطوبه اللى تحت دماغه يأن من ويلات الأستعمار والأستعباد والعبوديه ولم يكن فى طموحاته أن يحلم أن يصبح فى يوم عبداً لله فقط وأن يتخلص من الأقطاع والملكيه ومن قبلهم الأستعمار

قامت ثورة يوليو الأولى عام 1952 م ووقتها كانت مصر دوله زراعيه فقط وبعد جلاء الأنجليز بدأت بلدك فى أكبر نهضه صناعيه وتم بناء معظم المصانع الكبرى وبدأنا ندخل مصاف الدول الصناعيه لكن هذه النهضه كان يلزمها بنيه تحتيه من الكهرباء وبدأنا بناء السد العالى وبدأ الأستعمار يكشر عن أنيابه من وقتها وأممنا قناة السويس ومن هنا تقدر تحدد أن أمكانياتنا كانت أقل من طموحاتنا وبدأنا ندخل فى قائمة الدول المستدينه أو المدانه ثم كانت حرب عام 1956 م وخرجنا من الحرب وحلمنا أستكمال مابدأناه ولظروف معلومه للجميع كانت حرب عام 1967 م وزادات الطينه بله وخرجنا منها مهزومين وكان علينا الأستدانه لأعادة بناء جيشنا لأنه من غير المنطقى كنا نقعد من غير جيش وكثرت ديوننا العسكريه نتيجة التسليح وهو ده اللى عاوزاه الدول الأستعماريه وضعك تحت ضغوط الديون وفوائدها حتى لاتقف على قدميك وتظل تحت رحمتهم فكان ولابد بعد حرب عام 1973 م أن نتخلص من الديون وللتخلص منها كان ولابد من رفع يد الدوله عن الدعم وحاول السادات ألغاء جزء من الدعم لكن كان الرفض الشعبى فى أحداث 18 و 19 يناير ومع ضغوط الدول العربيه وعودة العماله المصريه نتيجة المقاطعه ومع الرفض الشعبى لألغاء جزء من الدعم وكان الأجراء وقتها سهل نوعاً ما فلجأ السادات للأنفتاح الأقتصادى المتهور خصوصا وأنه كان عاوز يعيد بناء البلد ويبص بعين العطف لبنيتها التحتيه التى أهملت بفعل سنوات الحرب وتسخير أقتصاد البلد بالكامل لأعادة بناء الجيش والحرب

حاول مبارك فى الأول وكانت ظروفه أحلى من دلوقتى لكن أيضا قوبلت محاولته بالرفض الشعبى فحاول الألتفاف على الدعم وبدأنا ندخل مرحلة التعينات بالحروف الأبجديه والأبتعاد عن تعيين كل الخريجين وقبلها طبعا كانت الدوله نتيجة قرارات أقتصاديه عاطفيه خاطئه بتعيين أى حد طالما حاصل على شهاده حتى لو كانت محو أميه أبتدائيه ماشى أعداديه ماشى دبلومات ماشى طالما بيعرف يكتب أسمه يبقى الدوله ملزمه تعينه حتى لو مالوش وظيفه المهم الدوله لازم تصرف على الشعب وتأكله ومش مهم فيه عائد أو مافيش وكده أختل توازن الأنفاق مع العائد وأصبحت الدوله تتحمل فوق طاقتها ودى من حسنات مبارك أن خد قرار وقف التعينات وعلشان كان الثعلب أسامه الباز معاه دخل الليله دى حبه حبه لحد ماوقف التعينات نهائيا

كان نظام مبارك يتبع مع الشعب سياسة التهويش والمنع والرفع الواقعى بمعنى تلاقى فجأه أشاعه طلعت وهوبا سلعه رئيسيه تختفى ولا تجدها سوى فى السوق السوداء لحد لما توصل لمرحلة ألاقى السلعه وأدفع فيها أى ثمن فتظهر السلعه بسعر جديد وبعد ماكانت قامت مظاهرات ضد السادات لأرتفاع سعر اللحمه 5 قروش من 95 قرش لجنيه بحاله وأفتكر كان هتافها (( أحيه أحيه كيلو اللحمه بقى بجنيه )) لكن مبارك بالطريقه اللى قلتلك عليها عرف يرفعها من 1 جنيه واحد لـ 60 جنيه وطبعا لما اللحمه بترتفع كل حاجه بترتفع وبعد ماكنا بنشترى علبة السجاير بـ 10 قروش بقينا بنشتريها 650 قرش

حاول مبارك إلغاء الدعم بأكثر من طريقه ونجح مرات وفشل مرات ونجح فى ملفات وفشل فى ملفات ثم وجد ضالته فى حرب أفغانستان وحروب الخليج وكان مؤتمر باريس وأسقطت ديون مصر وكان على مبارك أستكمال مابدأ تحديثه فى البنيه التحتيه لجذب الأستثمارات الفرديه فأستدان مره أخرى علشان يبقى فى كل بيت فى مصر تليفون ويعمل كبارى ويكمل بناء المدن اللى سابها السادات ويعملك مترو الأنفاق

محاولشى مبارك يقرب من الدعم تانى فبدأ فى بيع المصانع اللى أستدانا علشانها أيام عبد الناصر والسادات وبدأ فعلا فى البيع لكن القدر لحقنا وكانت أحداث خيبة 35 ينايم وأستلم الجيش البلد ووجد أقتصادها زى الزفت وبدأت المظاهرات الفئويه وأعيب هنا على طنطاوى الأستجابه لها وأن كان المبرر محاولة تهدئة الشارع فبدأ الجيش يصرف على البلد من ميزانيته على حساب التسليح وكانت دى خطوه فى منتهى الخطوره وتوقف تسليح البلد 4 سنوات كامله ودى فى حد ذاتها مصيبه كبيره

فوت السنه السودا بتاعة الأخوان والسواد اللى حصل فيها وبدأت بعض الملفات التى كانت تمثل لمبارك مشاكل مزمنه مثل الكهرباء تتحول لملفات كارثيه وكان لابد من الجراحه لأن ظروفك خلاص لاتسمح بالأستدانه وتوقف أكثر من 8000 مصنع لعوامل الأمن وتدهور البنيه التحتيه وعوامل أخرى تآمريه

كان على السيسى علشان البلد تقف على رجليها ياخد القرار المؤجل من أيام السادات ومبارك والمجلس العسكرى والأخوان وغصب عنه ومش بمزاجه ومعندوش رفاهية التأجيل أو التفكير أو أختيار وقت يناسب ظروف البلد أو أيجاد ثمن حقنة المسكن علشان متتألمشى من القرارات دى

وعلى مبدأ مجبر أخاك لابطل دخلت مصر مرحلة الجراحه الأقتصاديه وانفتحت بطن المريض لخياطة وريد أستنزاف دخل الدوله وباقى ساعات على أنتهاء الجراحه وخياطة الجرح ثم ندخل مرحلة الأفاقه والشفاء ونبدأ نجنى ثمار أجراء الجراحه وتقريبا حيكون ده فى نهاية 2018 ستشعر وقتها بتحسن فى وضع البلد وأن كنت من وجهة نظرى فيه أجراءات أيضا ناقصه لكن محتاجه حوار مجتمعى

وجعت دماغك وصدعتك فى كلام قلته قبل كده كتير لكن بقوله ليه النهارده علشان لاحظت فى التعليقات ردود بعض الناس زى لحد أمتى وفين العائد ومش حاسين بتحسن وكلام كتير من هذا القبيل

بتتجوز وربنا بيكرمك بطفل جميل مسئول منك وبتبدأ تصرف عليه وتشترى له لبن وتوديه لدكتور وتدخله مدارس ومسألتش نفسك فين العائد وليه بصرف كل ده وأحيانا بستلف وأحيانا بحرم نفسى علشان أوفر له ثمن دروس خصوصيه ومسألتش نفسك فين العائد لأن أبنك مشروع أستثمارى طويل الأجل عائده يأتى بعد سنوات طويله لكن وانت أحيانا على مرحلة اليأس تجد مؤشرات بتقولك متخافشى فلوسك مش بتروح على الأرض إبنك بيكبر ويطول قدامك وأى نعم التشبيه مش دقيق لأن العائد فى أبنك معنوى أكتر منه مادى لكن صدقنى لما أقولك فيه عائد مادى مش فلوس من كل اللى صرفته على أبنك لأن أسرتك بتكبر وبعد ماكنتوا أربعه زوج وزوجه وولدين بقينا 8 ومعانا أحفاد

مشروع السد العالى معظم اللى بنوه ماشفوش وقتها العائد بتاعه لكن الجيل اللى بعدهم شاف وأقر بحتمية كل ماتحملناه علشان خاطر المشروع ده وكان ممكن السيسى حل ملف الكهرباء بأى مسكن ورحل المشكله للى بعده لكنه كان أكثر شجاعه من السادات ومبارك وحل المشكله واللى مايقرش بكده يبقى أعمى القلب والبصيره

الصبر يابلد ودى مش أول مره نشوف العذاب والمرار علشان بلدنا ولو مكناش أستحملنا بعد 1967 مكانتشى سينا رجعت رغم أن العائد مش مادى ولا عائد محسوس ولو مكناش أستحملنا بعد تأميم القناه مكناش حنبنى السد العالى ومكانشى مبارك حيلاقى مصانع يبيعها يأكلنا بتمنها

أقسم برب الكعبه أنا أكثر واحد بيعانى من أرتفاع الأسعار وحكيت ظروفى الخاصه فى بوست على الصفحه الشخصيه أمبارح وحرمت على نفسى اللحمه والفراخ وكل شهرين لما أجيب ربع كيلو هياكل وحرمت على نفسى الفاكهه وركوب التوكتوك وحرمت على نفسى أكل الرنجه الفسيخ وعايش حياه لاتتحملها علشان خاطر ماذلش نفسى لغريب أو قريب وأنت مش قادر تستحمل علشان خاطر بلدك ماتنكسرشى وتبطل تمد أيدها للغريب واللئيم علشان خاطر تملا بطنك أنت إيه ياأخى خدت على الذل والهوان ومش قادر تستحمل علشان ولادك وأحفادك تعيش يوم بكرامه ولا أنت علشان معشتش بكرامه عاوز عيالك وأحفادك يعيشوا مذلولين زيك ... عشت عبد وعاوز ولادك وأحفادك يعيشوا عبيد زيك لبطنهم

أما المتشدقين بأمجاد عصر الملك فاروق فلهم هذه السطور

القبقاب المصرى هو حذاء الطبقه المتوسطه أيام عهد الملكيه البائد الذى يتشدقون بأمجاده جهلاء التاريخ أما الطبقه تحت المتوسطه فكانت بتمشى حافيه والشق فى رجل جدك كان بتعمل فيه الصراصير بريك

جدك الله يرحمه لما كان يمشى من قدام بيت الباشا كان لازم يجرى لأن ممنوع تمشى بالخطوه العاديه من قدام بيت البهوات

جدك الله يرحمه كان بيقضيها بجلابيه واحده طول السنه وممكن تخش على السنه التانيه

جدك الله يرحمه كان بيته متدخلوش الفيران ... حتدخل تعمل إيه وجدك مكانشى حيلته اللاضى ... الفار لو دخل بيت جدك كان بيخرج يسب الدين

جدك الله يرحمه مكانشى بيستحمى بالصابونه غير فى الأعياد

جدك الله يرحمه مكانش بياكل اللحمه غير يوم جوازه

جدك الله يرحمه كان بيحلق بكوز دره أو رغيف عيش شطح

جدك الله يرحمه كان توقيعه بصباعه الكبير

جدك الله يرحمه كانت بطاقته مكتوبه على دراعه بيعملوا وشم على أيده الشمال بأسمه ومحل أقامته وكانت دى بطاقة الرقم القومى بتاعته

جدك الله يرحمه كان مواظب على كل الصلوات فى المسجد عارف ليه ؟؟؟ ..... علشان فرصه يتشطف بالميه فى الجامع

جدك الله يرحمه لما كان يدخل الجيش كان ياعالم يخرج ولا يندفن جواه وأوعى تفتكر أنه كان عسكرى لاسمح الله .... جدك كان كلاف فى جيش الأنجليز

جدتك الله يرحمها كان نص شعرها واقع من شيل زلعة الميه على دماغها وكانت حنفيه واحده فى البلد فى بيت الباشا

جدتك عمرها ماسمعت عن البهارات ولا الفلفل الأسمر ولا الحبهان ولا ورق اللورى وحتسمع عنهم فين وهى كانت كل اللى تعرفه عن اللحمه لونها فقط

جدتك الله يرحمها مكانتشى تسمع عن الميكروييف ولا البلوبيف ولا البوتاجاز ولا حتى بابور الجاز وكانت كل علاقتها بالمطبخ الكنون البلدى .... عارف ليه سموه كانون بلدى علشان أول لما شافوا بابور الجاز قالوا عليه كانون نحاس

جدك وجددتك و جدك وجددتك وجدك وجددتك لما جابو قطران ولادهم عملوا ثوره على الطغيان والذل والمهانه علشان حضرتك تدخل المدرسه وتعرف تقرا وتكتب وتتبدل الأجيال وحفيدهم يكتب بوست على الفيسبوك يطالب بعودة الملكيه علشان يرضى آيات عرابى وتحن وتتكرم عليه بلايك على تعليقه

لسه برضوا عاوز ترجع تعيش زى جدك وجدتك

جنرال بهاء الشامى