الظالم والمظلوم رقم 29

نعود اليوم لنسبح فى بحور التاريخ لنعرف القصه الحقيقيه للملك سعود بعد أن أغلقنا معظم الملفات الشائكه

حضر  الملك سعود وقلتلك فى الحلقه الماضيه أن اللى أستقبله فى المطار سعيد زايد محافظ القاهره وقتها مش سعيد زايد بتاع فريق مصر أم الكون

أستقر الملك سعود وأستقبله عبدالناصر فى قصر الرئاسه ويقول مدير مكتب عبد الناصر أن سعود أتكلم مع ناصر وفاتحه فى مساعدته فى إسترداد عرشه لكن عبد الناصر كان رده بعيدا عن الموضوع وأتكلم فى أهداف ثورة يوليو وكأنه مش عاوز يتكلم بصراحه عن دور السعوديه أيام الوحده مع سوريا ومؤامراتها لأفشال الوحده مع سوريا  (( كل لما تقرأ فى التاريخ تزداد قناعتك أن السعوديه بتحبنا ياأخى موووت )) وأتكلم ناصر أن مساعدة سعود على أسترداد عرشه ستحتاج لخطط وشغل كبير علشان مايحصلشى صراع داخلى فى السعوديه والموضوع ده حياخد وقت

طبعا سعود حاول يأكد على عبد الناصر فقال لناصر طيب حيتم التنسيق أزاى فقال له ناصر التنسيق طبعا حيكون عن طريق مدير المخابرات اللى هو يبقى صلاح نصر

بدأ صلاح نصر والملك سعود يرتبوا مع بعض حيعملوا إيه وخصوصا أن صلاح نصر عقليه مخابراتيه وطبعا حيكون فيه مؤكد دعم لناس فى الداخل السعودى علشان المخابرات المصريه تساعدهم لعمل أنقلاب وطبعا ده حيكون محتاج لفلوس وفعلا الملك سعود كتب شيك بـ 2 مليون دولار لصلاح نصر وخلى بالك من الكلام كويس ولسه الموضوع فى طور الدراسه والتخطيط وقامت حرب عام 1967 وخلصت الحرب وحصلت الدربوكه اللى حصلت وأنتهت القصه

تعالى بقى نشوف الحلمبوحه اللى معموله على موضوع الملك سعود فبعد الحرب كانت طبعا قناة السويس توقفت ومصادر مصر من العمله الأجنبيه توقفت تماما وأرسل عبد الناصر صلاح نصر للملك سعود لأحضار قرض منه وفعلا صلاح نصر حصل على قرض 10 مليون دولار بأسم وزير الأقتصاد حسن عباس وحصل على منحه للمجهود الحربى بقيمة 5 مليون دولار بأسم مدير البنك المركزى

كده سعود تبرع لمصر بـ 10 مليون قرض سيرد و 5 مليون تبرع للمجهود الحربى و 2 مليون لمساعدته فى العوده للحكم

طبعا صلاح نصر فيه شيك بأسمه بـ 2 مليون دولار والمهم سافرت بعثه من مصر لهولندا لأحضار الفلوس وفعلا جابوها وخلى بالك معايا مبلغ الـ 2 مليون اللى بأسم صلاح نصر عمل لهم تظهير على ظهر الشيك بأسم وزير الأقتصاد يعنى كده خلاص الفلوس دخلت وزارة الأقتصاد وبعدت عن المخابرات العامه وصلاح نصر بنفسه بعد ماظهر الشيك أبلغ الملك سعود وخلصت الحدوته على كده ... لكن طبعا البهارات والفلفل فى كتاب إعتماد خورشيد قالت أن عبد الناصر سألها على فلوس سعود فقالت له صلاح نصر مخبيها فى حديقة الفيلا وقال إيه هى اللى شافته وتعرف بعد ماأتسجن وكانت أمينه ومارحتشى حفرت وخدت الفلوس وقال إيه عبدالناصر بنفسه اللى راح فحت وطلع الفلوس وقال لها سايق عليكى النبى ياطاهره ماتقولى لحد على موضوع الفلوس فى أيحاء قذر أن عبد الناصر ضرب الفلوس لنفسه

هى دى قصة فلوس الملك سعود اللى معمول عليها الضجه ومحدش كلف نفسه يبحث عن الحقيقه ولا يفكر لمدة دقيقه ولو صلاح نصر هو اللى ضرب على الفلوس ليه عبد الناصر ماحكموش عليها ... وقبل ماحد يقول أن تبرئة صلاح نصر ستكون على حساب جمال عبد الناصر أحب أقول لهم الكلمه الفصل فى هذه القصه وعلى لسان صلاح نصر نفسه فى أكتر من كتاب فقد قال عرفت عبدالناصر حتى 26 أغسطس 1967 ثم سجننى وأود أن أقول أن عبد الناصر من خير ماأنجبت مصر وقال فى كتاب أخر مع عبد الله الأمام أنه من أعظم ماأنجبت مصر فهل تتخيل أن أنسان بالأخلاق دى وبعد موت عبد الناصر ويقول الكلام ده أذن أحنا أمام شخصيه لاتعرف الغل والحقد أو الكراهيه ويقول عن سجن عبدالناصر له أختلاف رؤى فأى أخلاق هذه ولم يذكر عبد الناصر فى أى مكان أو أى كتاب بالسوء

اللى ناس كتير متعرفهوش أن علشان مخابراتنا تسيطر فى معركتها الأقتصاديه على أفريقيا كان لابد أننا نساعد الدول دى فى مجال المخابرات تحديدا لسبب رئيسى هو أننا نبقى على علم بأى تحرك فى أفريقيا وطبعا ده معجبشى الموساد بعد ماكانت مسيطره على أفريقيا يجى واحد أسمه صلاح نصر يطردها من أفريقيا ويسيطر عليها أقتصاديا وكان لابد طبعا تشن عليه حرب شخصيه ونجحت فعلا فى شن حمله على الجهاز ثم شنت حرب على شخص صلاح نصر ونجحت فعلا بإعتراف أحمد أسماعيل فى عزل المخابرات المصريه عن شعبها لدرجة أن الناس صدقت أحداث فيلم الكرنك ... ممكن تكون حدثت أحداث فرديه من جهاز أمن الدوله لكن المخابرات العامه ملهاش صالح نهائيا بالشأن الداخلى

والآن يسعدنى ويشرفنى أن أقول لحضرتك على الطريقه الأرهابيه التى تنتزع بها مخابراتنا الأعترافات من العملاء المقبوض عليهم

أولا علشان أقبض على عميل لوحده كده أبقى جهاز مخابرات فاشل ولازم أجيب كل أفراد شبكته وعلشان أجيب كل أفراد شبكته يعنى عندى معلومات كامله عن كل أفراد الشبكه داخل وخارج مصر ويوم ماأفكر أقبض على العميل ده وقبل ماأقدم طلب للنيابه العامه بتكون عندى داتا كامله عن نشاط هذا العميل وبعد أستصدار قرار النيابه والقبض عليه بيروح مكاتب المخابرات ومفيش حاجه أسمها جهاز كشف البتاع ولا أى كلام عبيط من اللى بتشوفه فى الأفلام العميل بيقعد وأمامه شاشه بيعرضوا له فيها كل حاجه من طقطق لسلامو عليكم والعميل بنفسه هو اللى بيعترف بعد مايعرف أنه كان متراقب وعندهم معلومات عنه من يوم مولده وهنا بيتأكد أن الأنكار هوعملية أضاعه للوقت فقط وأبسط دليل على كلامى مفيش قضية تخابر تابعه للمخابرات العامه بتطلع براءه نهائياً

من كل ماسبق نكتشف أن إعتماد خورشيد لم تكن زوجه لصلاح نصر كما تدعى وأنها عباره عن عاهره مومساء أستغلها مصطفى أمين لصالحه

مصطفى أمين عميل أمريكى وخان بلده وخان شرفه الصحفى فى أستغلال منصبه وأستغلال منبر صحفى فى تشويه صلاح نصر والمخابرات المصريه

أعداء أى جهاز مخابراتى دائما يكيلون له الأتهامات وأجتمع أعداء صلاح نصر والمخابرات المصريه على مائدة مصطفى آمين وأخدوا قصصه وحواديته وحولوها لروايات وأفلام

حملات الهجوم على جهاز مخابراتنا أعتمدت على حالة الجهل المعلوماتى بطبيعة هذا الجهاز وهنا نطالب وزارة التربيه والتعليم أن تفعل على أغلفة كتب المدارس ماتفعله إدارة المخابرات الحربيه فى المعسكرات من نشر الأرشادات المخابراتيه بالتعاون مع المخابرات العامه حتى لايحدث ماحدث مره أخرى

الحمله على صلاح نصر كان مستهدف منها يشيلوه ليله مش ليلته وكل الحكايه أن صلاح نصر كان صديق حميم لعبدالحكيم عامر ومديرا لمكتبه وزود الطينه بله وروبه عندما قدم أستقالته بعد نكسة عام 1967 مما أعتبره عبد الناصر تضامنا مع عبد الحكيم عامر والسادات حاول تعويض نصر ماحدث له وأفرج عنه وكان يزوره لكنه لم يعطى الحقيقه فرصه للظهور خوفا من هجوم  التيار الناصرى وخصوصا أن أيامها كانت شعبية عبد الناصر أيامها تحرق من يقترب من مجرد ذكر أسم عبد الناصر

إعتماد خورشيد مريضه نفسيا وزوجوها وعندها 14 عام من رجل أكبر من أبوها  أثر على حياتها الجنسيه بشكل مرضى حتى أنها تتوهم أنها شريفه وماعداها عاهرات

صلاح نصر كان رئيس لجهاز دخل فى معارك شرسه مع الموساد الأسرائيلى وفاز فى معارك وأنهزم فى معارك وأحد المعارك التى أنهزم فيها صلاح نصر هى تشويه جهاز المخابرات المصرى

صلاح نصر ظلموه حياً فهل آن الآوان أن يرفع أبناء مصر عنه الظلم ميتاً

شكرا لكم كنا معكم على مدار 29 حلقه كان خوفنا من الله فقط لاغير ونشهد الله أننا بذلنا مجهود مضنى لتحقيق كل معلومه ورد ذكرها وبهذه المناسبه أتقدم بالشكر لكل أعضاء فريق مصر أم الكون لكن هذا لايعنى أننا أنتهينا من هذه الحلقات فهناك حلقات مخصصه للرد على ردك على هذه الحلقات فأنتظرونا متى شاء الله 

جنرال بهاء الشامى

الظالم والمظلوم رقم 28

أجنحة التاريخ تعود لترفرف فوق سماء أم الكون لترفع الغمامه والتزوير عن حقبه تاريخيه هامه فى حياة المحروسه بعناية الله رغم كل المؤامرات والدسائس وكنا معكم على مدار حلقاتنا السابقه وحقبه زمنيه هامه من فترة حكم الزعيم الراحل جمال عبد الناصر وتعالى نقولها بصراحه ماهو الهدف من تشويه هذه الحقبه التاريخيه وتشويه جهاز المخابرات المصرى وتشويه جمال عبد النصر وأظهار عهده بعهد الفساد والمؤامرات والدسائس والظلم والجبروت ولنسأل أنفسنا هل كان فعلا عبد النصر كما يحاولون تصدير فترة حكمه ... فأن كان كما يدعون فلماذا هذا الحب الجارف لهذا الزعيم فى كل البلاد العربيه بلا أستثناء فيما عدا طبعا الفلسطنيين لأن دى عادتهم ودعنا نسأل السؤال المنطقى

هل المخابرات المصريه التى عذبت الشعب المصرى كله عذبت باقى الشعوب العربيه والأفريقيه وبعض دول شرق وجنوب أسيا ولنفترض أن كما يروجون المخابرات المصريه أكرهت وأرغمت الشعب المصرى على تمثيل حب عبد الناصر فكيف فعلت ذلك مع الدول العربيه من الخليج العربى وحتى المحيط الأطلنطى وكيف فعلت ذلك فى الهند وقارة أفريقيا ويوغوسلافيا بل لا أبالغ أن قلت أن عبد الناصر كان محبوبا فى بعض البلدان أكثر من رؤساء البلدان نفسها وأنا وأنت نرى بأعيننا أن السوريين الذين لم يعاصروه يرفعون صوره فى مظاهراتهم والليبين يرفعون صوره فى مظاهراتهم

هنا سؤال آخر لماذا يفعل كل هؤلاء ذلك ؟؟؟ الأجابه المنطقيه التاريخيه أن عبد الناصر وقف نداً للدول الأستعماريه وطردها من الوطن العربى وأفريقيا فهل تلقت هذه الدول وأذرعها فى المنطقه وعملائها المتعايشين وسطنا هذه الصفعات ودخلوا جحورهم وأعترفوا برغبات الشعوب أم حاولوا تشويه تاريخ صلاح نصر وبالتالى تاريخ مخابرات مصر وبالتبعيه الحقبه التاريخيه كلها لعبد الناصر

هنا سؤال منطقى آخر لماذا لم يهاجموا صلاح نصر فى عهد عبدالناصر بعد أن تم سجن صلاح نصر أن كانت مشكلتهم مع صلاح نصر أو مخابرات صلاح نصر ولماذا لم يتقدم سوى 3 فقط بشكاوى للنائب العام ضد صلاح نصر وهو حبيس جدران السجن الحربى والثلاثه أدينوا وسجنوا

هنا سؤال منطقى آخر لو أفترضنا أن مشكلتهم كانت مع صلاح نصر فلماذا إطلاق الشائعات عن تعرض صلاح نصر للتعذيب داخل السجن الحربى هذا التعذيب الى نفاه تماما صلاح نصر ...  ومن هنا تفهم أنهم كانوا يريدون تشويه فترة مابعد الثوره ووصمها بحفلات التعذيب داخل السجون ... لابد أن نعترف أن العدل المطلق لايستطيع رئيس دوله تحقيقه لكن المؤكد أن أعتقال عبد الناصر لهم  أثبتت الأيام أنه كان على حق وليته لفق لهم التهم كما يدعون وأعدمهم وخلصنا من شرورهم ونجاستهم 

فصيل فجر أبراج الضغط العالى وفصيل نشر الرعب فى نفوسنا وملئ مصر كلها بحوادث التفجيرات والقتل والأغتيالات وهم فى الحكم وبعد أقصائهم ... فصيل تواطئ مع الأمريكان ضد بلدهم فهل ظلمهم عبد الناصر ... فصيل يتعمد فى أى مناسبة أهانة جيش البلد الذى يحميهم فهل أخطأ عبد الناصر بإعتقالهم بل جميعنا يسأل لماذا لم يلفق لهم عبدالناصر التهم ليعدمهم ليريحنا منهم وطالما عبد الناصر لم يفعل يبقى لم يظلمهم ولنتخيل أن حضرتك هو حاكم البلاد أيام ناصر فماذا كنت ستفعل مع هؤلاء الخونه الذين يعيشون وسطنا 

هذا الفصيل الخائن الذين أحتفلوا بهزيمه عام 1967 ومصر كلها كانت تنزف الدموع والدماء فهل ظلمهم عبد الناصر 

هذا الفصيل الذى أطلقوا الأشاعات المحبطه على جيشنا بعد عام 1967 وكانوا يتعرضون لجنودنا بالشتائم والأهانات حتى أصدر عبد الناصر قراره بعدم أرتداء الجنود ملابسهم العسكريه فى الأجازات

هذا الفصيل الذى أستهدف جنودنا فى سيناء وحوادث رفح وتعاون مع حماس الأرهابيه فى قتل 277 مصرى فى يوم واحد فى مايطلق عليه أقتحام السجون فهل ظلمهم عبد الناصر لمجرد أعتقالهم فقط  ؟؟؟

نعود لقصة الملك سعود وكنا قلنا أن رشاد الحسينى طلب من صلاح نصر يكلم عبد الناصر فى أستضافة الملك سعود فى مصر وقلتلك أن العلاقه بين مصر والسعوديه كانت زى الزفت وكان رشاد الحسينى لمح لصلاح نصر أن العراق تريد أن تستضيف الملك سعود لكنه يفضل الأقامه فى مصر وأن سعود يريد أن يبدأ صفحه جديده مع مصر ويؤيد تحركات مصر فى حركات التحرر ضد الأستعمار والملكيه (( هى النقطه دى سبب المشاكل كلها الملكيه تحديدا )) وأن سعود سيؤيد مصر فى موقفها من تحرير اليمن

فعلا صلاح نصر فاتح عبدالناصر فى الموضوع وعرض على عبد الناصر ماقاله رشاد الحسينى فوافق عبد الناصر بشرط أن يتقدم الملك بطلب رسمى لمصر ويكتب فيه أنه بيفضل الأقامه فى مصر لأنها مركز أشعاع أسلامى (( خلى بالك السعوديين كانوا مطلعين أشاعات على عبد الناصر أنه شيوعى والشيوعيه ملهاش دين وأن عبد الناصر بيحارب الأسلام نفس الأسطوانات اللى قالوها على السيسى والهبل بتصدق وكأن روسيا مش دوله مسيحيه والأسلام فيها الديانه رقم 2 بدون أى تغيير فى الأشاعات أو أى أفكار جديده  )) وأتفقوا على هذا الخطاب ضرورى

كان فى الوقت ده الملك سعود مقيم فى اليونان وأولاده وأسرته بدأوا يتسرسبوا لمصر وسافر السيد كمال لطفى نائب مدير المخابرات المصريه لليونان وأبلغ الملك سعود بموافقة عبد الناصر وطلبات مصر وفعلا وافق الملك سعود

طبعا الملك مالوش صفه رسميه علشان حد يستقبله بصفه رسميه وطلب صلاح نصر أن يستقبله أحد نواب رئيس الجمهوريه لكن عبد الناصر أرسل لأستقباله سعيد زايد محافظ القاهره وقتها مش سعيد زايد بتاع فريق بهاء الشامى

لازال أمامنا فى هذا الملف الشائك الكثير لكنى أستسمحكم لألام أصابعى أن يكون لنا لقاء آخر متى شاء الله

جنرال بهاء الشامى  

الظالم والمظلوم رقم 27

وصلاً بما سبق نحن معاً فى رحله فى أعماق التاريخ لكى نستكشف الحقيقه ونستخلصها من بين براثن الأكاذيب والأشاعات لكن هذه المره ليست كباقى المرات التى تصدينا فيها لتصحيح تاريخ ينفقون المليارات لتزويره هذه المره تخص الجهاز الذى حقق عليهم الأنتصارات وهو لازال وليد وأستطاع أن يبادلهم اللكمات فى وقت المفروض أنه لسه بيكون نفسه أو بيبنى أركانه

لازم تبقى عارف أننا بنحارب عدو تقليدى ثابت ولن يتغير عن مبادئه من يوم ماعرفناه ... إحنا بنحارب عدو زهقوا نبيهم موسى وحاولوا قتل عيسى وحاولوا قتل محمدا عليهم جميعا الصلاة والسلام

نحن نحارب عدو لايتورع فى تنفيذ أى شئ حتى مع الدول التى وقفت بجواره وساندته بوعد بلفور المشئوم وكنت كلمتك عن حادثة الكاكاو فى المقال رقم 1 من سلسلة اللامعقول فى عالم العقول

http://genralbahaaelshamy.blogspot.com.eg/2017/05/blog-post.html

طبعا كلنا عارفين أن أمريكا واليهود المفروض حبايب وسمن على عسل ومحدش حامى اليهود من قرارات مجلس الأمن سوى أمريكا ومحدش بيناصر اليهود زى أمريكا يعنى المفروض يكون عند اليهود حصوة ملح فى تعاملهم المخابراتى مع أمريكا لكن كانت حادثة الهيبز خير شاهد هلى خسة وندالة اليهود وتعالى نشوف إيه قصة الهيبز دول

فجأه فى آواخر الستينات ظهرت جماعات موسيقيه بعادات غريبه على المجتمع الأمريكى ورقصات غريبه وموسيقى غريبه وأنتشرت الظاهره بسرعة الصاروخ بين الشباب الأمريكى اللى ميول الأنحراف عنده متوفره وكانت حركة الهيبز فى أولها عباره عن حفلات موسيقى فيها كل ممنوعات الجنس المحرم والشاذ والمخدرات وهوبا بدأت الجماعات دى تعلن عن مناهضتها للرأسماليه وتدعو للأشتراكيه

جماعه أول لما ظهرت كانت الموسيقى الشاذه وحفلات الجنس والمخدرات هى أهدافها وبعد أنتشارها فجأه فى عقر دار الفكر الرأسمالى يقولك أشتراكيه وطبعا بدأت الدنيا تتحرك وأى عاقل أول تفكيره حيروح أن الجماعات دى بدعم وتمويل الأتحاد السوفيتى صاحب نظريات الأشتراكيه وبدأت أجهزة المخابرات تتحرى عن كل حاجه فى العيال دى وخصوصا أن الظاهره بدأت تخرج من أمريكا وتنتشر فى كل دول العالم إلا وتكتشف السى أى إيه أن جماعات الهيبز تقف خلفها الموساد لكن بطريقه صايعه وخبيثه

لوحظ فى حفلاتهم تعاطى نوع معين من المخدرات وطبعا تم تحليل هذا النوع فوجدوا فيه عقار هلوسه مخلق ولسه جديد ومحدش يعرف عنه حاجه والعقار يقوم على عملية غسيل مخ المتعاطين وعن طريق جلسات خاصه يتم زرع كراهية المجتمع وبث مبادئ الجريمه والأنحلال وطبعا كان المقصود من جماعات الهيبز هو تحطيم الثروه الشبابيه ركيزة أى مجتمع  فى أمريكا زى مابيعملوا عندنا دلوقتى وبيطلعوا لنا أنواع جديده من المخدرات علشان يخلصوا على عقول شبابنا ويخلوه فى الضياع وأصبح شبابنا مابين المخدرات ومواقع أفلام السكس يصارع الشيطان ومنهم من وقع ومنهم من أكرمه وحفظه الله ولا أوعى تكون عبيط وفاهم أن أفلام السكس اللى بيتصرف عليها مليارات متلقحه على الأنترنت ببلاش ليه ولا تكون فاهم أنها علشان خاطر سواد عيونك لا ياعسل الأفلام دى معموله علشانك لعدة أهداف

أولا اللى بتشوفه فى الأفلام دى من ممارسات جنسيه فى الشرج والفم وأعضاء جنسيه غريبه مش ممكن يحصل فى الحياه الطبيعيه علشان اللى بيقولوا أحنا بنتفرج علشان نسخن بدل حباية الفياجرا ... لالالالا هو قاصد فى الأفلام دى يظهرك بالضعف ويحلى الممارسات الشاذه فى عنيك ويظهر لك أن الممارسين مستمتعين بالقرف اللى بتشوفه لغرض واحد وهو نشر هذه الممارسات فى مجتمعنا وأفشال حياتنا الأسريه ومش حنضحك على بعض معظم الزيجات اللى بتفشل بيكون الصبيان والبنات من مشاهدى أفلام السكس

لما تكون قدام جهاز بيحاربك بالمخدرات والسكس فى أعز ماتملك وهو الثروه الشبابيه وبيحارب أصدقائه قبل أعدائه فكيف تتعامل مع هذا الجهاز ؟؟؟

طبعا هناك حرب شرسه بين المخابرات المصريه والموساد وكما قلنا أن الشعب هو الظهير الشعبى للمخابرات وهو اللى يقدر يساعد المخابرات أما بالأبلاغ أو بالتعاون أو التصدى ومن هنا تبذل الموساد قصارى جهدها للإيقاع بين المخابرات وشعبها زى ماحصل فى فترة الستينات ونجحت الموساد فعلا عن طريق الشائعات حول جهاز مخابراتكم

لازم تبقى عارف أن الحرب لازالت وستزال دائره وخصوصا بعد حالة الحب والعشق التى ظهرت من المصريين لجهاز مخابراتهم بعد عام 2011 وهذا مايضج مضاجع رجال الموساد لذلك هناك حرب غير خفيه على مواقع التواصل الأجتماعى بفبركة قصص مخابراتيه وحشر المخابرات العامه فى كل بوست ووصل الأمر أن هذه الأكونتات بقصد أو بدون قصد تروج لبطولات وهميه لجهاز مخابراتنا والزج بالمخابرات العامه فى الشئون العسكريه وأعتقد أنى وضحت النقطه دى كويس وقلنا أن المخابرات العامه ملهاش صالح بالعمليات العسكريه وياريت نبطل بقى ياجماعه البوستات العبيطه بتاعة الصقور لاتنام والعلبه لمن يملك الزتونه وغفير الأهرامات لأن البوستات دى تضر أكتر ماتنفع ولازم نعرف أن شغل مخابراتنا حتى ولو صحيح لايجوز نشره على صفحات الفيسبوك أمام أعين كلاب السكك وياريت نبطل جهل وعبط ونعرف مصلحة بلدنا فين

وعلى فكره أحنا ممكن نساعد مخابراتنا عمليا بالأبتعاد عن هذه الأكونتات وألغاء متابعتها وعدم التعليق على بوستات  البطولات الوهميه التى لاعلم لأحد بها ويجب أن تعلم أن صفوة عقول وأذكياء علماء البلد هم أفراد هذه الأجهزه فأن لم تكن وسطهم فيمكنك أن تكون واحد منهم بأن تكون ظهير شعبى واعى وفاهم ويكفى أن تعرف أن المشير أحمد أسماعيل بكى مره وقال هل يعقل أن يهاجم شعب أجهزة مخابراته التى تحميه بالغالى والنفيس وكيف نجحت الموساد  فى تشويه أجهزتنا لن يغفر التاريخ هذا الخطأ وعدم علاجه لصلاح نصر فأنا أعتبره هُزم فى هذه المعركه

يأتى دورنا الآن وقصة حرب اليمن فلا نجد سوى كلمات جمال عبد الناصر شخصيا لولا المخابرات لما أستطعنا أن نحارب فى مجاهل اليمن وجبالها وصحاريها

يتبقى لنا من القصص المتبقيه قصة الملك سعود اللى حواليها جدل رهيب ومادور المخابرات العامه فيها ؟؟؟

فى منتصف عام 1966 رشاد الحسينى كلم صلاح نصر وقاله الملك سعود عاوز يجى يقعد فى مصر وأن سعود أختار صلاح نصر لكى يقنع عبد الناصر بالموافقه على أقامة سعود فى مصر لأنكم زى ماحضراتكم عارفين كانت العلاقات بين عبد الناصر وفيصل زى الزفت ولما عبد الناصر يوافق لسعود على الأقامه فى مصر يبقى بيزود الفجوه بينه وبين فيصل

إيه اللى حصل بين رشاد الحسينى وصلاح نصر وإيه حكاية الملك سعود أصابعى بدأ تؤلمنى لذا أستسمحكم فى التوقف مؤقتا على وعد بلقاء متى شاء الله

جنرال بهاء الشامى

الظالم والمظلوم رقم 26

نعود لأستكمال ماتوقفنا عنده لنبحث سويا فى الأتهامات الموجهه لجهاز المخابرات العامه المصريه فى عهد صلاح نصر

بعد القبض على صلاح نصر قلتلك أن النائب العام طلب من الشعب كل من لديه شكوى تعذيب يتقدم بها للنيابه العامه للتحقيق فيها وبحثها وفعلا  قدمت وقتها 240 بلاغ للنائب العام وكانت تشتمل على جرائم قتل وتعذيب من الدرجه الأولى والمدهش يامؤمن ياموحد بالله أن 3 بلاغات فقط وجهت للمخابرات العامه حنفندها مع بعض

البلاغ الأول مقدم من مصطفى أمين الصحفى المعروف بتاعنا وتمت إدانة مصطفى  أمين وحكم عليه السجن لكن هذه القضيه هى التى شغلت الرأى العام وأثير حولها جدلاً واسعاً وكان مصطفى أمين تقدم ببلاغ عام 1968 ضد المخابرات العامه وصلاح نصر للنائب العام محمد عبد السلام رئيس مكتب الأدعاء والتحقيق بمحكمة الثوره وبعد الأنتهاء من التحقيق مع المشكو فى حقهم صلاح نصر وآخرون أرسل خطاباً للنائب العام رقم 159 / 1968 قال فيه بعد الأطلاع على البلاغات والتحقيقات وبناءاً على خطابكم السرى رقم 157 / 1968 فى أبريل من نفس العام وبعد مناظرة الحكم الصادر فى حق المتهم مصطفى أمين نرى أنه لاوجه لإعادة النظر فى الحكم الصادر ضد المتهم المسجون مصطفى أمين 

البلاغ الثانى مقدم من مصطفى  أغا صاحب المؤامره التى  ذكرناها بالتفصيل فى حلقه سابقه

البلاغ الثالث المقدم من المتهم بقتل الوزير السورى طعمه العوده وأدين وحكم عليه بالأشغال الشاقه المؤبده

من ضمن 240 بلاغ 3 فقط يخصوا المخابرات العامه والثلاث بلاغات لمتهمين أدانتهم المحاكم ورفضت البلاغات المقدمه منهم بإدعاء التعذيب وخلى بالك يامؤمن بنقول 3 بلاغات من 240 بلاغ يعنى فيه 237 بلاغ يخصوا جهات أمنيه أخرى ليست منهم المخابرات العامه ومش عاوزين نفتح فى الملف ده ولا عاوزين نفتح فى ملفات شمس بدران رغم أن صلاح نصر بنفسه فى التحقيقات وفى كتابه قال أنه لم يتعرض لأى نوع من أنواع التعذيب فى السجن الحربى الخاضع لوزارة الحربيه ولشمس بدران فى فترة سجنه وكل اللى قاله صلاح نصر أنه تعرض لمضايقات قدر يتغلب عليها

من كل ماسبق وفى هذه الجزئيه الخاصه بممارسة جهاز المخابرات العامه التعذيب نجد أن كل ماحدث هو حمله مسعوره من جهات معينه أرادت النيل من جهاز المخابرات المصريه وشخص صلاح نصر وأتمنى أكون قدرت أرد عليها

يتبقى عندنا جزئية أستيراد أدوات تعذيب فهل ممكن بالله عليك جهاز المخابرات يستورد أجهزة تعذيب من الخارج ليسهل تتبع مصادر إستيرادها وكيف دخلت مصر لتثبت الجريمه على المخابرات وأن كان قد حدث فأين هى التحقيقات التى تثبت ذلك وأين الأدله لكنه الكلام المرسل السهل وللأسف وللأسباب التى ذكرتها فى أول السلسله ناس صدقت هذه الخزعبلات نتيجة عدم الوعى ونتيجة نجاح الموساد فى فصل المخابرات العامه عن ظهيرها الشعبى وهم المصريين

الجزئيه الخاصه بوجود قسم للسموم بالمخابرات العامه فأنا فى المقال رقم 1 من سلسلة اللامعقول فى عالم العقول كنت قلتك أن جميع أجهزة المخابرات بالعالم بها أقسام للسموم وقلتلك أن من مهمة أقسام السموم هى أكتشاف السموم الجديده التى يخلقها العدو لحماية الشخصيات العامه ومش معقول ولا منطقى أكون بتعامل مع جهاز الموساد الأول فى العالم فى تنفيذ الأغتيالات بالسموم ومايكونشى عندى قسم للتصدى لما يفعله العدو معانا وإلا نبقى عبط وهبل خالص وخصوصا أن الموساد له أساطير وسوابق فى تنفيذ الأغتيالات بالسموم وحكيتلك عن أكتر من واقعه منهم واقعة صلاح مصطفى ومصطفى حافظ وأشهر الحوادث أغتيال ياسر عرفات وغيرها الكثير وأيضا يختص قسم السموم بالأحبار السريه وقتها وكشفها وأختلاق أحبار لعملاء مصر فى أسرائيل والمدهش أن وزير الصحه الدكتور النبوى المهندس كان يشرف على قسم السموم فى فتره من الفترات وخصوصا بعد واقعة عامل جروبى اللى كان حاول يغتال جمال عبد الناصر نفسه وكانت الموساد اللى جندته

كنت قلتلك فى مقال اللامعقول فى عالم العقول رقم 1 عن أسرار كثيره فى عالم أجهزة المخابرات والآن حان الوقت لنكشف النقاب عن مفاجآت هذه الأجهزه

غالباً مايتولى رئاسة جهاز المخابرات العامه قيادات من ذوى الخلفيه العسكريه كان أبرزهم صلاح نصر وعمر سليمان لذلك الكثير من الناس يفهمون ضمنيا أن جهاز المخابرات عباره عن بعض الظباط يرتدون ملابس مدنيه لكن هذا منافى للحقيقه تماماً فمثلا قسم السموم والأحبار عباره عن مجموعه من أبرز علماء الكيمياء العضويه تحديداً وقسم الأشاره والشفرات عباره عن مجموعه من مهندسى وكبار رجال اللاسلكى وفك الشفرات وقسم التدريب والتجنيد عباره عن مجموعه من متخصصى علم النفس ولغة الجسد والمحللين السياسيين أما قسم التحليل المعلوماتى فهم عباره عن أبرع من يعملون فى مجال علوم التحليل المعلوماتى وهكذا دواليك باقى أقسام أى جهاز مخابرات فى العالم

أذن جهاز المخابرات هو عباره عن مجموعه من العلماء والأطباء والمهندسين والمحللين والمبرمجين وعلوم الكمبيوتر وأكفاء الأداريين وكاتبى التقارير ورابطى الأحداث وتحليل الواقع ولغة الجسد وأفضل أذكياء العالم كلُِ فى مجاله وناس متنقيه على الفرازه وصدقنى لو قلتلك أن حتى السعاه فى المكاتب مدربين على أعلى مستوى ومش زى السعاه العاديين بل بيخضعوا لتدريبات قاسيه ومراقبه صارمه لأن بحكم طبيعة عملهم بيطلعوا عما يدور داخل المكاتب

من كل ماسبق مايثار عن وجود ظباط بجهاز المخابرات العامه نوع من الهبل والعبط لكن تعال نشوف الناس دى بيتم أختيارهم أزاى

طبقا لقاعدة بيانات المواطنين بعد أنتهاء الدكتور والمهندس وكل فى مجاله من فترة تجنيده وبناءاً على تفوقه فى مجاله وسيرته الذاتيه وتحريات ملفه الأمنى وأنتمائه الوطنى بيتم أستدعائه بخطاب من المخابرات العامه ويخضع لعدة أختبارات قاسيه علميه ونفسيه ولو نجح ووقع عليه الأختيار بيتم تدريبه وأعطائه الدورات اللازمه حسب مجال تخصصه ثم يخضع لأختبارات لما تم تدريبه عليه ولو نجح يتم تعينه وممكن فى الحاله دى يقع أختيارى على ظابط مهندس فى تخصص معين أو ظابط دكتور فى تخصص معين لكن هؤلاء بيكونوا حالات نادره لأن غالبا الجيش بيكون أستولى عليهم أما داخل أسلحته أو داخل المخابرات الحربيه والمفاجأه اللى حضرتك لازم تعرفها أن حتى المخابرات الحربيه أغلبهم مدنيين أو ظابط دكتور أو مهندس دكتور

بدأت أصابعى تؤلمنى لذا أستسمحكم وقف الأسترسال على وعد بلقاء متى شاء الله

جنرال بهاء الشامى     

الظالم والمظلوم رقم 25

كنا توقفنا الحلقه الماضيه على قصص مكتب المشير عبدالحكيم عامر و (( ع . ش )) والمطربه (( م . ص )) وأتمنى من أى معارض للسلسله  يتمتع بذرة عقل قبل أن ينخرط فى معارضته يقرأ سطور السلسله أحسن بصراحه الدكتوره الجاهله كان شكلها وحش جدا قدام الناس والمفروض يادك توره قبل مابتكتبى علاج لمريض بتكشفى عليه ولا أنت بتكتبى أمراض الكبد لمرضى اللوز ولا إيه حكايتك أنتى وخريجى الطب فى عصر سيدكم بتاع الضربه الجويه بتاع تطوير منظومة الرادارات ومش حقولك غير داهيه تفضحك أنتى واللى نجحك فى الأبتدائيه بالغش  

النهارده موعدنا مع موضوع تعذيب الأخوان فى المخابرات العامه ولابد  لنا أن نستحضر ماسبق تناوله وكنا أتكلمنا عن الفصل بين الأجهزه الأمنيه وقلنا المخابرات العامه لها إختصاصات تختلف عن تخصصات المخابرات العسكريه عن تخصصات  الأمن الوطنى أو مباحث أمن الدوله وحددنا المخابرات العامه طبقا للقانون معنيه بما يختص بالشأن الخارجى ومكافحة شبكات التجسس ورغم أن المخابرات ملهاش صالح بنشاط الأخوان إلا إذا أمتد للتعاون مع جهات أجنبيه وده بيتم بالتنسيق مع جهاز مباحث أمن الدوله وكان الأخوان لهم قضيتين شهيرتين الأولى كانت عام 1954 وكده مكانشى صلاح نصر لسه قفش فى منصب مدير المخابرات العامه أو منصب نائب مدير الجهاز وكان وقتها اللى ماسك هو زكريا محيى الدين واللى حقق كمان فى القضيه دى كان بعض الظباط الأحرار وعبد الناصر شكل لهم دوائر لمحاكمتهم يعنى المخابرات العامه ملهاش صالح بالليله دى ولا صلاح نصر اللى مكانشى لسه أتعين فى المخابرات له صالح بالمخابرات العامه لكن هما أتعودوا على الكدب والمصيبه أنهم صدقوا كدبتهم أن المخابرات العامه عذبتهم فى قضية عام 1954

نيجى لقضية عام 1965 ودى اللى أكتشفتها المخابرات العسكريه زى ماقلت لك من حلقتين والى حققت فيها المخابرات العسكريه بالتعاون مع المباحث العامه يبقى جه منين الأفترا بتاع الأخوان أنهم أتعرضوا للتعذيب وأحواض الأذابه وحمامات التعذيب

طيب إيه رأيك أن عبد الناصر أتصل على صلاح نصر وطلب منه أن المخابرات العامه تتولى التحقيق فى الموضوع ده لكن صلاح نصر رفض أن كلب من الكلاب دى يدخل مبنى المخابرات وقال لعبد الناصر الموضوع من أوله لأخره خاص بالمخابرات العسكريه وزعل عبد الناصر وقال لصلاح نصر هو أحنا كل لما نقولك حاجه تقول لأ وهنا قرر صلاح نصر التقدم بإستقالته لرفع الحرج عن عبد الناصر لكن ناصر رفض الأستقاله ودى تانى مره يقدم فيها صلاح نصر إستقالته

فاضل قضيتين صغيرتين وهى قضية كمشيش وقضية كرداسه وأعتقد الكره الأرضيه كلها عارفه أن الى حقق فى القضيتين هم المخابرات العسكريه والمباحث العسكريه لكن لو سألت أى أخوانجى أنت أتعذبت فين بدون تفكير وبدون تردد يقولك فى المخابرات العامه وعلى أيد صلاح نصر وكأن صلاح نصر سمكرى بوابير وقاعد صايع ومش وراه  حاجه غير  حفلات التعذيب بتاعة الأخوان

طيب إيه رأيك أن بعد القبض على صلاح نصر طلب النائب العام أى حد عنده مظلوميه ضد صلاح نصر وهو فى السجن يتقدم ببلاغ ضده  فلم يتقدم  سوى أثنان فقط وحقق فيها رئيس نيابة حلوان وحفظت لعدم الجديه وعدم وجود أدله

موضوع لجنة تصفية الأقطاع فقد كان صلاح نصر فرد فى لجنه برئاسة المشير عبدالحكيم عامر والكلام ده برضوا قبل مايتعين فى المخابرات وبعد ماساب الحربيه وراح المخابرات العامه أتوماتيكيا فقد عضويته فى لجنة تصفية الأقطاع وأعتقد الدكتوره ميرفت التلاوى خير من يشهد على برائة صلاح نصر فى هذه القصه لكن حابب أوضح نقطه مهمه وهى أن كان فيه نوعين من الأقطاع النوع الأول الأقطاع العادى والتانى الأقطاع الأجرامى اللى كانوا بيهربوا المجوهرات والفلوس بره البلد علشان يوقعوا أقتصاد البلد ودى اللجنه اللى كان مختص بيها صلاح نصر ومن هنا تفهم عملية هجوم الأقطاعيين على صلاح نصر والى محدش يعرفه أن صلاح نصر صاحب مبدأ الأقطاعى اللى كان له مواقف مشرفه المفروض تكون له معامله خاصه وعلشان كده طلبت أن الدكتوره ميرفت التلاوى تشهد على الواقعه دى

نيجى لنقطة مسئولية المخابرات العامه المصريه عن هزيمة ونكسة حرب عام 1967علشان دى البونبنايه اللى ماسكين فيها وطبعا كنت وضحت لحضراتكم مسئولية كل جهاز معلوماتى عن موضوع الحرب أو الشئون العسكريه وأعلم أننى أفتح جرح قديم لكن لابد لنا من المكاشفه وأكيد فيه مخطأ لكن عندما نعاقب تاريخياً فيجب أن نكون حياديين وخصوصا أن كل أطراف المشكله فى ذمة الله ومن هنا يتضح أنه ليس لى ولك صالح فى إدانة هذا أو تبرأة ذلك (( يرجى الرجوع لحلقات مهندس أكتوبر لتحديد مسئولية هزيمة يونيه عام 1967 )) 

أتفقنا فى المقالات السابقه أن المخابرات العامه مهمتها أو أسس عملها قائم على تحليل المعلومات أما المخابرات العسكريه فقائمه على تحليل الأرقام وقلت لحضرتك رغم أن الجهازان منفصلان عن بعضهما لكن فيما يخص الأمن العام للوطن فهناك نوع من التنسيق وممكن المخابرات العامه تتوصل لمعلومات عن تحركات معينه من شأنها أن توحى بإحتمال قيام حرب أو عمل عسكرى مضاد

طيب ماتيجى نتعرف على بعض شهادات من عاصروا الأحداث من مذكراتهم

محمود رياض وزير الخارجية المصرى فى وقت النكسه فى كتابه (( البحث عن السلام والصراع فى الشرق الأوسط)) قال :

إن هجوم إسرائيل لم يكن مفاجأه للقياده العسكريه  فقد ذكر لهم رئيس الجمهوريه بإحتمالية قيام إسرائيل بالهجوم يوم 5 يونيو بناءا على معلومات المخابرات العامه

قال السادات فى كتابه (( البحث عن الذات ))  بأن عبدالناصر صدق على خطة المواجهه وقال لقائد الطيران حينها صدقى محمود إن أول ضربه ستقع على الطيران  فا ألتفت هذا إليه وقال فى عصبيه واضحه  يا فندم إحنا عاملين حسابنا ولن تزيد الخسارة على 10 %

  يؤكد أحد المؤرخين الإسرائيلين  أن الضابط المناوب أرسل إشاره لاسلكيه  برمز "عنب" وهى كلمه تعنى الحرب بالشفره المتفق عليها إلى اللواء عبدالمنعم رياض فى عمان الذى حولها بدوره إلى مدير مكتب  وزير الحربيه شمس بدران فى القاهره  وبقيت هناك دون فك شفرتها  إذ كان المصريون قد غيروا ترددات شفرتهم  فى اليوم السابق ولكن دون أن يعلموا الأردنيين

نرجع تانى لمحمود رياض فقال  (( أسوأ ما فى هذا اليوم أن المشير عامر بدلا من أن يظل فى مركز قيادته فى ذلك اليوم توجه إلى إحدى القواعد فى سيناء مصطحبا معه فى الطائره  عددا كبيرا من القاده  العسكريين  كما كانت القيادات فى الجبهه مجتمعه فى المطار بسيناء إنتظارا لوصوله ))   ويؤكد رياض ولضمان سلامة طائرة المشير صدرت التعليمات بعدم إشتباك أجهزة الدفاع الجوى مما أدى إلى الإغلاق الكامل للدفاع الجوى

 بحسب تعبير السادات فى كتابه أن (( الحرب بدأت وأنتهت وعامر فى الجو ))

 

يقول المؤرخ جمال حماد فى كتابه (( من سيناء إلى الجولان))  أصدر المشير عامر أمر الانسحاب من سيناء لقوات الجيش فى مساء يوم 6 يونيو 1967 وكان الأمر العجيب ينص على إنسحاب هذه الحشود الضخمه من القوات المصريه فى سيناء إلى غرب القناه فى ليله واحده  وأن تكون عودة الجنود بأسلحتهم الشخصيه فقط  تاركين أسلحتهم الثقيله  لقمه  سائغه للأعداء

 كان هذا خلافاً لما أمر به عبدالناصر الذى تفاجأ بأوامر الأنسحاب الصادره من وزير الدفاع للقوات فى سيناء  وكان خط المضايق  يعتبر أخر أمل للمصريين فى إيقاف التقدم الإسرائيلى  وهو ما أكده رياض بأنه كان بإمكان عدد محدود من القوات المصريه  إنشاء خط دفاعى فى المضايق  شرق القناه وهو خط دفاعى طبيعى  جرت دراسته منذ عام 1949 وقد ساهم فى هذه الدراسه عدد من الخبراء العسكريين الألمان وأجمعت الدراسات منذ عام 1950 على أن خط المضايق هو أنسب خط للدفاع عن شرق القناه  وقد أتصل السادات بعبدالناصر فى 7 يونيو حسبما ذكر فى مذكراته (( ياجمال ماتحاول تنقذ ما يمكن إنقاذه)) المسأله  فى وشك على أى حال فلماذا لا تطلب من عامر أن يبقى فى بيته وتقعد أنت فى القياده وتشتغل ورد عليه عبد الناصر والله يا أنور أنا عرفت أنه أعطى أمر بالأنسحاب وقلت له إزاى تعمل كده ياعبدالحكيم  ليه متقفش فى خط المضايق قالى الخط مش جاهز

أصابعى تؤلمنى بشده فأستأذنكم توقف اللقاء على وعد بالأستكمال متى شاء الله

جنرال بهاء الشامى

الظالم والمظلوم رقم 24

 
وصلت لمكتب المشير معلومات من (( ع . ش ))  تفيد بوجود محاولة إغتيال لرئيس الجمهوريه من تنظيم داخل القوات المسلحه فقد كان قد حدث خلافا بين شمس بدران و (( ع . ش )) على تولى رئاسة مكتب عبد الحكيم عامر فقد كان (( ع . ش )) أقدم فى الرتبه من شمس بدران وكلاهما من الضباط الأحرار لكن (( ع . ش )) كان فيه تلثين كلام عن علاقته بفنانه ومطربه مصريه صاحبة أغنيه شهيره جدا لكن عبد الحكيم عامر حسم هذا الصراع لصالح شمس بدران

كان (( ع . ش )) فى عام 1956 ضمن تنظيم مناهض للثوره وكان معاه على فهمى وعبدالستار شحاته و عبد الرحيم حجاج وزياد على وتم أكتشاف التنظيم وكان لسه فى بدايته وعامر أكتفى بفركشة أعضاء التنظيم وتوزيعهم على الوحدات وتم نقل (( ع . ش )) إلى منطقة شرم الشيخ وبعد حرب بور سعيد عام 1956 وما حدث بها حاول (( ع . ش )) التقرب من المشير عبد الحكيم عامر والكلام ده كان من ورا اللواء رؤوف ذكى والعقيد حنا رزق الله رؤسائه المباشرين بعدها أحيل العقيد للمعاش وبقى الأول لقربه من عامر

فضل (( ع . ش )) يتنطط فى الرتب ووصل بسرعه وأستطاع أن يشغل مناصب قياديه بالجيش أو بتعبير أدق فى القياده العامه للجيش وكان شمس بدران أحدث منه فى الأقدميه وحاول ياخد مكان شمس بدران لكنه فشل لأن منصب مدير مكتب وزير الحربيه كان لابد يوافق عليه عبد الناصر ولازال هذا العرف معمول به لأن هذا المنصب يعتبر منصب سياسى قبل منه مدير لمكتب قائد الجيش لكن عبد الناصر رفضه لأنه مكانشى من الظباط الأحرار ومكانشى موضع ثقة عبد الناصر وكان عبد الناصر عينه عليه بعد طراطيش كلام عن علاقته بمطربه مصريه بتغنى أغنيه شهيره جدا ووصلت هى كمان بسرعه وعبد الناصر أوقف أذاعة أغانيها وهى بنفسها أعترفت بعد كده وقالت الأغانى  بتاعتى أتمنعت بقرار سيادى

فى يوم أتصل عبد الناصر بصلاح نصر وأبلغه أن عامر أبلغه أن فيه تنظيم فى الجيش بقيادة نائب مدير مكتب وزير الحربيه اللى هو (( ع . ش )) لأغتيال عبد الناصر وقلب نظام الحكم وأن اللى حيقوم بالتحقيق هو شمس بدران وقاله ياريت توفر مكان للتحقيقات عندك فى المخابرات العامه علشان مش عاوز حد ياخد خبر بالموضوع ده ويقولوا الجيش فيه مؤامرات وأنشقاقات ولم يحضر أى فرد من المخابرات العامه التحقيقات مع شمس بدران وكل اللى فهموه للناس أنها أجتماعات سريه للجيش بعيدا عن أعين الصحافه

القصه دى طبعا أتقال فيها قصايد هجوم على مخابراتنا العامه لمجرد أجراء التحقيقات فقط فى  أحدى مكاتب المخابرات وأتقال بقى أحواض الأحماض وأحواض الأذابه والأختفاء والقصص اللى حضرتك قرأتها فى كتب العاهره إعتدال خورشيد والخائن الجاسوس مصطفى أمين

برضوا حناخد قصه تانيه من اللى كان بيحصل فى مكتب وزير الحربيه ومش عاوز أسميها مهازل لكن لما ننتهى من السلسله حتعرف حضرتك كل حاجه وتعرف أسباب هزيمة 1967 وتعرف ليه قدموا صلاح نصر كبش فداء وليه شوهوا جهاز المخابرات المصريه بس أستهدى عليا وتأكد أنى مش حسيب حاجه لأنى بحترم عقلية المتابعين ولا أحترم بتوع السطرين والصوره

بعد فض الوحده بين مصر وسوريا أنتشر منشور ووصل لكل قيادات البلد الكبيره وهم عبد الناصر شخصيا وعامر وصلاح نصر وعباس رضوان وزكريا محيى الدين وكان المنشور ده بيهاجم سياسة عبد الناصر وبيطالب بتغيير قيادات الجيش الكبيره وأطلقوا عليهم الأنتهازيين الجدد ووصلت الجرأه أن المنشور وصل لعبد لناصر و عبد الحكيم عامر بالبريد وجن جنون عبد الناصر وخصوصا أن توقيت المنشور صعب جدا وكلفت المخابرات الحربيه بالتحرى عن مصدر المنشور وفشلت فى الوصول لأى معلومات وهنا كلف عبد الناصر المخابرات العامه بالبحث عن مصدر المنشور وده معناه أن المنشور طالع من الجيش وعلشان كده تم تكليف المخابرات الحربيه أولاً ولم فشلت كلف المخابرات العامه 

ركز معايا الله يرضى عليك وبعد أسبوع كان قدام عبد الناصر تقرير عن مصدر المنشور وأن اللى كتبه هو داود عويس مدير مكتب عبد الحكيم عامر وقبل ماحد يقول أن المخابرات العامه اللى فبركت الأدله فى نفس اليوم راح داود عويس لمنزل العقيد أحمد علوى كاتم أسرار فى الجيش السورى ودردشوا مع بعض حكى له أنه تورط فى كتابة منشور ضد عبد الناصر وأن المخابرات الحربيه معرفتشى توصل له وأنه حاسس أن عبد الناصر كلف صلاح نصر بكشف الموضوع فنصحه علوى وقاله روح أعترف للمشير بنفسك فى ثكنات الحلميه لكن داود طلب من علوى هو اللى يبلغ المشير لأنه خايف من مواجهته خصوصا وأنه مدير مكتبه فوافق علوى بشرط أن يعرف تفاصيل الموضوع من أوله لأخره

فقال له أن اللى كتبوا المنشور هم وحيد رمضان ولطفى واكد  ومحمد السقا الملحق العسكرى بتاعنا فى هولندا عنده علم بالموضوع وأن اللى كتب المنشور على  الآله الكاتبه هو عبد الحفيظ الشناوى بتاع المخابرات العامه وأن المنشور أنكتب فى نادى هيولييود على الآله الكاتبه هناك وفعلا راح عمنا علوى وحكى القصه لعبد الحكيم عامر

فورا بلغ عبد الحكيم عامر عبد الناصر بكل حاجه وخلى بالك من التفاصيل والنبى وأمر عبد الناصر بالقبض على كل الأسماء ولم يتبقى غير داود فأتصل عبد الحكيم عامر على صلاح نصر وقاله داود فى بيت علوى أبعت حد يقبض عليه وأتحفظ عليه عندك لما أحقق معاه بنفسى وعندك واحد فى المخابرات مشترك معاهم يانصر

فورا طبعا صلاح نصر بعت ناس تقبض على داود فى بيت علوى ونده لمدير مكتبه طلعت خيرى  يستدعى الشناوى بتاع المخابرات العامه من مكتبه ويحقق معاه بخصوص المنشور خصوصا أن داود معترف عليه أنه هو اللى كتب المنشور على الآله الكاتبه وفعلا راح طلعت لمكتب الشناوى ولما دخل عليه المكتب وسأله عن موضوع المنشور لم ينكر وأعترف فعلا وطلب يدخل دورة المياه لأنه حاسس أنه حيرجع ولما دخل الحمام أطلق النار على نفسه من مسدسه الشخصى ولأن المخابرات العامه تتبع المدنيين فقد تولت النيابه العامه التحقيق فى أنتحار الشناوى وأثبتت القصه الى قلت لحضرتك عليها

موسيقى عسكريه ومارشات عسكريه والبروجى يعلن عن الرد على الكدبه الكبرى وهى تنكيل المخابرات بالأخوان الهجاصيييييين لكن أصابعى بدأت تؤلمنى وهنا لابد أن نتوقف عن الكلام المباح وسيكون لنا لقاء متى شاء الله

على فكره المطربه أسمها (( م . ص ))

جنرال بهاء الشامى