ملف الداخليه رقم 7

عندى فى مصر 27 محافظه وعندى عدد المراكز فى الـ 27 محافظه 185 مركز موزعه على جميع أنحاء الجمهوريه

عندى مركز كوم حماده أكبر مراكز الجمهوريه من حيث المساحه وعدد السكان

عندى فى كل مركز ظابط مباحث و 2 معاونين مباحث يعنى عندى 3 ظباط مباحث فى كل مركز شرطه

عندى أجمالى عدد ظباط المباحث الجنائيين 555 ظابط مباحث جنائى

عندى عدد سكان مصر 105 مليون مواطن

بإختصار شديد عندى لكل 200 ألف مواطن ظابط أو معاون مباحث ده لو أفترضنا أن كل مراكز الجمهوريه بنفس الكثافه السكانيه يعنى ممكن يكون عندى ظابط مباحث لـ 100 ألف وظابط مباحث لـ 500 ألف أو 400 ألف 

ألف باء الأعراف الأمنيه تقول الجريمه تناسب مع مستوى دخل الفرد الأقتصادى يعنى كلما قل الدخل الأقتصادى كلما زادت معدلات الجريمه والعكس صحيح كلما زاد دخل الفرد قلة معدلات الجريمه 

عندنا متوسط دخل الفرد الأقتصادى حدث ولا حرج يعنى المفروض يكون عندى ظباط أكثر بالنسبه لعدد السكان لو قارنت متوسط دخل الفرد بسويسرا مثلا أو أمريكا أو الكويت أو الأمارات 

المعدلات العالميه وحاول تمسك أعصابك وأنت بتقرأ الأرقام 200 ظابط لكل 100 ألف مواطن

لو لسه أعصابك لم تنهار وعاوز تكمل معايا تحليل أذن أنت أمام عدم وجود رجال شرطه فى مصر طبقا للمعدلات الطبيعيه ولما المعدلات تقول 200 ظابط لكل 100 ألأف وأنت عندك فى بلدك ظابط واحد لكل 250 ألف يعنى أنت أمام كارثه أو نخلينا واقعيين معندكشى جهاز شرطه جنائى مناسب لعدد السكان ومع تدنى متوسط دخل الفرد يعنى أنت أمام كارثه 

بداية الشرطه كانت عام 1880 م وكان عدد الظباط 300 ظابط فى مقابل 20 مليون مصرى يعنى كان وقتها ظابط لكل 65 ألف مواطن ورغم أنه معدل منخفض وغير طبيعى لكن لازلنا كما نحن من وقتها بنفس التقسيم الجغرافى للشرطه 

نتيجة هذه الظروف أنا عندى ظابط مباحث بيشتغل 18 ساعه يوميا ومعندوش وقت يفطر ولا يشرب شاى ولا يفكر ولا يشغل عقله ولا يحضر ولادة مراته ولا يتابع ولاده فى المدارس ولا يقدر ياخد أجازة مصيف ولا يقدر يلبس جلابيه بيضا ويروح يصلى الجمعه أو يصلى صلاة العيد

ظابط المباحث ثور علقوه فى الساقيه ومطلوب منه يشغل عقله ويفكر ويبتكر ويحفظ الأمن

ظابط المباحث مطلوب منه حفظ الأمن والتحقيق فى جرائم القتل والسرقه والسلاح وتنفيذ الأحكام والأشتراك فى تأمين المساجد والكنائس والمرور على الخدمات ومطلوب ومطلوب ومطلوب 

صدق أو لاتصدق معظم ظباط المباحث نتيجة هذه الضغوط يقعون فى أخطاء إداريه ويتم التحقيق معهم وموقفون عن العمل لحين النظر فى العقوبه التى ستوقع عليهم والمدهش أن قرار الأيقاف عن العمل معناه أيقاف الراتب والمدهش أن القرار لاينفذ لعدم وجود البديل يعنى شغال ببلاش وأى غلطه بيتحاسب عليها وموظفى الدوله بيشتغلوا 8 ساعات وهو بيشتغل 18 ساعه ولو غلط يقطعوا رقبته ومطلوب منه يكون شغله تمام وكله تحت السيطره

علشان الظابط يعيش الجو ده ويخلص المطلوب منه بيسلم نفسه لأمين الشرطه اللى عنده الحلول لكل هذه المشاكل أما المشاكل العويصه فظابط المباحث بيسلم نفسه وعقله لعضو مجلس الشعب ومع مرور الوقت يتحول أتوماتيكيا ظابط المباحث لمجرد عامل تحت أشراف الباشا حاتم والباشا عضو مجلس النواب

بإختصار معنديش ظابط مباحث فعلى بيفكر بعقله وبيشتغل بنفسه أنا عندى واحد قاعد فى منصب رسمى يديره الباشا حاتم من خلف الستار ومعاه الباشا عضو مجلس النواب وأهم حاجه الورق يتظبط

من هنا أنت بتشوف المهازل اللى بتشوفها وأظن عرفت الليله فى أيد مين وعرفت مين اللى بيتحكموا فى جهاز الشرطه وعرفت ليه بتتهان وتنضرب فى القسم وعرفت ليه فيه أحكام مابتتنفذشى وعرفت ليه كل سلبيات الشرطه ومتنساش أن فيه حاجز نفسى بين الباشا حاتم وظابط المباحث وحاتم حاسس أنه هو اللى بيحرك ظابط المباحث ودى فى حد ذاتها مشكله 

فيه بحث تم تقديمه لرئيس الجمهوريه بمشاكل الشرطه بناءاً على طلبه شخصيا بعد أجتماع مع قيادات الداخليه وكان قال لهم لو أنضبطت الداخليه البلد حتنظبط بنسبة 70 % لأن لو ظبطنا أداء الراجل المسئول عن تطبيق القانون سينضبط المطبق عليهم القانون ولو أنضبط القدوه سينصلح حال المجتمع بنسبه كبيره ومش عاوز أفرض عليكم حلول من بره أتفضلوا أنتم قدموا حلو لمشاكلكم  وقدموا بعض المقترحات وبدأ تنفيذها فعلا بالتدريج 

من أهم المقترحات المقدمه لرئيس الجمهوريه هو إعادة التوزيع الجغرافى لأقسام الشرطه وبدل مايكون عندى 155 مركز شرطه فيهم 555 ظابط مباحث يصبح عندى 3000 مركز شرطه فيهم 9000 ألف ظابط مباحث ليكون العدد متناسب ولو بشكل معقول لكن هذا المقترح تقف أمامه العقبات وخصوصا العقبات الماليه 

أنت محتاج زيادة ميزانيه مرتبات الظباط فى ميزانية وزارة الماليه التى تقدم لمجلس الشعب المخصصه للمرتبات

أنت محتاج لعدد أقسام شرطه رهيب ومايستلزمه ذلك من مبانى وبنيه تحتيه ومرفقات

أنت محتاج لأكتر من كلية شرطه لتخريج هذا العدد

أنت محتاج زيادة ميزانية التدريب  

أنت محتاج الظباط الصغيره تاخد دورات نفسيه زى دورات القاده الكبار

أنت محتاج الظباط الصغيره تاخد دورات حقوق أنسان زى القيادات الكبيره بالظبط

أنت محتاج تشريعات جذريه مخصوص لجهاز الشرطه

أنت محتاج تفعيل المقترح بقانون المقدم لرئيس الدوله بفصل أى ظابط من الخدمه يثبت مخالفته لقانون الشرطه ويسيئ أستخدام سلطاته وعلشان تعمل كده لازم يكون عندك فائض فى ظباط الشرطه 

صدق أو لاتصدق أن أعضاء مجلس الشعب رفضوا مبدأيا هذه المقترحات لأنها حتعك على دماغ معظمهم 

هل يفيق المواطن  المصرى ويعرف ينتخب عضو مجلس شعب يتبنى هذه المقترحات لصالح المواطن المصرى اللى بتعك على دماغه فى الآخر ولا حنفضل ماشيين زى ماأحنا ونطالب غيرنا هو اللى يتغير مع أن التغيير فى أيدينا والحل فى وصول محترمين لأكبر جهاز تشريعى رقابى فى البلد

جنرال بهاء الشامى