شعب دولة فيسوفيسى اللذيذ

فى دولة فيسوفيسى شعب يريد ولا يستحق ومتكلمنيش عن جلد الذات إحنا بنتكلم عن واقع 

شعب ينادى بالرفاهيه ويطالب بالعداله ويطالب بمساواته بشعوب دول أخرى ويطمع فى كل مناحى الحياه وهو لايستحق

شعب يجمل مصطلحات الكبائر لكى يستبيحها وتحولت السرقه لأقتباس وتحولت السرقه لأبجنى تجدنى وأشمعنى أنا وهى جت عليا ماالدنيا كلها بايظه ويطلق على الرشوه إعانة حياه وكباره يسرقون صغاره علانيه ووضوحا ونواب برلمانه يبيعون فيزة الحج لبيت الله الحرام لغسل الذنوب

شعب يسرق المصحف ليقرأ فيه لينال الثواب والتدين شعب عنده رنة موبايل وكول تون دعاء اللهم أسترنا يوم العرض عليك وأختصر الدين فى طاقيه وسبحه وجلباب أبيض قصير ووصل الأمر أن قرآن المولى عز وجل مصدر مصائب ولما يسمع حد مشغل القرآن على غير العاده يقول خير هو مين اللى مات

شعب فيه الأب اللى بيروح يشترى أحدث وأدق سماعة بلوتوث علشان الننوس يغش فى الأمتحانات ويرجع يشتكى من سوء العمليه التعليميه وهو بنفسه هذا الأب اللى حول مهنة المدرس الساميه لسلعه تباع وتشترى ولها أعلانات ترويجيه أيوه ياسيدى المدرس أصبح سلعه مثله مثل علبة الصلصه وكيس الشيبسى ومعجون الحلاقه محتاج لإعلانات للترويج لنفسه

شعب يعلم أن هذا المدرس يتفوه أمام بنته بإيحاءات جنسيه ولسه سايب بنته عنده فى المجموعه وكأن مجموع آخر العام أهم من عفة وأخلاق بنته وهو لايعلم أنه بهذا يعلم بنته أهم قواعد الأنحراف الغايه تبرر الوسيله

شعب الأب عاوز يجوز بنته ولما يجيله عريس لايهمه أخلاقه ولا سلوكياته وكل مايهمه هو الفرح حيكون فى أى قاعه وهو نفس الأب اللى مايتهزش لما بنته ترجعله فاشله ومطلقه بعد شهور من جوازها لأنه معلمهاش يعنى إيه حياه زوجيه وسابها تتعلم من على النت ومن الموبيلات

شعب بيكافح الفساد على الفيسبوك ببوستات مسروقه والمدهش البجاحه فى التبرير وتحولت السرقه لقاعده وقانون لها من يدافع عن ترسيخ مفاهيمها وكلب عديم الربايه يقولك والله لأسرقك

شعب بيحلف على المصحف وكأنه ورق جرايد وسبحتك فين يامعلم بيومى

شعب فنانينه ودن من طين وودن من عجين وكل اللى يهمهم التصوير الأستفزازى ولما واحده فيهم تتبرع بملابس أعمالها طوب الأرض يهاجمها يعنى لارحم ولا ساب رحمة ربنا تنزل

شعب يجيد التلاعب بالقوانين وأكثر ماشغله هى الثغرات اللى ممكن يستغلها لصالحه

شعب لما يموت زهرة شبابه على إيد الأرهابيين فورا يتعاطف ويتضامن ويغرق صفحته بوستات حزينه وتشوف بوستاته تندهش من مشاعر الحزن وتشوف قائمة أصدقائه فحدث ولا حرج كلها أخوان وكارهين للدم المصرى وعنده موت شاب أهون من أنه يلغى صداقة واحد على صفحة تفاشل أجتماعى

شعب عارف أن نشر الأخبار الكاذبه يضره ويضر بلده ورغم ذلك عمل صفحته وكالة أنباء ولازم يعمل سبق صحفى وكأنه له مراسلين فى كل شبر فى الكره الأرضيه وكأن صناع القرار ولاد خالته

شعب المدام طول النهار ماسكه الموبايل وقاعده على المدعوق الفيسبوك تكلمك عن أفضل طرق تربية النشأ وكيف تحافظ المرأه على بيتها وزوجها وأولادها

شعب حاطط على صورة بروفايله صور وحوش مرعبه وصور تسيب ركبك وهو لما بيشوف مخبر فى الشارع بيعملها على نفسه

شعب فيه كل المتناقضات وتحول من شعب بيحب بعض لشعب كل واحد كاره نفسه

شعب حرامى وخلينا نقولها بصراحه وبدون تزويق ولما تبدأ تحارب السرقه واللصوص تشوف تعاطف ومبررات ماأتى الله بها من سلطان

شعب عاوز أعلام نظيف وهو أسوء من الأعلام نفسه وعاوز يحارب أرهابيين وهو اللى بيفرخهم وعاوز يعدم اللى فى السجون وهو أسوء منهم

شعب بيفتى فى اللى له فيه واللى مالوش فيه طب تلاقيه هندسه تلاقيه صيدله مافيش مانع شئون عسكريه مش مشكله شئون أقتصاديه دى أكتر حاجه بيفهم فيها شعب خابور فى كل حاجه وراشق فى كل مصيبه

شعب لما ربنا أنعم عليه براجل كويس بيخاف ربنا  بيتضامن معاه بشعار معاك علشان تبنيها مش علشان نبنيها علشان هو عاوز غيره يبنى وهو يقعد بعيد يتفرج عليها وهى بتتبنى

شعب مش عاجبه وزير وهو أسوء من وزرائه

شعب ماعملشى حاجه فى دنياه لبلده من 2011 وعاوز بلده تجهزله الرضعه والبدرونه

شعب جاهل وغبى وبلطجى وبيض وعاطل بالوراثه وعاوز كل حاجه ومش عاوز يعمل حاجه حتى من يخلف الرئيس عاوز الرئيس هو اللى يجهزهوله

شعب أكتر من تلته متسرب من التعليم وعامل فيها أحمد زويل و 1 % منه فقط حاصل على مؤهل عالى والـ 100 مليون عاملين فيها علماء

شعب معظمه لو قرا سطرين فى كتاب يصاب بأعراض الحمل قئ وسخونيه وصداع

شعب خساره فيه الحياه على تراب وطن ربنا صاينه وراعيه من فوق سبع طباق

ضاقت بنا الحياه ياالله وسط هذا الشعب ولأننا نحب هذا الوطن ونعرف قدره ومقداره نطلب منك ياالله التعجيل بقبض الروح وكل أمانينا أن يحضنا تراب هذا الوطن الطاهر فى الممات

قبل دماغك ماتسرح أنا بتكلم عن شعب دولة فيسوفيسى

جنرال فيسوفيسى الشامى