يا أيتها الأم الثكلى ويا أيتها الزوجه المترمله ويا أيها
الأبن الذى فقد الأخ والأب ويا كل ضحايا الأمراض أملؤوا الأرض والفضاء بتراتيل
الخيبه والحسره أملؤوا الصدور والقلوب بآمال الموت أجعلوا الأنشوده حقيقه تموت
وتندثر أجعلوا العلاج خارج أمانيكم
كل شئ فى الدنيا بأختيارك عدا المرض فهو يأتى لك بدون رغبتك
ويدخل حياتك بدون إستأذان ويخرم جيبك ويستنزف مدخراتك
إحنا زى ماقلت لحضرتك على تليجرام 100 مليون ومش حينفع نقعد
كلنا مع بعض علشان نعمل قوانينا ونوزع ميزانيتنا لذلك كان على كل كام مليون
يختاروا ممثل عنهم
طبعا وطبقا للدستور اللى أحنا وافقنا عليه هؤلاء المنتخبون
مهمتهم سن القوانين المنظمه للحريات والرقابه على أداء الحكومه والموافقه على
الميزانيه
الحكومه كل اللى يهمها توزع القرشين اللى معاها من الدخل
القومى على بنود الأنفاق يعنى كل اللى يهمها البلد تفضل ماشيه وأن شالله الشعب
يولع بجاز وقطران
مجلس نوابكم الموقر شغلته بقى يناقش الميزانيه ويعدلها
طيب إيه رأيك يامؤمن ياموحد بالله ياللى كلك أمراض أكلت فى
جتتك وجتتة عيالك أن ميزانية التأمين الصحى 1 مليار و221 مليون جنيه وأستهدى بالله
ماتشخرشى دلوقتى وفر صحتك لآخر البوست
يعنى لو قسمت الميزانيه دى على الطلبه والمرأه اللى بتصرف على
بيت والأطفال الرضع والمعاشات حتلاقى الطالب ينوبه 15 لحلوح بحالهم والطفل كمان 15
لحلوح زيهم والمرأه نصفوها ونابها 200 جنيه تتعالج بيهم هى وعيالها وعاوز الشعب
يبقى بصحه جيده وعنده أنتماء قبلى ووطنى ولما تعوزه تلاقيه
طبعا نوابكم الموقرون حيوافقوا على المهزله دى بنظام شيلنى
وأشيلك
ميزانية التعليم أنفاق حكومى وشعبى تتخطى الـ 200 مليار جنيه
والمحصله زى ماحضرتك شايف لاتتخطى صفر %
ميزانية الصحه إنفاق حكومى 48 مليار جنيه
ممكن تطلع أبنك من التعليم لكن متقدرشى تحميه من المرض يعنى
الصحه أهم من التعليم
لازم الحكومه الموقره تحافظ على صحة الشعب علشان س = ص وعلشان
لما تحتاج المواطنين تلاقيهم أصحاء مش مكسحين
الدوله ليست هى الحكومه وكلنا عارفين أن الحكومه مجرد أشخاص
لأدارة البلد ومعاها قرشين هم الدخل القومى وعاوزه توزعهم لكن التفنيده ظالمه
لقطاع لتأمين الصحى
رئيس الدوله مالوش صالح بالليله دى دى شغلة الحكومه والى يقدر
يعدل على الحكومه هم نوابكم الموقرين
المطلوب من حضرتك تخطف رجلك لنائب دايرتك تقوله مش موافق على المهزله دى علشان يتكلم بأسمك فى المجلس ويعارض الحكومه وهى دى الطريقه الشرعيه الوحيده لتوصيل صوتك
والنائب ده تتقابل معاه ونعترض وهو موش موجود غير أما يكون عاوزنى ساعة الانتخابات وبح يعد كده
ردحذفوالنائب ده تتقابل معاه ونعترض وهو موش موجود غير أما يكون عاوزنى ساعة الانتخابات وبح يعد كده
ردحذفكل سنة وحضرتك طيب
ردحذفهما فين النوايب دي بعد الانتخابات كله فص ملح و داب
كل سنة وحضرتك طيب
ردحذفهما فين النوايب دي بعد الانتخابات كله فص ملح و داب