مندوبى شركات الأدويه وسرقة حقوق المرضى

 

المريض بيروح للأطباء والمستشفيات غصب عنه مش بمزاجه لأن المرض ليس لنا يد فيه ومحدش بيتمنى يمرض ربنا يكفينا ويكفيكم شر المرض  

 

 

المستشفيات الحكوميه والتعليميه والجامعيه لها نظام خاص فى توريد الأدويه ولها سيستم خاص جدا ومناقصات وعطاءات وحدوته حكوميه روتينيه كبيره حضرتك

 

 

يعنى المقصود من كلامى أن شركات الأدويه تعاملها للفوز بعطاءات توريد الأدويه بتكون مع جهه وزاريه خاصه بشراء الأدويه

 

يعنى شركات الأدويه ملهاش تعامل مباشر مع الساده الأطباء فى عيادات المستشفيات

 

يعنى موضوع مندوب شركة الأدويه مالوش أى لزوم فى العيادات الحكوميه أو المستشفيات لأن المفروض حضرتك بتصرف دوائك ده لو موجود من صيدلية المستشفى الحكومى

 

وقت الطبيب فى المستشفى أو العياده الحكوميه اللى بياخد مرتبه عليه  ملك للمرضى وكل دقيقه هى ملك للمرضى وأى أقتطاع من هذا الوقت لموضوع مندوب شركة الأدويه هو سرقه علنيه من حق المرضى

 

نيجى نشوف إيه اللى بيحصل فى العيادات الحكوميه زى مثلا العيادات الشامله فى المستشفيات العامه والجامعيه بتاعة الغلابه اللى مش قادرين على مصاريف عيادات الأطباء الخاصه واللى بيحصل بيروح مندوب شركة الأدويه للأطباء ويقدم لهم عروض علشان يكتبوا أدوية شركته فى روشتات خارجيه يشتريها المريض الغلبان من خارج المستشفى لأن غالبا صيدليات المستشفيات خاوية على عروشها لأن أول لما بينصرف الدواء من المخازن الممرضات بمساعدة الأطبار بيكتبوا تذاكر وهميه وروشتات وهميه وبينصرف العلاج علشان الممرضه بتبيعه للصيديليات بره تقطعه حبوب وتتباع فى أكياس عاديه  زى جرعة البرد كده مثلا

 

لما تشوف مندوب شركة أدويه فى مستشفى حكومى بياخد دورك فى الدخول للطبيب تأكد أنه بيسرق حقك وبيسرق دورك وبيتآمر مع طاقم الأطباء والتمريض عليك لأستنزاف القرشين اللى لسه فى جيبك

 

أعترض وطالب بحقك بأدب ومتخافشى من تهمة التعدى على موظف أثناء تأدية عمله أنت مقتلتش السادات لا سمح الله وتأكد أنك على حق وقانونى كمان لأن تواجد هؤلاء المندوبين فى المستشفيات وسرقة حقك فى وقت الطبيب غير قانونى

 

صدقنى الموقف حصل معى أكثر من مره وكانوا بيخافوا من إعتراضى وآخر مره تجرأوا عليا وجابولى الأمن علشان طالبت بحقى ولما نزلنا لظابط الأمن سألته سؤال واحد هل تواجد المندوب فى المستشفى قانونى فقال للممرضه وأعوانها أنتم جايبين لى واحد لبط لو فتحت محضر بالتعدى على موظف حيدوديكوا فى داهيه وأحتمال يطلع من المحضر زى الشعره من العجين

 

طبعا لحفظ ماء الوجه قالوا طيب يعتذر للممرضه لأنها أتهمها بالسرقه فقلت لهم وقت الطبيب حقى وأى تعدى على حقى هو سرقه لحق كفلته لى بلدى ومش موافق على الأعتذار ومش موافق على قلب الباطل لحق وأفتحوا المحضر وبتهمها بأهدار حقى متعمده وهو مايعتبره القانون إختلاس

 

فجأه سابونى كلهم وخرجوا من حجرة الظابط والظابط خرج معاهم وأضطريت أمشى

 

تمسك بحقك التى كفلته لك بلدك ومتخليش حد يسرق حقك لأن الساكت عن الحق شيطان أخرص

 

جنرال بهاء الشامى