السيسى يتنحى عن كرسى الحكم

السيسى يقرر التنحى عن كرسى الحكم فى مـصر ويدعو لأنتخابات رئاسيه مبكره ويلغى الأتفاق مع صندوق النقد الدولى

وزير العدل يأمر بالأفراج عن كل قيادات جماعة الأخوان والأفراج عن مبارك وأعضاء نظامه ووقف محاكمتهم

وزير الدفاع يأمر بتخصيص جنوب سيناء كوطن للأرهابيين وجماعة بيت المقدس تعلن جنوب سيناء ولايه لها كما خصص سيادته شمال سيناء لأهالى غزه وفتح المعابر بشكل دائم والسماح بعبور أعضاء حماس بدون تصاريح ذهاباُ وعوده

الخارجيه المصريه تقبل بتقسيم سوريا وحل جيشها كما تقبل بتقسيم ليبيا وحل جيشها

الأداره المصريه تعلن أن حلايب وشلاتين آراضى سودانيه وتقبل بعودتها للسودان الشمالى

وزير الأقتصاد يقرر خفض سعر الدولار لـ 4 جنيهات

تخيل معى يامؤمن ياموحد بالله ياعاقل يارشيد ياوطنى ياناشط ياثورى أن كل ده حصل وكل طلبات المصريين تحققت فهل ستنخفض الأسعار وتعود لما كانت عليه ويادار مادخلك شر ؟؟؟

بالطبع لن تعود الدنيا كما كانت حتى لو وافقنا على تقسيم مصر كما يريد أعدائها وتم حل الجيش المصرى .... أغلب الظن وكطبيعه بشريه سنتناحر على الكرسى الخالى وسنسعى جميعا لقتل بعضنا لفرض الهيمنه والسيطره وستتحول مصر لعراق آخر أو سوريا أخرى أو ليبيا أخرى ولا حضرتك عندك تصور آخر

لو مبارك كان ظل فى الحكم حتى وقتنا هذا مش كان برضوا حيوافق على شروط صندوق النقد الدولى وهو مبارك اللى وافق عليها ورفع جزء من الدعم وأرتفعت الأسعار فى عهده بنسبة 800 % كان مستلم من مصر من السادات وكيلو اللحمه بـ 95 قرش يعنى أقل من جنيه وكان السادات أستلمها من عبدالناصر وهى بـ 65 قرش وتركها مبارك وهى سعرها 40 جنيه يعنى أرتفع سعرها بنسبة 4000 % ثم قفزت فى عصر الأخوان لـ 75 جنيه ووصل سعرها فى عهد السيسى لـ 85 جنيه وبرضوا مبارك اللى وافق على شروط صندوق النقد وباع القطاع العام وأتسرقت فلوسه وراحت مع اللى راح

مش برضوا الأخوان طلعوا فتاوى دينيه أن فوائد القرض مصاريف إداريه والأقتراض من الصندوق حلال 100 % ولا نسيتوا

شوف يامحترم ويامحترمه لو عملنا البدع علشان الكل يرضى علينا مش حيرضوا ومش حنعرف نرضيهم كلهم ولو جينا نقسم سيناء حيتخانقوا مع بعض ويقولك فيه فساد فى التقسيم ومش عاوزين الجيش يقسم أحنا اللى حنقسم بنفسنا ولو سبتهم يقسموا حيتخانقوا مع بعض وناس تانيه اللى تخش تاخدها ولو سلمنا حلايب وشلاتين هل سيتوقف البشير عن مهاجمة مصر والخروج من القفص الكطرى لكى يرضى الأمريكان بالعكس بعد مايخدهم حيطمع أكتر وأكتر وكطر حتزقه أكتر ومش ممكن البشير يخرج من طوع كطر علشان يفضل على الكرسى وأمريكا ماتقولشى البشير مطلوب للعداله الدوليه

الموضوع يامصرى ياوطنى ياللى لسه خايف على بلدك مش السيسى ونظامه بالعكس الموضوع أكبر من كده وأنت مش صغير علشان أقولك هما عاوزين إيه أنت فاهم وعارف ومتأكد ولو عندك شك يبقى أسمحلى أنت بتستعبط

الحرب أساليبها كتيره وكل شئ فيها مباح من أول حرب الأعلام والفيسبوك والأشاعات لحد القنابل والمفخخات والدبابات والطائرات بس المشكله عندهم أن شعوبهم دمها غالى ومش عاوزين يدخلوا معاك فى حروب مباشره وأخترعوا أساليب كتيره لخوض الحروب

إيه بقى المطلوب منك ؟؟؟

توزنها وتشغل عقلك وطالما فيه حاكم ربنا بعتهولك محافظ على تماسكها دلوقتى خليك واقف فى ظهره وبعد ماتخلص الحرب لو كان فيه خطأ نتحاسب

خليك فاكر وحط نصب عينيك السؤال ده كويس وعاوزك تفكر فيه كويس .... ليه ربنا بعت السيسى فى التوقيت ده بالذات وطبعا السيسى مجاش غصب عن إرادة ربنا والعياذ بالله لكن ربنا مكنه فى توقيت فى غاية الصعوبه لحكمه يعلمها الله لأن ربنا مش عاوز مصر تحصل سوريا وليبيا لحكمه يعلمها رب الكون كان ممكن ربنا يخلى مبارك يعاند ويركب دماغه وقوات عنان تقف قدام قوات طنطاوى ومصر تحصل سوريا وليبيا ويمكن ربنا مكن الأخوان لمدة سنه ثم أراد خلعهم لحكمه يعلمها المولى ويمكن علشان كنا مغشوشين فيهم وأراد ربنا كشفهم ولا أنت فاكر أن الأخوان أتخلعوا بدون مشيئة الله

طبعا ربنا مانزلشى عمل كل حاجه بنفسه لكن سخر من يقوم بتنفيذ مشيئته لكن لو أتبترتوا على النعمه اللى أنتوا فيها سهل جدا على ربنا زلزال يخسف بينا الأرض ويموت اللى يموت واللى يفضل هما اللى يعرفوا يحافظوا على مصر كما وعد أدخلوها آمنين

جنرال بهاء الشامى